सुरा, कपडे, मोबाईल अन् दुचाकी पोलिसांच्या ताब्यात; तपासासाठी कुडाळ न्यायालयाचा महत्त्वपूर्ण आदेश
कुडाळ | प्रतिनिधी
सिंधुदुर्ग जिल्ह्यात खळबळ उडवणाऱ्या दामिनी किरण पालव खून प्रकरणातील तपासाला वेग आला असून, संशयित आरोपी साहिल विश्राम धुरी याच्या पोलीस कोठडीत आणखी चार दिवसांची वाढ करण्यात आली आहे. पोलीस कोठडीची मुदत संपल्यानंतर आज, २४ ऑक्टोबर रोजी त्याला कुडाळ येथील न्यायालयात हजर करण्यात आले. प्रकरणाचा सखोल तपास करण्यासाठी पोलिसांनी केलेली मागणी मान्य करत न्यायालयाने हा आदेश दिला.
दामिनी पालव खून प्रकरणाचा तपास कुडाळ पोलिसांकडून सुरू आहे. तपासादरम्यान संशयित आरोपीकडून सुरा, कपडे, मोबाईल तसेच गुन्ह्यात वापरण्यात आल्याचे पोलिसांनी सांगितलेली हिरोहोंडा दुचाकी ताब्यात घेण्यात आली आहे. कुडाळचे पोलीस निरीक्षक विकास बडवे यांनी न्यायालयात तपासाची माहिती देताना जप्त करण्यात आलेल्या वस्तूंबाबत स्पष्ट केले. मात्र, या प्रकरणातील तपास अद्याप पूर्ण झालेला नसून, विविध बाबींची पडताळणी करणे आणि उपलब्ध पुराव्यांच्या आधारे पुढील तपास करणे आवश्यक असल्याचे पोलिसांनी न्यायालयाच्या निदर्शनास आणून दिले. त्यानंतर न्यायालयाने संशयिताच्या पोलीस कोठडीत आणखी चार दिवसांची वाढ मंजूर केली.
या प्रकरणात संशयित साहिल धुरी याच्याविरोधात भारतीय न्यायसंहितेच्या कलम १०३ (१) अंतर्गत खुनाचा गुन्हा दाखल आहे. वाढीव पोलीस कोठडीमुळे तपासातील प्रलंबित बाबींची चौकशी करण्यासाठी पोलिसांना अतिरिक्त वेळ मिळणार आहे.
तपासातून आणखी काय उघड होणार?
दामिनी पालव यांच्या मृत्यूशी संबंधित प्रत्येक महत्त्वाचा धागा पोलिसांच्या तपासातून उलगडणार का? जप्त करण्यात आलेल्या वस्तूंच्या तपासातून आणखी काही महत्त्वाचे पुरावे समोर येणार का? या प्रश्नांची उत्तरे आगामी तपासातून स्पष्ट होण्याची शक्यता आहे. या संवेदनशील प्रकरणातील पुढील घडामोडींकडे संपूर्ण सिंधुदुर्ग जिल्ह्याचे लक्ष लागले आहे.
Subscribe to my channel
