१०० कवितांच्या इंग्रजी काव्यसंग्रहातून निसर्गातील अमूल्यतेची जाणीव ; १ मार्चला प्रकाशन
मालवण | कुणाल मांजरेकर
मालवण येथील प्रसिद्ध स्त्री रोग तज्ज्ञ डॉ. शिल्पा झाटाये यांनी वैद्यकीय क्षेत्रा बरोबरच साहित्यिक क्षेत्रात भरारी घेत तब्बल शंभर इंग्रजी कवितांचा संग्रह निर्माण केला आहे. समाजात रोज घडणाऱ्या घटना, रुग्णांच्या आयुष्यातील चढ-उतार, स्त्री जीवनातील संघर्ष आणि आनंदाचे क्षण तसेच भविष्यातील पिढ्यांसाठी मार्गदर्शक ठरतील, असे विचार या कवितांमधून मांडण्यात आले आहेत. या कवितासंग्रहाला ‘१०० शिल्पा कविता’ असे नाव दिले असून येत्या १ मार्च रोजी सायंकाळी ४ वाजता मान्यवरांच्या उपस्थितीत या कवितासंग्रहाचे प्रकाशन होणार आहे.
डॉ. शिल्पा झांट्ये ह्या जिल्ह्यातील आघाडीच्या स्त्रीरोग तज्ञ असून साहित्यिक क्षेत्रात देखील त्यांनी आजवर अनेकदा लिखाण केले आहे. त्यांचे लिखाण विविध वृत्तपत्रे व मासिकांमधून प्रकाशीत झाले आहे. स्त्रीरोगतज्ज्ञ म्हणून काम करताना त्यांना जीवनाच्या अनेक पैलूंना जवळून पाहण्याची संधी मिळाली. मातृत्वाचा आनंद, प्रसुतीतील धाडस, कुटुंबातील नातेसंबंध, समाजातील बदलती मूल्यव्यवस्था आणि स्त्रियांचे मानसिक बळ यांचा मागोवा त्यांनी काव्य स्वरूपात घेतला असून असून इंग्रजी भाषेत लिहिलेल्या त्यांच्या या शंभर कवितांमध्ये सकारात्मकता, आत्मविश्वास, जिद्द आणि जीवनाकडे आशावादी नजरेने पाहण्याचा संदेश आहे. या काव्यसंग्रहाचे प्रकाशन १ मार्च रोजी होत असून साहित्य आणि वैद्यकीय क्षेत्रातील मान्यवरांच्या उपस्थितीत हा सोहळा होणार आहे.
माणुसकी, संवेदनशीलता आणि विचारांची परिपक्वता यांचा संगम असलेला हा काव्यसंग्रह वाचकांच्या मनात नक्कीच घर करेल, असा विश्वास व्यक्त होत आहे.निसर्गाकडे आणि जीवनातील छोट्या आनंदांकडे प्रेमाने पाहा ‘गिफ्टस् फॉर फ्री’ कवितेतून डॉ. झांट्ये यांनी आपल्याला निसर्ग आणि जीवनाने दिलेल्या अमूल्य, पण मोफत मिळणाऱ्या देणग्यांची जाणीव करून दिली आहे. गुलाबांच्या सुगंधासारख्या साध्या आनंदासाठी आपण वेळ काढतो का, की सतत कामाच्या धावपळीत त्यांना पुढे ढकलतो? अधिक मिळविण्याच्या नादात आपण आधीच मिळालेल्या या अमूल्य देणग्यांकडे दुर्लक्ष करतो. यातून थोडा वेळ थांबा, निसर्गाकडे आणि जीवनातील छोट्या आनंदांकडे प्रेमाने पाहा, त्यांचा आस्वाद घ्या आणि कृतज्ञ राहा. कारण या ‘मोफत देणग्या’ अतिशय शुद्ध, सुंदर आणि अनमोल आहेत, असा संदेश आपल्याला मिळतो. प्रगती म्हणजे जुने सर्वकाही टाकून देणे का?’इज ओल्ड रिअली गोल्ड’ कवितेतून डॉ. झाट्ये यांनी जुन्या गोष्टींच्या महत्वावर आणि त्यांच्या अमूल्यतेवर प्रकाश टाकला आहे.
“जुने म्हणजेच सोने” ही म्हण खरी असल्याचे कवयित्री सांगतात. आपल्या घरातील वडीलधारी मंडळी ही अनुभवांची खाण आहेत. त्यांनी आयुष्य जगून मिळविलेले ज्ञान, त्यांच्या कथा आणि शिकवण ही आपल्या जीवनासाठी मार्गदर्शक दीपस्तंभासारखी असतात. जुन्या पाककृती, पारंपरिक हस्तकला आणि गोष्टी यामध्ये प्रेम, संस्कार आणि मूल्ये दडलेली असतात. परंतु आधुनिक काळातील वेगवान जीवनशैलीत लोक जुनेपणाला कमी लेखतात. नवीन गोष्टींच्या मागे धावताना आपण भूतकाळातील मौल्यवान वारसा विसरत आहोत. वापरून फेकून देण्याच्या वृत्तीमुळे जुन्या वस्तुंचे महत्व कमी झाले आहे. प्रगती म्हणजे जुने सर्व काही टाकून देणे का, असा प्रश्न त्या उपस्थित करतात. माझ्या कवितासंग्रहाची काही पुस्तके शाळा आणि वाचनालयाला मोफत देण्यात येणार आहेत, असेही डॉ. झांट्ये यांनी म्हटले आहे.
Subscribe to my channel
