मालवण न. प. च्या प्रशासकीय राजवटीतील कारभाराचा माजी नगराध्यक्षांकडून “पंचनामा”

कचरा नियोजन, बायो टॉयलेट, पार्किंग, दिशादर्शक फलक, बंद हायमास्ट टॉवर, नळपाणी योजना यांसह विविध प्रश्नी विचारला जाब

लोकप्रतिनिधींचा कार्यकाळ संपल्या नंतर सर्वच कामांना ब्रेक ; प्रशासकांना आत्मचिंतनाची गरज

मालवण : कुणाल मांजरेकर

मालवण नगरपालिकेत मागील वर्षभर प्रशासकीय राजवट असून मुख्याधिकारी संतोष जिरगे यांच्याकडे प्रशासक पदाचा कार्यभार आहे. या पार्श्वभूमीवर मागील वर्षभर रखडलेल्या कामकाजाचा माजी नगराध्यक्ष महेश कांदळगावकर यांनी पंचनामा करीत अपूर्ण कामांची जंत्रीच मांडली आहे. यामध्ये कचरा नियोजन, बायो टॉयलेट, पार्किंग, दिशादर्शक फलक, बंद हायमास्ट टॉवर, नळ पाणी योजना यांसह विविध प्रश्न मांडले असून मुख्याधिकारी जिर्गे यांनी प्रशासकाच्या भूमिकेतून बाहेर पडून मुख्याधिकारी पदाचे काम करणे आवश्यक असल्याचे मत व्यक्त केले आहे. एकाच व्यक्तीकडे प्रशासक आणि मुख्याधिकारी ही दोन्ही पदे असल्याने ही परिस्थिती आहे. फक्त नोटिसा, दंड ही प्रशासकीय प्रक्रिया राबवून कामे होणार नाहीत. त्यामुळे ज्या उद्देशाने आम्ही आमच्या आमदार, खासदार यांच्याकडे पाठपुरावा करून निधी उपलब्ध करुन देऊनही जर काम होत नसतील तर विकासाच्या मूळ उद्देशाला हरताळ फासल्यासारखं आहे. लोकप्रतिनिधी यांचा कार्यकाळ संपल्यानंतर सगळ्याच विकास कामांना ब्रेक लागला आहे. त्यामुळे प्रशासक या नात्याने आपल्याला चिंतन करण्याची गरज आहे. ज्या प्रमाणे दांडी महोत्सव हा इव्हेंट यशस्वी करून लोकांची वाहवा मिळवली, तोच कोट आता विकास कामे करण्यासाठी घालणे आवश्यक आहे, असा टोला श्री. कांदळगावकर यांनी लगावला.

श्री. कांदळगावकर यांनी म्हटले आहे की, आमच्या कालावधीमध्ये मागील कित्येक वर्षे आडारी डम्पिंग ग्राउंड येथील कचरा उचलून डम्पिंग ग्राउंड स्वच्छ करण्यात आलं होतं, आणि तत्कालीन जिल्हाधिकारी यांनी याठिकाणी भेट देऊन या स्वच्छतेचं कौतुक केलं होतं. त्याच डम्पिंग ग्राउंडची आजची परिस्थिती मुख्य अधिकारी यांनी जाऊन पाहणी करावी. याच ठिकाणी सध्या ७० लाख रुपयांचे कचरा विलगिकरणाचे काम सुरू असताना ही परिस्थिती का उद्भवली ? टेंडर प्रमाणे काम होते की नाही हे पाहण्याची जबाबदारी प्रशासनाची नाही का? यापूर्वी कचरा टेंडर वर्षाला सुमारे ४० लाख रुपये होते. ते आता ७२ लाख एवढे वाढवूनही कचरा संकलनात अजूनही सातत्य येत नसेल तर पैश्याचा अपव्यय होत आहे असे म्हणावे लागेल. भरमसाठ कर्मचारी वाढवण्यात आले, पण त्यांच्यावर कोणाचा अंकुश नसल्याचं निदर्शनास येतंय. सध्याचा कचरा ठेकेदार हा गटार खोदाईचा ठेकेदार होता. त्याचे गटार खोदाई काम व्यवस्थित नसल्याने त्याच्यावर कारवाई प्रस्तावित करण्यास सांगितले काही. असे असताना कारवाई सोडा तर त्यालाच कचऱ्याचे टेंडर मंजूर करण्यात आले आहे. या मागील गोडबंगाल काही कळत नाही. या ठेकेदाराकडून अजूनही कर्मचारी याना पगार, प्रॉव्हिडंट फंड, इतर सुविधा पुरवत नसल्याने संप करण्याची पाळी का येत आहे ? हे पाहण्याची जबाबदारी कोणाची ? हा पण प्रश्न आहे.

पुरस्कारासाठी कागदोपत्री सादरीकरण ?

स्वच्छता पुरस्कार मिळणे हे अभिनंदनास्पद आहे, पण फक्त पुरस्कार मिळण्यासाठी कागदोपत्री सादरीकरण करून आणि एक दिवसाचे स्वच्छतेचे इव्हेंट करून चालणार नाही. तर दर दिवशी कचरा व्यवस्थापन परिस्थिती काय आहे हे पाहणे त्यापेक्षा महत्वाचं आहे. फक्त स्वच्छतेचे संदेश भिंतीवर रंगवून हे होणार नाही. जर वेंगुर्ल्याचे मुख्य अधिकारी रामदास कोकरे हे स्वच्छतेचं काम करून त्या बाबत पुरस्कार मिळवून देतात आणि याची शासन दरबारी दखल घेऊन वेंगुर्ल्याच्या स्वच्छते बाबतचा धडा शैक्षणिक पुस्तकात येऊ शकतो, तर त्याच वर्गवारीत काम करणारे अन्य मुख्य अधिकारी हे का करू शकत नाहीत हे पण विचार करायला लावणार आहे, असे महेश कांदळगावकर यांनी म्हटले आहे.

बायो टॉयलेट गाड्या वापरविना

पर्यटकांना सोईच्या दृष्टीने किनाऱ्यावर बायो टॉयलेटच्या पाच गाड्या घेऊन सुमारे दोन वर्षाचा कालावधी झाला आहे. त्याच्या देखभालचे टेंडर आमच्या कालावधीत दोन वेळा काढण्यात आले. पण त्याला प्रतिसाद मिळाला नाही. त्यामुळे टेंडर होईपर्यंत ऑफिस मार्फत कामगार घेऊन त्या गाड्या चालवा याबाबत सूचना करूनही अद्याप त्या गाड्या धूळ खात पडल्या आहेत. आमच्या कालावधीत नवीन सक्शन गाडी घेण्यात आली, पण सध्या अयोग्य नियोजना मूळे पावती केलेल्या नागरिकाकडे तीन चार महिने गाडी पाठवली जात नाही, ही वस्तुतिथी आहे. लेखी सूचना करूनही गेले वर्षभर डास फवारणी, फॉगिंग करण्याचं काम बंद आहे. त्यामुळे शहरात पुन्हा डासांचा प्रादुर्भाव वाढलेला आहे आणि त्याच्या तक्रारी लोकाप्रतिनिधिंकडे येत आहेत, असे श्री. कांदळगावकर यांनी निदर्शनास आणून दिले आहे.

पार्किंग पासून फक्त ६०० रुपयांचं उत्पन्न

मालवण शहरात पर्यटकांचा ओघ बघता भरड या मध्यवर्ती ठिकाणी सुमारे ५ कोटी रुपयांचे मल्टीस्टोरेज पार्किंग प्रस्तावित केलं होतं. पण एवढा निधी एका वेळी उपलब्ध होऊ न शकल्याने या ठिकाणी सुमारे २५ लाख रुपये खर्च करून सध्या पार्किंग व्यवस्था करण्यात आली. पण या पार्किंगचे उदघाटन करण्यासाठी व्यापारी वर्गाला निवेदन द्यावे लागले. सहा महिन्यापूवी पार्किंगचे दर ठरविण्याबाबत आणि पार्किंगचे टेंडर करण्याबाबत लेखी पत्र देवूनही कुठलीही कार्यवाही करण्यात आली नाही. उदघाटन केल्यापासून आजमितीपर्यंत या ठिकाणी पार्किंगचा साधा बोर्ड पण लावला गेला नाही ही शोकांतिका आहे. त्यामुळे दिवाळी हंगामात या ठिकाणी फक्त पाच – सहा गाड्या पार्किंग करण्यात आल्या. आणि या पासून ६०० रुपये एवढं उत्पन्न मिळाले, हे विचार करण्यासारख आहे.

दिशादर्शक फलक चुकले ; फोवकांडा येथील कारंजाही बंद

पर्यटकाना सोईच्या दृष्टीने सुमारे २५ लाख रुपयाचे दिशादर्शक फलक बसवण्यात आलेले होते. पैकी काही दिशादर्शक फलक चुकीच्या पद्धतीने बसविण्यात आल्याने ते बदलून देणेबाबत किंवा त्याच्यावर कारवाई करण्याबाबत सूचना करूनही गेले वर्षभर ठेकेदाराकडुन कुठलीही कार्यवाही झाली नाही आणि प्रशासकडूनही ठेकेदारावर नोटीस देण्यापलिकडे कुठलीही कारवाई करण्यात आली नाही. त्याचा फटका दिवाळीसाठी आलेल्या पर्यटकांना सहन करावा लागला. मालवण शहरात अन्य ठिकाणी कारंजे बसविण्याचे प्रस्तावित करण्यात आल्याचे कळते. याबाबत अभिनंदन पण मालवण शहराच्या मध्यवर्ती ठिकाणी असलेले फोवकांडा पिंपळ येथील गार्डन सुशोभीत करून त्या ठिकाणी रंगीत कारंजा बसविण्यात आला होता. याठिकाणचा कारंजा गेले सहा महिने बंद अवस्थेत आहे, डेकोरेटिव्ह लाईट बंद आहेत, या दुरावस्थेकडे लक्ष दिला जात नसेल तर इतर ठिकाणी नवीन काम प्रस्तावित कशासाठी अशीही शंका महेश कांदळगावकर यांनी उपस्थित केली आहे.

आमच्या कालावधीत शहरात २० ते २५ ठिकाणी हायमास्ट बसविण्यात आले होते. पण आता त्यातील ८० % हायमास्टच्या लाईट गेले वर्षभर बंद आहेत. वारंवार सांगूनही ही कामे झालेली नाहीत हे भूषणावह नाही. चिवला बीच, मालवण जेट्टी येथे बसविण्यात आलेल्या डेकोरेटिव्ह लाईट पैकी बऱ्याचश्या लाईट गेले सहा महिने बंद आहेत. त्याकडे दुर्लक्ष झालेले आहे. शहरातील स्ट्रीट लाईटची परिस्थिती याहून भयानक आहे. त्या त्या भागातील लोकप्रतिनिधी स्वखर्चातून बऱ्याचश्या लाईट दुरुस्त करून बसवत आहेत, असे श्री. कांदळगावकर यांनी म्हटले आहे.

मालवण शहरात सुमारे १ कोटी ८० लाख रुपये किमतीचे सुसज्ज अशा भाजी मार्केटचे काम गेले सहा महिने बंद आहे. त्याचप्रमाणे मामा वरेरकर नाट्यगृह येथे सुमारे ७५ लाख रुपये किमतीच्या मल्टीपर्पज एसी हॉलचे काम पण बंद आहे. सुमारे २ कोटी रुपयांची अग्निशमन इमारत, ५० लाखाचे न. प. आवार सुशोभीकरण ही कामे महिनोंमहिने संथ गतीने सुरू आहेत. आमच्या कालावधीतील शहरासाठी महत्वाच्या सुमारे ४३ कोटी रुपयांची नवीन नळपाणी योजना, रेवतळे येथील प्रस्तावित १५ कोटी रुपयाचे मत्स्यालय, भुयारी गटर योजना बाबत ११ महिन्यात केलेल्या कामाच्या पाठपुराव्याची आणि सद्यस्थितीची माहिती जनतेपुढे ठेवणे अपेक्षित आहे.

फक्त नोटिसा, दंड ही प्रशासकीय प्रक्रिया राबवून कामे होणारी नाहीत. निवडणूक झाली नसल्याने अजूनही आमच्या कालावधीतील लोकप्रतिनिधीकडून जनता कामाच्या अपेक्षा ठेऊन आहे. आणि त्यांची काम करणे आमचं कर्तव्य आहे. पण मागचे १० महिने प्रशासकीय राजवट असल्याने प्रशासनात थेट हस्तक्षेप करण्यात आम्हाला मर्यादा येत आहेत. त्यामुळे जनतेची कामे होत नसतील तर आंदोलन करण्याची पाळी आमच्यावर येणार नाही याची काळजी मुख्याधिकारी यांनी घ्यावी. वरील कामकाजा बाबत सविस्तर निवेदन खासदार विनायक राऊत, आणि आमदार वैभव नाईक यांच्याकडे करणार आहोत. तसेच कामकाजात सुधारणा न झाल्यास प्रशासन प्रमुख म्हणून जिल्हाधिकारी यांच्या कडे दाद मागण्याचा पर्यायही आमच्याकडे खुला आहे, असे महेश कांदळगावकर यांनी म्हटले आहे.