१ नोव्हेंबरला बॉडी बिल्डिंगचा थरार; ७ नोव्हेंबरला नरकासुर स्पर्धेची रंगत
सावंतवाडी | प्रतिनिधी
भारतीय जनता पार्टी युवा मोर्चा, सावंतवाडी विधानसभा क्षेत्राच्या वतीने दीपावलीनिमित्त युवकांच्या शारीरिक तंदुरुस्तीला, क्रीडाभावनेला आणि पारंपरिक संस्कृतीला प्रोत्साहन देण्यासाठी भव्य बॉडी बिल्डिंग स्पर्धा आणि नरकासुर स्पर्धेचे आयोजन करण्यात आले आहे. युवकांनी निरोगी जीवनशैलीचा स्वीकार करावा, क्रीडा क्षेत्रात आपली क्षमता सिद्ध करावी आणि पारंपरिक उत्सवाचा वारसा जपावा, हा या उपक्रमामागील प्रमुख उद्देश आहे.
पंतप्रधान नरेंद्र मोदी यांच्या ‘फिट इंडिया’ संकल्पनेतून प्रेरणा घेत बॉडी बिल्डिंग स्पर्धेचे आयोजन करण्यात आले आहे. तर नरकासुर स्पर्धेच्या माध्यमातून दीपावलीच्या पारंपरिक उत्साहाला रंगत आणण्यासोबतच स्थानिक कलाकारांना आपले कलागुण सादर करण्याची संधी मिळणार आहे.
बॉडी बिल्डिंग स्पर्धेचा १ नोव्हेंबरला थरार
भव्य बॉडी बिल्डिंग स्पर्धा रविवार, १ नोव्हेंबर रोजी सायंकाळी ६ वाजता सावंतवाडी येथील जगन्नाथ उद्यान, मोती तलाव येथे होणार आहे. या स्पर्धेचे उद्घाटन भारतीय जनता पार्टीचे युवा नेते विशाल परब यांच्या हस्ते होणार आहे. प्रमुख पाहुणे म्हणून युवकांचे आधारस्तंभ विनोददादा राऊळ आणि सावंतवाडीचे उपनगराध्यक्ष अनिलजी निलवडेकर उपस्थित राहणार आहेत. या स्पर्धेचे विशेष आकर्षण म्हणजे गोव्याशी संबंधित तसेच दुबई येथेही कामगिरी केलेले आंतरराष्ट्रीय बॉडी बिल्डर निवेद शेटकर यांची उपस्थिती.
७ नोव्हेंबरला नरकासुर स्पर्धेची रंगत
दीपावलीच्या उत्सवाला अधिक रंगत आणणारी भव्य नरकासुर स्पर्धा शनिवार, ७ नोव्हेंबर रोजी सावंतवाडीतील मोती तलाव परिसरात, अमोल आईस्क्रीमसमोरील कॉर्नर येथे आयोजित करण्यात आली आहे. या स्पर्धेतून स्थानिक कलाकारांच्या सर्जनशीलतेला आणि कलागुणांना व्यासपीठ मिळणार असून, कोकणातील पारंपरिक सांस्कृतिक वारसा जपण्याचा प्रयत्न केला जाणार आहे. या दोन्ही उपक्रमांना भारतीय जनता पार्टीचे पदाधिकारी, युवा मोर्चाचे पदाधिकारी आणि कार्यकर्त्यांचे सहकार्य लाभणार आहे.
शारीरिक तंदुरुस्ती, क्रीडाभावना, सांस्कृतिक परंपरा आणि युवकांचा उत्साह यांचा संगम घडविणाऱ्या या दोन्ही स्पर्धांमध्ये नागरिक, क्रीडाप्रेमी आणि युवकांनी मोठ्या संख्येने सहभागी व्हावे, असे आवाहन भारतीय जनता पार्टी युवा मोर्चा, सावंतवाडी विधानसभा क्षेत्राच्या वतीने करण्यात आले आहे.
Subscribe to my channel
