कांदळगावात ठाकरे गटाला मोठा धक्का! - कोकण मिरर

सरपंच, उपसरपंचांसह अनेकांचा निलेश राणेंच्या नेतृत्वाखाली शिवसेनेत प्रवेश

हडी आणि कोळंबमधील युवकांचाही शिवसेनेत पक्षप्रवेश

रखडलेली विकासकामे मार्गी लावण्याचा आमदार निलेश राणेंचा शब्द

मालवण : कांदळगावात ठाकरे गटाला मोठा राजकीय धक्का बसला असून, उबाठा गटाचे सरपंच रणजित परब, उपसरपंच राजेंद्र कदम यांच्यासह अनेक पदाधिकारी आणि कार्यकर्त्यांनी आमदार निलेश राणे यांच्या नेतृत्वावर विश्वास व्यक्त करत शिवसेनेत जाहीर प्रवेश केला. याशिवाय हडी आणि कोळंब येथील युवा कार्यकर्ते व ग्रामस्थांनीही शिवसेनेचा भगवा हाती घेतला. या पक्षप्रवेशामुळे मालवण तालुक्यात शिवसेनेची ताकद वाढल्याचे चित्र निर्माण झाले आहे.

कांदळगाव येथे बोलताना आमदार निलेश राणे यांनी कांदळगावचे आराध्य दैवत श्री देव रामेश्वर यांचा उल्लेख करत जनतेच्या आशीर्वादाने मालवण-कुडाळच्या सर्वांगीण विकासासाठी आपले उर्वरित आयुष्य समर्पित असल्याचे सांगितले. विकासकामांचा झंझावात यापुढेही कायम राहील आणि कोणत्याही कामासाठी निधीची कमतरता भासू देणार नाही, अशी ग्वाही त्यांनी दिली.

कांदळगावातील साळकरवाडी ते राणेवाडी बंधारा-कम-रस्ता उभारणी, ग्रामपंचायतीसाठी अतिरिक्त शासकीय जागा, बहुउद्देशीय इमारत, क्रीडांगण आणि बचत गटांसाठी सभागृह अशा विविध मागण्या सरपंच रणजित परब यांनी मांडल्या. यावर आमदार राणे यांनी बंधाऱ्याचे सर्वेक्षण पूर्ण झाले असून अंदाजपत्रकही तयार असल्याचे सांगितले. हिवाळी अधिवेशनात हा प्रश्न उपस्थित करून शासनाकडून निधी उपलब्ध करून देण्यासाठी प्रयत्न करणार असल्याचे त्यांनी स्पष्ट केले. गावातील सर्व विकासकामे प्राधान्याने मार्गी लावण्याचा शब्दही त्यांनी दिला.

शिवसेना उपनेते संजय आंग्रे यांनी आमदार निलेश राणे यांच्या विकासाभिमुख नेतृत्वामुळे मालवण-कुडाळच्या विकासाला नवी दिशा मिळत असल्याचे सांगितले. तर जिल्हाप्रमुख दत्ता सामंत यांनी आमदारांच्या विकासकामांचा धडाका आणि विधानसभेतील आक्रमक भूमिकेमुळे शिवसेनेकडे प्रवेशाचा ओघ वाढत असल्याचा दावा केला. उबाठा गटाला गळती लागली असून आणखी अनेक पक्षप्रवेश प्रतीक्षेत असल्याचेही त्यांनी नमूद केले.

कांदळगावचे सरपंच रणजित परब, उपसरपंच राजेंद्र कदम, सदस्य अनघा कदम यांच्यासह सुशांत कांदळकर, संदीप परब, प्रणित परब, केशव परब, अक्षय परब, प्रथमेश परब, सत्कार पाटकर, रुपेश लाड, दिवेश परब, तुकाराम परब, रोहित परब, आनंद पाटकर, नंदकिशोर परब, स्वप्नील परब, उमेश परब, प्राजक्ता परब, काजल परब यांच्यासह अनेक कार्यकर्त्यांनी प्रवेश केला.

तर हडी लाडवाडी येथील सचिन लाड, सुनंदा लाड, प्रशांत लाड, प्रतिक्षा लाड, ओंकार काशीद, सुंदर लाड, सुगंधी लाड, सुनील लाड, स्मिता लाड, महेश लाड, मीनल लाड यांच्यासह कोळंब येथील युवा कार्यकर्त्यांनीही शिवसेनेत प्रवेश केला.

यावेळी शिवसेना उपनेते संजय आंग्रे, जिल्हाप्रमुख दत्ता सामंत, जिल्हा बँक संचालक बाबा परब, उपजिल्हाप्रमुख महेश राणे, विश्वास गावकर, अरविंद करलकर, तालुकाप्रमुख विनायक बाईत, मंदार लुडबे, शहरप्रमुख राजू बिडये यांच्यासह शिवसेनेचे पदाधिकारी, लोकप्रतिनिधी आणि कार्यकर्ते मोठ्या संख्येने उपस्थित होते.कांदळगाव, हडी आणि कोळंबमधील या पक्षप्रवेशामुळे मालवण तालुक्यात शिवसेनेचे राजकीय बळ वाढले असून, आगामी स्थानिक राजकारणात या घडामोडीचे पडसाद उमटण्याची शक्यता आहे.