किर्लोस मध्ये महिला बचत गटावर अन्याय ; रास्त धान्य दुकानाच्या परवान्यापासून ठेवले वंचित

अन्य एका महिला बचत गटाच्या नावे परवाना मंजूर करून संमतीपत्राने पुरुष व्यक्तीच्या नावे हस्तांतरित

महिला आयोगाकडे तदाद मागण्याचा साई महिला बचत गटाचा इशारा ; पुरवठा विभागाच्या कारभारावर संताप

कुणाल मांजरेकर : मालवण

केंद्र आणि राज्य सरकार दररोज महिला सबलीकरणाच्या योजना जाहीर करीत असताना अधिकारी वर्ग मात्र या योजना कागदावरच ठेवत असल्याचा प्रकार मालवण तालुक्यातील किर्लोस आमवणे गावात निदर्शनास आला आहे. येथील साई महिला बचत गटाला रास्त धान्य दुकानाच्या परवान्यापासून वंचित ठेवण्यात आले आहे. येथील रास्त धान्य दुकान क्र. ७४ दुसऱ्या एका महिला बचत गटाच्या नावे दाखवून मंडळ अधिकारी पोईप यांच्या कोर्टात संमतीपत्र करून पुरुष इसमाच्या नावे हस्तांतरित करण्यात आले आहे. हा प्रकार नियम आणि कायदे डावलून झाल्याचा आरोप साई महिला बचत गटाने केला असून याबाबतचे पुरावे देऊन देखील पुरवठा विभागाचे अधिकारी कारवाई करण्यास टाळाटाळ करीत आहेत. यातून महिला सबळीकरण योजना कागदावरच ठेऊन महिलांना मागे ठेवण्याचे काम निष्क्रीय अधिकारी व राजकीय कार्यकर्ते करत असल्याचा आरोप साई महिला बचतगट अध्यक्षा सौ. अमृता अमित लाड यांनी प्रसिध्दीपत्रकाव्दारे केला आहे.

याबाबत प्रसिद्धीस दिलेल्या पत्रकात म्हटले आहे की, महीला सबली करणासाठी महाराष्ट्र शासन महीला बचत गटांना प्राधान्याने मदत करण्याचे धोरण ठेवून महिलांच्या उपजीविके साठी विविध योजनेव्दारे निधी देत आहे. महाराष्ट्र शासनाने जि.पु.का./कार्या-2/ राधादु/ जाहीरनामा/०८/२०२० दि. ११ ऑगस्ट २०२० रोजी जाहीरनामा काढून आजमितीस रद्द असलेली किंवा रद्द होणारी व लोकसंख्या वाढीमुळे भविष्यातील नवीन रास्त भाव दुकाने प्रथम क्रमानूसार मंजुरी देण्याचे निर्देश दिले. त्यामध्ये महीला स्वयंसहाय्यता बचतगटांना प्राधान्य होते. किर्लोस आमवणे या गावातील दोन महीला बचत गटाकडून येथील रास्त धान्य दुकानासाठी परवाना मागणी अर्ज करण्यात आले. त्यानंतर जिल्हा पुरवठा अधिकारी ओरोस यांनी निवड समिती गठीत करुन परवाना मागणी प्रकरणे छाननी करताना बचत गटांची सर्व कागदपत्रे, शैक्षणिक पात्रता, बचत गटाचे व्यवहार लेखेजोगे, बॅंक बचत उलाढाल आदी अत्यावश्यक गोष्टी डावलून शिफारशीला प्राधान्य देऊन साक्षी बचत महीला गट आमवणे यांना रास्त भाव धान्य दुकान परवाना दिलेला होता. हा रास्त भाव धान्य दुकान सरकारमान्य परवाना दुकान क्र. ७४ साक्षी महीला बचत गटाने परस्पर मंडळ अधिकारी पोईप, ता. मालवण, जि. सिंधुदुर्ग यांच्या कोर्टात रजिस्टर क्र. ५६०/२०२१ दि. १५ डिसेंबर २०२१ नुसार त्रयस्थ पुरुष व्यक्तीला चालविण्यास दिला. अशाप्रकारे परवाना त्रयस्थ पुरुष इसमाला संमतीपत्राने हस्तांतरीत करून कायदेशीर नियमांचे व कायद्याचा भंग केलेला असल्याचा आरोप साई महिला बचत गटाने केला आहे.

या प्रकाराची संपूर्ण माहिती पुराव्यानिशी जिल्हाधिकारी सिंधुदुर्ग यांना देण्यात आली आहे. जिल्हा पुरवठा अधिकारी, ओरोस यांनी अर्जाची मंजूरी/निवड करण्यासाठी समिती नेमली होती. ही समिती नावापुरती होती. अगोदरच कुणाला परवाना द्यायचा ते ठरविण्यात आलेले होते. त्यामुळे दस्तऐवज छाननी झालेली नाही व खोटे अभिप्राय देऊन मनमानी करण्यात आली. या प्रकरण निहाय छाननीत समीतीचा अभिप्राय हा रकाना कारण न देता कोरा ठेऊन अपात्र केला. सर्व कागदपत्रे पुर्तता असताना परवाना मंजूरी बाबत तपासणी सुची मध्ये आर्थिक स्थिती व सर्व सभासदांची प्रतिज्ञापत्रे नाहीत, असा ढोबळ शेरा सुध्दा दिलेला आहे. हा अन्याय झाल्याने २८ ऑक्टोबर २०२० रोजी अन्यायग्रस्त साई स्वयंसहाय्यता महिला समुह बचत गट, आमवणे आमरण उपोषणाला बसले होते. साक्षी स्वयंसहाय्यता महिला समुह बचत गट स्वतः रेशनिंग दुकान चालवू शकत नाही. हे त्यांनी परस्पर संमती पत्र लिहून देऊन मान्य केलेले आहे. त्यामुळे त्या महीला बचत गटाला दिलेला परवाना रद्द करून इच्छुक साई स्वयंसहाय्यता महिला समुह बचत गटाला परवाना देणे आवश्यक होते. परंतु तसे न होता प्रशासन डोळेझाक करत साई स्वयंसहाय्यता महिला समुह बचत गटावर अन्याय करत आहे. तरी साक्षी महीला बचत गटाला दिलेला परवाना ताबडतोब रद्द करून आमवणे येथील साई स्वयंसहायता महीला बचत गटाला देण्यात यावा. तसेच संबधितांवर कठोर कारवाई व्हावी, अन्यथा महिला आयोगाकडे धाव घेण्याचा इशारा साई स्वयंसहाय्यता महिला समुह बचत गट तसेच सामाजिक कार्यकर्ते दिलीप राजाराम लाड, शशिकांत यशवंत खांदारे, अर्जुन (बाळा) लाड यांनी दिला आहे.