युवा नेते विशाल परब यांच्या पुढाकारातून सावंतवाडीत आधाराच्या काठ्या व जीवनावश्यक वस्तूंचे वाटप
सावंतवाडी : महाराष्ट्र भाजपाचे प्रदेशाध्यक्ष रविंद्र चव्हाण यांच्या वाढदिवसानिमित्त सावंतवाडी येथे सेवाभावाचा अनोखा उपक्रम राबविण्यात आला. महाराष्ट्र भाजपा युवा नेते विशाल परब यांच्या पुढाकाराने तसेच सावंतवाडी विधानसभा भाजपाच्या वतीने जनसंपर्क कार्यालयात अंध, अपंग व दिव्यांग बांधव-भगिनींना आधाराच्या काठ्या तसेच जीवनावश्यक वस्तूंचे वाटप करण्यात आले.
राजकारणासोबतच सामाजिक बांधिलकी जपण्याचा संदेश देणाऱ्या या उपक्रमाला दिव्यांग बांधवांचा उत्स्फूर्त प्रतिसाद मिळाला. मदतीचा हात मिळाल्यानंतर त्यांच्या चेहऱ्यावर उमटलेला आनंद आणि समाधान हेच या उपक्रमाचे खरे यश ठरले.
यावेळी बोलताना विशाल परब म्हणाले, “दिव्यांग बांधवांसाठी हे जनसंपर्क कार्यालय कायम खुले राहील. तुम्ही केव्हाही हाक द्या. तुमच्या अडचणीच्या काळात मी तुमच्यासाठी कायम उपलब्ध राहीन.” त्यांच्या या शब्दांतून दिव्यांग बांधवांच्या प्रश्नांसाठी सातत्याने पाठपुरावा करण्याची ग्वाही देण्यात आली.
दरम्यान, भाजपा जिल्हा उपाध्यक्ष प्रसन्ना देसाई यांनी विशाल परब यांच्या सामाजिक कार्याचा संदर्भ देताना एक भावनिक आठवण सांगितली. विशाल परब यांच्या सुविद्य पत्नी यांनीदेखील यावर्षी आपला वाढदिवस केवळ कुटुंबीयांसोबत साजरा न करता दिव्यांग बांधवांसोबत साजरा केला. त्यामुळे परब परिवाराचा दिव्यांग बांधवांशी असलेला जिव्हाळा, आपुलकी आणि सामाजिक बांधिलकी यामधून अधोरेखित होत असल्याचे त्यांनी सांगितले.
या कार्यक्रमाला भाजपा जिल्हा उपाध्यक्ष प्रसन्ना देसाई, दिव्यांग संघटनेचे अध्यक्ष अनिल शिंगाडे, केतन आजगांवकर, धिरेंद्र म्हापसेकर, सिद्धार्थ भांबूरे, गोविंद साटेलकर, बंटी जामदार आदी मान्यवर उपस्थित होते.मोठ्या संख्येने दिव्यांग बांधव-भगिनी या उपक्रमात सहभागी झाले. वाढदिवसाचा खर्च केवळ उत्सवावर न करता गरजूंच्या चेहऱ्यावर आनंद फुलविण्यासाठी वापरण्याची परंपरा अधिक व्यापक व्हावी, या भावनेतून हा उपक्रम राबविण्यात आला.
Subscribe to my channel
