तोंडवळी तळाशिल ग्रामस्थांकडून आमदार निलेश राण आणि प्रशासनाची दिशाभूल करण्याचा प्रयत्न : रेवंडी ग्रामस्थांचा आरोप
मालवण | कुणाल मांजरेकर
अनधिकृत वाळू उपशावरून मालवण तालुक्यातील तोंडवळी व रेवंडी ग्रामस्थ आमने सामने उभे ठाकले आहेत. तोंडवळी ग्रामपंचायतीच्या ग्रामसभेत अनधिकृत वाळू व्यवसाय बंद करण्याचा ठराव घेऊन चोवीस तास उलटले नाहीत तोपर्यंत तोंडवळी किनारीच पंचवीस ते तीस अनधिकृत बोटीतून वाळू उत्खनन होत असल्याचा आरोप रेवंडी ग्रामस्थांनी केला आहे. तोंडवळी तळाशिल ग्रामस्थांकडून आमदार निलेश राणे आणि प्रशासनाची दिशाभूल करण्याचा प्रयत्न होत असल्याचे रेवंडी ग्रामस्थानी म्हटले आहे.
याबाबत प्रसिद्धी पत्रकात म्हटले आहे की, काही दिवसांपूर्वीच तळाशील तोंडवळी ग्रामस्थ अनधिकृत वाळू उपसा विरोधात आक्रमक झाल्याचे दिसले होते. महिला आंदोलकांनी तर खाडीत उतरून आंदोलनाचा पवित्रा उचलला होता. त्यामुळे सदर उपोषणस्थळी आमदार निलेश राणे यांनी भेट घेऊन समाधानकारक आश्वासन दिल्यामुळे तळाशील तोंडवळी ग्रामस्थांकडून उपोषण मागे घेण्यात आले होते. संबंधित वाळू पट्ट्यात लिलाव लागू नये व अनधिकृत वाळू उपसा बंद व्हावा याकरिता दिनांक २२ एप्रिल रोजी तोंडवळी ग्रामपंचायत येथे ग्रामसभा पार पडली व या ग्रामसभेत तोंडवळी ग्रामस्थांकडून वाळू उपसा विरोधात एकमुखी ठराव घेण्यात आला. मात्र ठराव पार पडल्यानंतर चोवीस तास झाले नाहीत तोपर्यंत सुमारे पंचवीस तीस बोटी वाळू काढताना तोंडवळी येथे निदर्शनास आल्या. त्यामुळे ठराव घेऊन फक्त दिखावेगिरी करून आमदार आणि प्रशासनाची दिशाभूल करत असल्याचा आरोप रेवंडी ग्रामस्थांनी केला आहे.
रेवंडी गावात अनधिकृत वाळू व्यवसाय चालू आहे असे खोटे सांगून स्वतः तळाशील तोंडवळी गावात असे अनधिकृत वाळू धंदे चालू असल्याचे त्यांनी म्हटले आहे. कालच आम्ही अधिकृत लिलाव लागण्यासाठी जिल्हाधिकारी यांची भेट घेतली असून तोंडवळी तळाशील मधील अनधिकृत वाळू व्यवसायावर तातडीने कारवाई न झाल्यास आमरण उपोषण पुकारण्याचा इशारा दिला आहे. यावेळी माजी सरपंच युवराज कांबळी, ग्रामपंचायत उपसरपंच श्रद्धा वेंगुर्लेकर, ग्रामपंचायत सदस्य मेघना कांबळी, सचिन मोर्वेकर, भावेश कांबळी, बंटी तळाशीलकर सशांक तळाशीलकर, विजय कांबळी, मिलिंद कांबळी, स्वाती कांबळी, राकेश निवतकर व ग्रामस्थ उपस्थित होते.
Subscribe to my channel
