पालकमंत्री नितेश राणेंच्या सूचनेनंतर प्रशासनाची तातडीची कारवाई; गणेशोत्सवाच्या दिवशी हायमास्ट कार्यान्वित
कणकवली : मुंबई–गोवा महामार्गावरील हळवल फाटा येथील कुप्रसिद्ध आणि धोकादायक वळण अखेर हायमास्टच्या प्रकाशाने उजळले आहे. रात्रीच्या अंधारामुळे अपघातांना निमंत्रण देणाऱ्या या ठिकाणी प्रकाश व्यवस्था करण्याची मागणी सातत्याने होत होती. अखेर पालकमंत्री नितेश राणे यांच्या सूचनेनंतर प्रशासनाने तातडीने कार्यवाही करत हायमास्ट कार्यान्वित केला. विशेष म्हणजे, गणेशोत्सवाच्या दिवशीच हा परिसर प्रकाशमय झाल्याने वाहनचालकांना मोठा दिलासा मिळाला आहे.
हळवल फाटा येथील वळण हे महामार्गावरील अपघातप्रवण ठिकाण म्हणून ओळखले जाते. रात्रीच्या वेळी या भागात पुरेसा प्रकाश नसल्याने वाहनचालकांना वळणाचा अंदाज घेणे, समोरून येणारी वाहने ओळखणे आणि रस्त्याची स्थिती लक्षात घेणे कठीण जात होते. परिणामी या ठिकाणी किरकोळ अपघातांपासून गंभीर दुर्घटनांपर्यंतच्या घटना घडत होत्या.काही दिवसांपूर्वी याच धोकादायक वळणावर अपघाताची घटना घडल्यानंतर पुन्हा एकदा येथील प्रकाश व्यवस्थेचा प्रश्न ऐरणीवर आला. गणेशोत्सवाच्या काळात मुंबई, पुणे तसेच राज्याच्या विविध भागांतून मोठ्या संख्येने चाकरमानी कोकणात येत असल्याने महामार्गावरील वाहतूक मोठ्या प्रमाणात वाढली आहे. त्यामुळे हळवल फाट्यावरील धोकादायक वळण अधिक सुरक्षित करण्याची गरज निर्माण झाली होती.
ही बाब लक्षात घेऊन पालकमंत्री नितेश राणे यांनी संबंधित प्रशासनाला तातडीने हायमास्ट उभारण्याच्या सूचना दिल्या. त्यानंतर प्रशासनाने वेगाने कार्यवाही करत हायमास्टची उभारणी पूर्ण केली आणि गणेश चतुर्थीच्या दिवशीच तो कार्यान्वित करण्यात आला.हायमास्टच्या प्रकाशामुळे आता रात्रीच्या वेळी हळवल फाट्यावरील वळण स्पष्टपणे दिसणार आहे. त्यामुळे वाहनचालकांना वेग नियंत्रित करून सुरक्षितपणे वळण घेणे शक्य होणार असून, अपघाताचा धोका कमी होण्यास मदत होणार आहे. गणेशोत्सवाच्या गर्दीच्या काळात ही उपाययोजना विशेष महत्त्वाची ठरणार आहे. चाकरमान्यांच्या सुरक्षित प्रवासासाठी धोकादायक ठिकाणी तातडीने प्रकाश व्यवस्था करण्यात आल्याने स्थानिक ग्रामस्थ आणि वाहनचालकांकडून समाधान व्यक्त होत आहे.
Subscribe to my channel
