हरी खोबरेकरांचा नितेश राणेंवर थेट आरोप; आ. निलेश राणे यांच्या भूमिकेवर सवाल
पारंपरिक मच्छीमारांच्या उपजीविकेवर घाला घालणाऱ्या बोटींवर कारवाईचे दिले आव्हान
मालवण : सिंधुदुर्गच्या समुद्रात पर्ससीन आणि एलईडी मासेमारीवरून पारंपरिक मच्छीमारांचा संघर्ष तीव्र होत असताना, बेकायदेशीर मासेमारी करणाऱ्यांना अभय कोणाचे, असा थेट सवाल ठाकरे शिवसेनेचे तालुकाप्रमुख हरी खोबरेकर यांनी उपस्थित केला आहे. देवगड बंदरात पर्ससीन आणि बेकायदेशीर एलईडी बोटींना आश्रय दिला जात असल्याचा आरोप करत त्यांनी मत्स्योद्योग मंत्री तथा पालकमंत्री नितेश राणे यांच्यावर निशाणा साधला. तसेच आमदार निलेश राणे यांच्यावर देखील त्यांनी टीका केली.
येथील ठाकरे शिवसेना कार्यालयात आयोजित पत्रकार परिषदेत खोबरेकर यांनी मत्स्यव्यवसाय विभागाच्या कार्यपद्धतीवर प्रश्नचिन्ह उपस्थित केले. यावेळी शहरप्रमुख बाबी जोगी, नगरसेवक महेंद्र म्हाडगुत, तपस्वी मयेकर, स्वप्नील आचरेकर, उमेश मांजरेकर, किरण चव्हाण, उमेश चव्हाण, हेमंत मोंडकर, दीपा शिंदे आणि सुरेश मडये आदी उपस्थित होते.
मंत्री जिल्ह्याचे, पण मच्छीमारांचे प्रश्न अनुत्तरित!
राज्यात गेल्या अडीच वर्षांपासून सत्ता असताना आणि सिंधुदुर्ग जिल्ह्याला मत्स्योद्योग मंत्री लाभलेले असतानाही मत्स्यव्यवसाय विभागाला सुसज्ज, अत्याधुनिक गस्ती नौका का मिळाली नाही? अवैध मासेमारीला आळा घालण्यासाठी स्वतंत्र अंमलबजावणी कक्ष का स्थापन केला जात नाही? असा सवाल खोबरेकर यांनी केला. पालकमंत्री विदर्भातील तलावांची पाहणी करतात, दौरे करतात आणि मच्छीमारांचे उत्पन्न चार पटीने वाढल्याचे सांगतात. मात्र, सिंधुदुर्गातील पारंपरिक आणि रापण व्यावसायिक मच्छीमारांची प्रत्यक्ष परिस्थिती काय आहे? यंदाची दिवाळी या कष्टकरी मच्छीमारांनी कशी साजरी करायची, असा सवालही त्यांनी उपस्थित केला.
१२ नॉटिकल मेलच्या नियमांचा गैरवापर?
महाराष्ट्राच्या सागरी हद्दीबाहेर मासेमारीसाठी असलेल्या ‘एक्सेस पास’च्या तरतुदीचा आधार घेऊन काही स्थानिक व परप्रांतीय पर्ससीन आणि एलईडीधारक बोटी ४ ते ५ नॉटिकल माईलच्या आत घुसखोरी करत असल्याचा आरोप खोबरेकर यांनी केला. “पारंपरिक मच्छीमारांच्या हक्काची मासळी ओरबाडून नेली जात आहे. त्यामुळे समुद्रात संघर्षाची परिस्थिती निर्माण होत आहे. अवैध मासेमारी करणाऱ्या बोटी रोखण्याचा प्रयत्न करणाऱ्या पारंपरिक मच्छीमारांवरच गुन्हे दाखल होत असतील, तर कायद्याची अंमलबजावणी नेमकी कोणासाठी?” असा सवाल त्यांनी केला.
मच्छीमारांना आरोपीच्या पिंजऱ्यात उभे करता, मग अवैध बोटींवर कारवाई का नाही?
पर्ससीन आणि एलईडी मासेमारी करणाऱ्यांवर कठोर कारवाई करण्याऐवजी पारंपरिक मच्छीमारांनाच आरोपी ठरवले जात असल्याचा आरोप करत खोबरेकर यांनी प्रशासनाच्या भूमिकेवर टीका केली. अवैध मासेमारीचे प्रकार सुरू असल्याचा आरोप होत असताना संबंधित बोटींवर ठोस कारवाई का होत नाही, असा सवालही त्यांनी उपस्थित केला.
आमदार निलेश राणे गप्प का?
मालवण-कुडाळचे आमदार निलेश राणे यांच्यावरही खोबरेकर यांनी निशाणा साधला. “मतदारसंघातील पारंपरिक मच्छीमारांची बाजू आमदार ठामपणे मांडतील, अशी अपेक्षा होती. मात्र, गेल्या १५ दिवसांत त्यांनी या विषयावर भूमिका मांडल्याचे दिसले नाही. कष्टकरी मच्छीमारांवरच चोरीचे आरोप होत असताना आमदार गप्प का?” असा सवाल त्यांनी उपस्थित केला.
देवगड बंदरातील बोटींवर धडक कारवाईचे आव्हान
सिंधुदुर्ग जिल्ह्यात पर्ससीनचा एकही वैध परवाना शिल्लक नसल्याचा दावा करत खोबरेकर यांनी बंदरातील संबंधित व्यवसायांच्या वैधतेबाबत प्रश्न उपस्थित केला. देवगड बंदरात अनधिकृत बोटींना आश्रय आणि अभय दिले जात असल्याचा आरोपही त्यांनी केला. “आमचा आरोप खोटा असेल, तर मत्स्योद्योग मंत्री आणि पालकमंत्र्यांनी तातडीने संबंधित बोटींची परवाने व कागदपत्रे तपासावीत आणि नियमभंग आढळल्यास कठोर कारवाई करून दाखवावी. पारंपरिक मच्छीमारांच्या उपजीविकेचा प्रश्न आता तरी गांभीर्याने घ्यावा,” असे आव्हान हरी खोबरेकर यांनी दिले.
Subscribe to my channel
