भोसले सैनिक स्कूलचे आयोजन : सिंधुदुर्ग जिल्ह्यासह गोवा राज्यातील विद्यार्थ्यांचा सहभाग
सावंतवाडी : सिंधुदुर्ग जिल्ह्यात प्रथमच भोसले नॉलेज सिटी येथे पार पडलेल्या ज्युनिअर ट्रायथलॉन चॅम्पियनशिप २०२६ ला विद्यार्थी, पालक आणि क्रीडाप्रेमींचा उत्स्फूर्त प्रतिसाद मिळाला. या स्पर्धेत सिंधुदुर्ग जिल्ह्यासह गोवा राज्यातील अनेक विद्यार्थ्यांनी सहभाग नोंदवून स्पर्धेची रंगत वाढवली.
रनिंग, सायकलिंग आणि रायफल शूटिंग या तीन क्रीडा प्रकारांचा समावेश असलेल्या या स्पर्धेत स्पर्धकांची वेग, सहनशक्ती, एकाग्रता आणि अचूकता यांची कसोटी लागली. तिन्ही प्रकारांतील एकत्रित गुणांच्या आधारे विजेते निश्चित करण्यात आले. विविध वयोगटांमध्ये आयोजित या स्पर्धेने लहान वयातील खेळाडूंना आपल्या सर्वांगीण क्रीडा कौशल्याचे प्रदर्शन करण्याची संधी उपलब्ध करून दिली.
सायकलिंग स्पर्धेने सुरुवात झाल्यानंतर रनिंग आणि रायफल शूटिंगचे सामने रंगले. प्रत्येक स्पर्धकाने जिद्द, चिकाटी आणि आत्मविश्वासाचे दर्शन घडवत आपली सर्वोत्तम कामगिरी सादर केली. पालकांचा उत्साहवर्धक प्रतिसाद आणि स्पर्धकांनी खिलाडूवृत्तीने घेतलेला सहभाग हे या स्पर्धेचे विशेष आकर्षण ठरले.
स्पर्धेचा निकाल पुढीलप्रमाणे – ८ ते १० वर्षे (मुली) स्पृहा भूषण नार्वेकर – प्रथम, काव्या अर्जुन राऊळ – द्वितीय, अमारा बिर्ला – तृतीय. ८ ते १० वर्षे (मुलगे) अंश राजेश राऊळ – प्रथम, आराध्य राजन गोवेकर – द्वितीय, अधृत स्नेहल गावेकर – तृतीय. ११ ते १४ वर्षे (मुली) मैथिली सचिन गावडे – प्रथम, आस्था अमित लिंगवत – द्वितीय, सौम्या दत्ताराम मेस्त्री – तृतीय. ११ ते १४ वर्षे (मुलगे) करण आनंद गवळी – प्रथम, दत्ताराम प्रवीण गवस – द्वितीय, रुद्रवीर आदर्श सैनी – तृतीय
बक्षीस वितरण समारंभ भोसले नॉलेज सिटीचे सीईओ तथा भोसले सैनिक स्कूलचे कमांडंट ले.कर्नल रत्नेश सिन्हा (नि.) आणि यशवंतराव भोसले सैनिक स्कूलच्या मुख्याध्यापिका प्रियांका देसाई यांच्या उपस्थितीत पार पडला. विजेत्या विद्यार्थ्यांना रोख पारितोषिके, आकर्षक ट्रॉफी आणि प्रमाणपत्रे प्रदान करण्यात आली. यावेळी मान्यवरांनी विद्यार्थ्यांच्या क्रीडा कौशल्याचे कौतुक करत नियमित सराव, शिस्त आणि आत्मविश्वास यांच्या बळावर राष्ट्रीय तसेच आंतरराष्ट्रीय स्तरावर यश संपादन करण्याचे आवाहन केले.
Subscribe to my channel
