सत्यनारायणाच्या पूजेवर “स्वातंत्र्याचा अमृत महोत्सव” फिव्हर !
मालवण मधील बाबू धुरी यांच्याकडील मखर सोशल मीडियावर व्हायरल
मालवण | कुणाल मांजरेकर
स्वातंत्र्याच्या अमृत महोत्सवा निमित्त यंदा विविध कार्यक्रम साजरे केले जात आहेत. यंदाच्या गणेशोत्सवावर देखील स्वातंत्र्याच्या अमृत महोत्सवाचा फिव्हर पाहायला मिळाला आहे. मालवण धुरीवाडा येथील काळबादेवी मंडप डेकोरेटर्सचे प्रोप्रायटर बाबू धुरी यांच्या निवासस्थानी शनिवारी आयोजित श्री सत्यनारायणाच्या पूजेच्या मखरासाठी भारताच्या नकाशाची प्रतिकृती साकारण्यात आली होती. हे मखर शहरासह सोशल मीडियावर देखील औत्सुक्याचा विषय ठरले होते.
भारतीय स्वातंत्र्याचा अमृत महोत्सव यावर्षी विविध उपक्रमांनी साजरा होत आहे. या निमित्ताने वेगवेगळे कार्यक्रम करून प्रत्येक जण आपले देशप्रेम दाखवून देत असून गणेशोत्सवावर देखील याचा फिव्हर पाहायला मिळाला आहे.
मालवण मधील काळबादेवी मंडप डेकोरेटर्सचे प्रोप्रायटर बाबू धुरी यांच्या निवासस्थानी शनिवारी गणेशोत्सवा निमित्ताने आयोजित सत्यनारायणाच्या पूजेसाठी भारताच्या नकाशाची प्रतिकृती मखर म्हणून बनवण्यात आली होती. धुरीवाडा येथील प्रल्हाद मेस्त्री यांनी हे मखर बनवले होते. शनिवारी सोशल मीडियावर हे मखर चांगलेच व्हायरल झाले होते. अनेकांनी या मखरा सोबत सेल्फीही घेतली.
