आमदार निलेश राणे यांच्या उपस्थितीत नियुक्तीची घोषणा; शहरात संघटनात्मक बळ वाढविण्याचे आव्हान
मालवण : कट्टर राणे समर्थक तथा येथील सामाजिक कार्यकर्ते, युवा उद्योजक राजू बिडये यांची शिवसेनेच्या मालवण शहरप्रमुखपदी नियुक्ती करण्यात आली आहे. आमदार निलेश राणे यांच्या उपस्थितीत जिल्हाप्रमुख दत्ता सामंत यांनी त्यांच्या नियुक्तीची घोषणा केली. या नियुक्तीमुळे मालवण शहरात पक्षाची संघटनात्मक बांधणी अधिक मजबूत करण्याच्या दृष्टीने महत्त्वाचे पाऊल पडल्याचे मानले जात आहे.
राजू बिडये हे कट्टर राणे समर्थक असून गेल्या अनेक वर्षांपासून विविध सामाजिक उपक्रमांमध्ये सक्रिय आहेत. रक्तदान चळवळ, आरोग्यविषयक उपक्रम, सांस्कृतिक कार्यक्रम तसेच क्रीडा क्षेत्रातील योगदानामुळे त्यांची विशेष ओळख आहे. सर्वसामान्यांच्या प्रश्नांसाठी कार्यरत राहण्याचा त्यांचा अनुभव लक्षात घेऊन पक्षाने त्यांच्यावर शहर संघटनेची जबाबदारी सोपविली आहे. यापूर्वी ते शहर संघटक होते. आता त्यांची थेट शहरप्रमुख पदावर नियुक्ती करण्यात आली आहे.
राजू बिडये हे वीज वितरण कंपनीतील सेवानिवृत्त अधिकारी कै. दादा बिडये यांचे चिरंजीव आहेत. सामाजिक क्षेत्रातील अनुभव आणि विविध स्तरांवरील जनसंपर्काच्या बळावर शहरात पक्षाची संघटना अधिक व्यापक करण्याची जबाबदारी आता त्यांच्यावर असेल.
शहरातील विविध प्रभागांमध्ये पक्षाचा संपर्क वाढविणे, तळागाळातील कार्यकर्त्यांना सक्रिय करणे आणि युवकांना संघटनेशी जोडणे, या बाबींवर राजू बिडये यांना भर द्यावा लागणार आहे. तसेच नागरिकांच्या स्थानिक प्रश्नांची दखल घेऊन ते सोडविण्यासाठी प्रभावीपणे काम करण्याचे आव्हानही त्यांच्यासमोर असेल. राजू बिडये यांच्या नियुक्तीचे पक्षाचे पदाधिकारी, कार्यकर्ते यांच्याकडून स्वागत करण्यात येत आहे.
आमदार निलेश राणे यांच्या मार्गदर्शनाखाली आणि जिल्हाप्रमुख दत्ता सामंत यांच्या नेतृत्वाखाली मालवण शहरात शिवसेनेची संघटना अधिक मजबूत करण्यासाठी प्रयत्नशील राहणार असल्याची भूमिका राजू बिडये यांनी यावेळी व्यक्त केली.
Subscribe to my channel
