… अन् “त्या” गायीच्या वेदनामुक्तीसाठी सरसावले मालवण !
पायाचे खुर वाढल्याने गायीला सुरू होत्या वेदना ; उपचारानंतर पायाला नवे बळ
फेसबुक पोस्टनंतर “१०० इडियट्स” ग्रुपसह सामाजिक कार्यकर्त्यांचा पुढाकार
कुणाल मांजरेकर
मालवण : एकीकडे सोशल मीडियाचा अतिवापर हा सामाजिक स्वास्थ्यासाठी चिंताजनक मानला जात असतानाच हेच माध्यम समाजासाठी दिशादर्शक ठरू शकते हे दाखवून दिलंय सूज्ञ मालवणकरांनी ! शहरात पायाचे खुर वाढलेली एक गाय असह्य वेदनेने अनेक दिवस विव्हळत फिरत असल्याची पोस्ट फेसबुकवर शेअर झाल्यानंतर मालवणमध्ये सामाजिक कार्यासाठी प्रसिद्ध असलेल्या “१०० इडियट्स” व्हॉट्सअप ग्रुपने पुढाकार घेत अन्य सामाजिक कार्यकर्त्यांच्या मदतीने रविवारी या गायीवर उपचार करून घेतले. त्यामुळे या गायीच्या पायाला नवे बळ मिळाले. या घटनेनंतर जागृत मालवणकरांचं सर्वत्र कौतुक होत आहे.
मालवण शहरात मागील अनेक दिवस एक गाय पायाचे खुर वाढल्याने असह्य वेदना घेऊन फिरत असल्याचे दिसून येत होते. याबाबत शनिवारी येथील व्यापारी हेमचंद्र कोयंडे यांनी फेसबुकवर पोस्ट करीत या गायीला उपचार आवश्यक असून या गायीला काही मदत करता येईल का ? असा सवाल उपस्थित केला होता. ही पोस्ट पाहिल्यावर अनेकांनी या गायीवर उपचार करण्यासाठी पुढे येण्याची तयारी दाखवली.
“१०० इडियट्स” व्हॉट्सअप ग्रुपचे सदस्य पोलीस कर्मचारी सुशांत पवार, सचिन मोर्वेकर ग्रुपचे ऍडमीन सिझर डीसोजा, अमेय देसाई, राजाशंकरदास यांनी याबाबत चर्चा घडवित त्या गायीला वेदनामुक्त करण्यासाठी पुढाकार घेतला. या गायीच्या जन्मावेळी पायाचे गेळे कापले गेले नाहीत. त्यामुळे या गायीला चालताना वेदना होऊ लागल्या. त्यामुळे संवेदना हरवलेल्या गायीच्या मालकाला चपराक देण्यासाठी आणि प्राणी प्रेम दाखवून देण्याकरीता धर्म, पंथ विसरुन हा ग्रुप पुढे सरसावला. अनेक सामाजिक कार्यकर्त्यानी देखील याकामी सहकार्याचा हात घेतला. रविवारी सकाळी दिलावर पटेल आणि वैभव मेस्त्री यांच्या सहकार्याने या गाईवर उपचार करण्यात आले. त्यानंतर औषधोपचार करून सायंकाळी या गाईला सोडून देण्यात आले.
सोशल मीडिया वरील एखाद्या पोस्टने एका मुक्या प्राण्याला मदत करून “१०० इडियट्स” व्हॉट्सअप ग्रुपसह अनेक मालवणकरांनी आपल्या मधील माणुसकीचं दर्शन घडवले, अशा माणुसकी जपणाऱ्या योद्ध्याना मानाचा मुजरा, अशी प्रतिक्रिया हेमचंद्र कोयंडे यांनी व्यक्त केली आहे.
