काय ते मालवण… काय ते गटार… काय त्या व्हाळ्या… काय ते रस्त्यावरचं पाणीच पाणी ! Okk मध्ये !

मालवण शहरातील गटार, व्हाळी खोदाईचं बिंग पुन्हा फुटलं ; प्रशासनाचा कारभार चव्हाट्यावर

मुख्याधिकारी संपर्क क्षेत्राबाहेर, गटारे ठेकेदार नॉट रिचेबल ; तर सुपरवायझर फ्लॅटवर सुशेगात

रस्त्यावरच्या पाण्याचा निचरा करण्यासाठी माजी नगराध्यक्ष, माजी नगरसेवकांचा पुढाकार

कुणाल मांजरेकर

मालवण : मालवण नगरपरिषदेच्या प्रशासकीय राजवटीत शहरात करण्यात आलेल्या सदोष गटार आणि व्हाळी खोदाईची सोमवारच्या पावसात पुन्हा एकदा पोलखोल झाली आहे. रस्त्यावरील पाण्याचा निचराच होत नसल्याने सोमवारी मुसळधार पावसात शहरातील सर्वच रस्ते पाण्याखाली गेल्याचे पाहायला मिळाले. दरम्यान, शहरातील सदोष गटार खोदाईचा प्रश्न चव्हाट्यावर आला असताना मुख्याधिकारी तथा प्रशासक संतोष जिरगे संपर्क क्षेत्राबाहेर होते. गटारांचा ठेका घेतलेला ठेकेदार नॉट रिचेबल तर त्याचा सुपरवायझर स्वतःच्या फ्लॅटवर सुशेगाद होता. त्यामुळे रस्त्यावरील पाण्याचा निचरा करण्यासाठी माजी नगराध्यक्ष महेश कांदळगावकर आणि माजी बांधकाम सभापती यतीन खोत यांनी पुढाकार घेतला. पालिका प्रशासनाच्या भोंगळ कारभाराबाबत यावेळी माजी नगराध्यक्ष महेश कांदळगावकर यांनी तीव्र नाराजी व्यक्त केली.

मालवण शहरातील सदोष गटार आणि व्हाळ्यांच्या प्रश्नावरून माजी उपनगराध्यक्ष राजन वराडकर, भाजपचे गटनेते गणेश कुशे यांनी सातत्याने आवाज उठवला आहे. मध्यंतरी पत्रकारांना घेऊन त्यांनी शहरातील गटार आणि व्हाळ्या खोदाईची पोलखोल केली होती. या पार्श्वभूमीवर शहरातील गटार खोदाई बाबत आमदार वैभव नाईक यांनी एक महिन्यापूर्वी पालिकेत बैठक घेऊन सूचना करूनही प्रशासनाच्या वतीने योग्य कार्यवाही झाली नाही. शहरातील सर्वच रस्ते पाण्याखाली गेले असून याबाबत आमदार वैभव नाईक यांच्याकडे तक्रार करणार असल्याचे कांदळगावकर यांनी म्हटले आहे.

प्रशासनाच्या कारभारावर नागरिकांतून नाराजी

गटार खोदाईसाठी पालिकेने नाशिकच्या ठेकेदाराला लाखो रुपयांचा ठेका दिला. मात्र अनेक गटारांची खोदाई झाली नाही. याबाबत नागरिक, लोकप्रतिनिधी यांनी तक्रारी करूनही त्याची दखल प्रशासनाने घेतली नाही. त्यामुळे गटार खोदाई न झाल्याने मालवण शहर जलमय बनले. काही ठिकाणी दुकानात व घरात पाणी घुसल्याची स्थिती होती. पालिका प्रशासनाच्या कारभाराबाबत नागरिकांतून संताप व्यक्त केला जात आहे.

मागील वर्षी तोक्ते वादळ, सगळीकडे पडझड, मुसळधार पाऊस अशी स्थिती असतानाही गटार खोदाई काम योग्य प्रकारे झाले. त्या आपत्ती काळात सर्वच लोकप्रतिनिधीनी सेवाकार्य केले. यतीन खोत यांनी तर यंत्रसामग्री व आवश्यक ते सहकार्य वेळोवेळी उपलब्ध करत गटार, व्हाळी आदी पाण्याचे प्रवाह सुरळीत करण्यात महत्त्वाचे योगदान दिले. त्यानंतर आजही रस्त्यावर उतरून यतीन खोत यांनी पालिका कामगारांना घेऊन तुंबलेली गटारे मोकळी केली. मात्र पालिका प्रशासनाने ज्यांना ठेका दिला ती यंत्रणा कुठेच नव्हती. मालवण शहरात जलमय स्थिती निर्माण करण्यास कारणीभूत असणाऱ्या ठेकेदारावर कारवाई व्हावी. प्रशासनाच्या माध्यमातून त्याचे बिल अदा होऊ नये. याबाबत तक्रार आमदार यांच्याकडे करणार असल्याचे नगराध्यक्ष महेश कांदळगावकर यांनी सांगितले.

माजी उपनगराध्यक्षांचे नगराध्यक्षांनी केले समर्थन

मालवण नगरपालिकेचे माजी उपनगराध्यक्ष राजन वराडकर यांनीही अर्धवट गटार खोदाई बाबत वेळोवेळी आवाज उठवला होता. त्यांनी मांडलेली भूमिका योग्यच होती हे मालवण शहरातील तुंबलेली गटारे व जलमय स्थितीवरून स्पष्ट होते. याबाबत कांदळगावकर यांना विचारले असता वराडकर यांची भूमिका योग्यच असल्याचे ते म्हणाले.