कर्नल अजय राज यांचे विद्यार्थ्यांना मार्गदर्शन
सावंतवाडी : यशवंतराव भोसले इन्स्टिट्यूट ऑफ टेक्नॉलॉजीमध्ये (YBIT) लवकरच एनसीसी युनिट सुरू करण्यात येणार आहे. या पार्श्वभूमीवर एनसीसी बटालियन ५८, सिंधुदुर्गचे कमांडिंग ऑफिसर कर्नल अजय राज यांनी महाविद्यालयाला भेट देत विद्यार्थ्यांना एनसीसीच्या विविध पैलूंविषयी मार्गदर्शन केले.
कर्नल अजय राज यांनी यापूर्वी भारतीय लष्कराच्या ११ कुमाऊं रेजिमेंटमध्ये सेवा बजावली आहे. संस्थेचे सीईओ लेफ्टनंट कर्नल डॉ. रत्नेश सिन्हा आणि महाविद्यालयाचे प्राचार्य डॉ. रमण बाणे यांनी त्यांचे स्वागत केले.विद्यार्थ्यांशी संवाद साधताना कर्नल अजय राज यांनी एनसीसीची स्थापना, उद्दिष्टे, कार्यपद्धती तसेच एनसीसीच्या माध्यमातून विद्यार्थ्यांना उपलब्ध होणाऱ्या विविध संधी आणि फायदे यांची माहिती दिली. एनसीसीमुळे विद्यार्थ्यांमध्ये शिस्त, नेतृत्वगुण, आत्मविश्वास आणि विविध कौशल्यांचा विकास होतो, असे त्यांनी सांगितले.संरक्षण दलातील अनेक अधिकारी एनसीसीच्या माध्यमातून घडल्याचे नमूद करत त्यांनी त्यांची उदाहरणे विद्यार्थ्यांसमोर मांडली. एनसीसी हे केवळ सैनिकी प्रशिक्षणाचे माध्यम नसून व्यक्तिमत्त्व विकासासोबतच समाज आणि राष्ट्राप्रती कर्तव्य व दायित्वाची भावना निर्माण करणारे प्रभावी व्यासपीठ असल्याचे कर्नल अजय राज यांनी स्पष्ट केले.
यावेळी ५८ एनसीसी बटालियनचे सुभेदार मेजर सुधाकर कुलदीपकर तसेच सीएचएम डी. सी. रॉय उपस्थित होते. कार्यक्रमाचे सूत्रसंचालन प्रा. सागर खानोलकर यांनी केले.वायबीआयटीमध्ये एनसीसी युनिट सुरू झाल्यानंतर विद्यार्थ्यांना अभ्यासासोबतच शिस्त, साहस, देशभक्ती, नेतृत्व आणि सामाजिक बांधिलकी विकसित करण्याची महत्त्वपूर्ण संधी मिळणार आहे.
Subscribe to my channel
