मालवणात आता संजय गांधी निराधार योजनेची प्रकरणे होणार सुलभ !
समिती अध्यक्ष मंदार केणींची माहिती ; समितीच्या सभेत नवीन ८२ प्रकरणे मंजूर
कुणाल मांजरेकर
मालवण : मालवण तालुका संजय गांधी निराधार योजना समितीच्या शुक्रवारी झालेल्या सभेत संजय गांधी योजनेच्या ५० तर श्रावण बाळ निराधार योजेनेच्या ३२ अशा एकूण ८२ प्रकरणांना मंजुरी देण्यात आली आहेत. दरम्यान, संजय गांधी योजनेच्या प्रकरणांना मंजुरी देताना लाभार्थ्यांची होणारी अडचण लक्षात घेऊन येत्या काळात ही प्रकिया अधिक सुलभ करण्यात येणार आहे, यासाठी तालुका स्तरावर कॅम्प भरवून लाभार्थ्यांचे दाखले तात्काळ देऊन प्रकरणांना मंजुरी देण्यात येणार असल्याची माहिती समितीचे अध्यक्ष मंदार केणी यांनी दिली.
संजय गांधी निराधार योजना समितीची सभा शुक्रवारी येथील तहसील कार्यालयात समितीचे अध्यक्ष मंदार केणी यांच्या अध्यक्षतेखाली घेण्यात आली. यावेळी तहसीलदार अजय पाटणे, नायब तहसिलदार श्री. कोकरे, अव्वल कारकून श्री. मोंडकर, श्रीमती पाटकर, गणेश कुडाळकर, अनुष्का गावकर, भाऊ चव्हाण (देवली), भाऊ चव्हाण (गोळवण), प्रमोद कांडरकर, महेंद्र मांजरेकर आदी उपस्थित होते.
दरम्यान, संजय गांधी योजनेत प्रकरण मंजूर होताना लाभार्थ्यांना तलाठी कार्यालय, तहसील कार्यालयात दाखल्यांसाठी वणवण फिरावे लागत होते. हे लक्षात घेऊन तहसीलदारांशी चर्चा करून पुढील काळात संजय गांधी योजनेच्या कार्यालयात इच्छूक लाभार्थ्यांची नावनोंदणी केली जाणार आहे. याठिकाणी त्यांचे नाव आणि मोबाईल नंबर घेतले जाणार असून त्यानंतर तालुका स्तरावर कॅम्प घेऊन एकाच ठिकाणी त्यांचे दाखले उपलब्ध करून कागदपत्रांची पूर्तता करून देत प्रकरणे मंजूर केली जाणार आहेत. त्यामुळे संबंधित लाभार्थ्यांचा वेळ वाचणार असल्याचे मंदार केणी यांनी सांगितले.
