छत्रपती शिवरायांच्या ऐतिहासिक स्मृतींना उजाळा मिळणार

२५ नोव्हेंबरला मोरयाच्या धोंड्याचा ३६२ वा वर्धापन दिन उत्साहात साजरा होणार; प्रेरणोत्सव समितीचे उपस्थित राहण्याचे आवाहन

मालवण : हिंदुस्थानच्या आरमाराचे जनक छत्रपती शिवाजी महाराज यांच्या ऐतिहासिक कार्याची साक्ष देणाऱ्या वायरी-दांडी येथील ‘मोरयाच्या धोंड्या’चा ३६२ वा वर्धापन दिन बुधवार, २५ नोव्हेंबर २०२६ रोजी साजरा करण्यात येणार आहे. किल्ले सिंधुदुर्ग प्रेरणोत्सव समितीच्या वतीने आयोजित या सोहळ्यानिमित्त विविध धार्मिक कार्यक्रमांचे आयोजन करण्यात आले आहे.

ऐतिहासिक नोंदीनुसार, शुक्रवार २५ नोव्हेंबर १६६४ रोजी छत्रपती शिवाजी महाराजांनी मालवणमधील वायरी-दांडी परिसरातील समुद्रकिनाऱ्यावरील पाषाणावर श्री गणेशाची प्रतिमा कोरून त्याचे पूजन केले आणि सिंधुदुर्ग किल्ल्याच्या भूमिपूजनाचा शुभारंभ केला. हा पाषाण ‘मोऱ्याचा धोंडा’ म्हणून ओळखला जातो. या ऐतिहासिक घटनेच्या स्मरणार्थ दरवर्षी मोरयादिन साजरा केला जातो. यंदाच्या वर्धापन दिनानिमित्त सकाळी ८ वाजता सिंधुदुर्ग जिल्हा बँकेचे उपाध्यक्ष अतुल काळसेकर यांच्या हस्ते श्री मोरेश्वराचे पूजन करण्यात येणार आहे.

मोरेश्वराला गतवैभव प्राप्त व्हावे आणि या ऐतिहासिक स्थळाला योग्य शासकीय सन्मान मिळावा, यासाठी प्रेरणोत्सव समिती गेली अनेक वर्षे प्रयत्नशील आहे. समितीच्या प्रयत्नांना यश मिळत तत्कालीन कोकण आयुक्त प्रभाकर देशमुख यांनी या दिवशी जिल्हाधिकारी किंवा अपर जिल्हाधिकारी यांनी उपस्थित राहून शासकीय पूजा करावी, असे आदेशपत्र जिल्हाधिकारी कार्यालयाला दिले होते.

छत्रपती शिवाजी महाराजांच्या ऐतिहासिक पराक्रमाची आणि सिंधुदुर्ग किल्ल्याच्या उभारणीच्या प्रेरणादायी इतिहासाची आठवण जपणाऱ्या या पवित्र स्थळाला मानाचा मुजरा करण्यासाठी शिवप्रेमी, इतिहासप्रेमी आणि नागरिकांनी बुधवार, २५ नोव्हेंबर रोजी सकाळी मोरयाचा धोंडा, वायरी-दांडी, मालवण येथे मोठ्या संख्येने उपस्थित राहावे, असे आवाहन किल्ले सिंधुदुर्ग प्रेरणोत्सव समितीच्या वतीने करण्यात आले आहे.

error: Content is protected !!