स्वमालकीची जागा घेण्यास वार्षिक सर्वसाधारण सभेची मंजुरी
मालवण : संस्थेच्या भविष्यातील विस्ताराला नवी दिशा देणारा महत्त्वपूर्ण निर्णय घेत श्री गणेश नागरी सहकारी पतसंस्था मर्यादित, मालवणसाठी स्वमालकीची जागा खरेदी करण्यास २७ व्या वार्षिक सर्वसाधारण सभेने एकमताने मान्यता दिली. त्यामुळे संस्थेच्या आगामी वाटचालीचा नवा अध्याय सुरू झाला आहे.
येथील नगर वाचन मंदिर येथे संस्थापक अध्यक्ष एम. पी. पाटील यांच्या अध्यक्षतेखाली तसेच मालवणचे तहसीलदार गणेश लव्हे यांच्या प्रमुख उपस्थितीत ही वार्षिक सभा उत्साहात पार पडली. संस्थेच्या प्रगतीचा आढावा घेतानाच भविष्यातील विस्तार, सक्षम प्रशासकीय व्यवस्था आणि संस्थेच्या विकासासाठी आवश्यक असलेल्या विविध विषयांवर यावेळी चर्चा करण्यात आली.
संस्थेसाठी स्वतःची जागा असावी, या दृष्टीने मांडण्यात आलेल्या प्रस्तावाला सभेने मंजुरी दिल्याने संस्थेच्या पायाभूत सुविधांना बळकटी मिळणार आहे. स्वमालकीची जागा हा संस्थेच्या भविष्यातील विस्तारासाठी महत्त्वाचा टप्पा ठरणार असून, सभासद आणि ग्राहकांना अधिक सक्षम सेवा देण्याच्या दिशेने हा निर्णय महत्त्वपूर्ण मानला जात आहे. यावेळी संस्थेच्या अध्यक्ष सुप्रिया गावकर, उपाध्यक्ष विठ्ठल पटकारे, मुख्य कार्यकारी अधिकारी सुचिता धुरी, संचालक पांडुरंग पाटील, प्रताप बागवे, सुनीता सांबरेकर, हेमंत तळवडेकर, संभाजी कोरे, जयश्री हडकर, प्रियंका मसुरकर, हर्षल केळुस्कर आदी उपस्थित होते.
गुणवंतांचा सन्मान; आदर्श कर्जदारांचाही गौरव
वार्षिक सभेच्या निमित्ताने विविध क्षेत्रांत उल्लेखनीय योगदान देणाऱ्या मान्यवरांचा संस्थेच्या वतीने सत्कार करण्यात आला. स. का. पाटील महाविद्यालयाचे प्राचार्य कैलास राबते, डी.एड. कॉलेजचे प्राचार्य दत्तात्रय माळी, भंडारी हायस्कूलचे मुख्याध्यापक रामचंद्र बनसोडे, कुडाळकर हायस्कूलच्या मुख्याध्यापिका नंदिनी साटलकर आणि कुडाळकर प्राथमिक शाळेच्या मुख्याध्यापिका प्राची परब यांचा गौरव करण्यात आला.
तसेच संस्थेचे आदर्श कर्जदार सुधाकर तुकाराम कासले आणि स्वाती योगेश गव्हाणकर यांचा विशेष सत्कार करण्यात आला. संस्थेच्या कार्यात उल्लेखनीय योगदानाबद्दल मुख्य कार्यकारी अधिकारी सुचिता धुरी, कर्मचारी मोक्षदा धुरी आणि भूषण गावकर यांचाही गौरव करण्यात आला.
सभासदांचा विश्वास, सक्षम कारभार आणि विकासाची दूरदृष्टी यांच्या जोरावर श्री गणेश नागरी सहकारी पतसंस्था भविष्यात आणखी भरारी घेण्याच्या दिशेने वाटचाल करत असल्याचे चित्र या वार्षिक सभेतून स्पष्ट झाले.
Subscribe to my channel
