काही इच्छूकांचीही निराशा, नवीन जागा शोधाव्या लागणार ; अनेक इच्छुक महिलांना संधी
मालवण : मालवण नगरपालिकेच्या नगराध्यक्ष पदाचे आरक्षण ओबीसी महिला म्हणून जाहीर झाल्यानंतर आज पालिकेच्या दहा प्रभागातील २० जागांची आरक्षण सोडत पार पडली. यात तीन विद्यमान नगरसेवकां सह काही इच्छुकांचा पत्ता कट झाला आहे. त्यामुळे त्यांना नवीन जागांचा शोध घ्यावा लागणार आहे.तर काही नवीन इच्छुकांना संधी मिळाली आहे.
येथील पालिकेच्या १० प्रभागातील नगरसेवकांच्या २० जागांची आरक्षण सोडत आज प्रांताधिकारी ऐश्वर्या काळूशे, प्रभारी मुख्याधिकारी संकेत गायकवाड यांच्या उपस्थितीत झाली. यावेळी माजी नगराध्यक्ष महेश कांदळगावकर, सुदेश आचरेकर, बाबा मोंडकर, गणेश कुशे, महेंद्र म्हाडगुत, अन्वेशा आचरेकर, महिमा मयेकर, पूजा करलकर, पूजा वेरलकर, पंकज सादये, बाबी जोगी, तपस्वी मयेकर, अंजना सामंत, नरेश हुले, दत्ता पोईपकर यांच्यासह अन्य नागरिक उपस्थित होते. टोपीवाला हायस्कूलच्या गौरी वस्त, देवयानी कुलकर्णी, अनिमिष पवार, अनुज चव्हाण या चार विद्यार्थ्यांच्या हस्ते आरक्षण सोडत काढण्यात आली. सुरवातीस प्रभाग चार मध्ये अनुसूचित जातीची लोकसंख्या टक्केवारीनुसार जास्त असल्याने या प्रभागातील एक जागा अनुसूचित जाती सर्वसाधारण साठी आरक्षित करण्यात आली. गतवेळी या जागेवर महिला उमेदवार निवडून आल्याने यावेळी ही जागा पुरुष उमेदवारासाठी असेल असे श्रीमती काळूशे यांनी स्पष्ट केले.
प्रभागनिहाय आरक्षण असे- प्रभाग १ अ : सर्वसाधारण, ब : नागरिकांचा मागास प्रवर्ग महिला, प्रभाग २ अ : सर्वसाधारण, ब : सर्वसाधारण महिला, प्रभाग ३ अ : सर्वसाधारण, ब : सर्वसाधारण महिला, प्रभाग ४ अ : अनुसूचित जाती सर्वसाधारण, ब : सर्वसाधारण महिला, प्रभाग ५ अ : ओबीसी सर्वसाधारण, ब : सर्वसाधारण महिला, प्रभाग ६ अ : सर्वसाधारण, ब : सर्वसाधारण महिला, प्रभाग ७ अ : सर्वसाधारण, ब : सर्वसाधारण महिला, प्रभाग ८ अ : नागरिकांचा मागास प्रवर्ग, ब : सर्वसाधारण, प्रभाग ९ अ : सर्वसाधारण, ब : नागरिकांचा मागास प्रवर्ग महिला, प्रभाग १० अ : सर्वसाधारण, ब : नागरिकांचा मागास प्रवर्ग महिला
आज जाहीर झालेल्या आरक्षणात तीन विद्यमानांचे पत्ते कट झाले. यात माजी उपनगराध्यक्ष राजन वराडकर यांच्यासह सेजल परब व शिला गिरकर यांचा समावेश आहे. त्यांना पुन्हा नगरसेवक म्हणून निवडून येण्यासाठी वेगळ्या वॉर्डाचा पर्याय निवडावा लागणार आहे. तर काही माजी नगरसेवकांना पुन्हा निवडणूक लढविण्याची संधी उपलब्ध झाली आहे. अनेक नवीन महिलांना निवडणूक लढविण्याची संधी मिळाली आहे. त्यामुळे महिलांच्या चेहऱ्यावर हास्य फुलल्याचे दिसून आले. काही नवीन इच्छुकांचा पत्ता कट झाल्याने त्यांच्यात नाराजी पसरल्याचे दिसून आले. प्रभाग दहा मध्ये सर्वाधिक उमेदवार असल्याने याठिकाणी उमेदवार देताना राजकीय पक्षांची कसोटी लागणार असल्याची चिन्हे आहेत.
Subscribe to my channel
