डोळ्यांच्या स्नायूंवर शस्त्रक्रिया करून तिरळेपणावर उपचार; दैनंदिन जीवनातील अडचणी दूर होण्यास मदत
चिपळूण : डेरवण येथील बी.के.एल. वालावलकर रुरल मेडिकल कॉलेज अँड हॉस्पिटलमध्ये १९ वर्षीय तरुणावर तिरळेपणाची शस्त्रक्रिया यशस्वीरीत्या करण्यात आली. रुग्णालयाच्या नेत्ररोग विभागाने ही शस्त्रक्रिया यशस्वी केली.
साळुंखे कुटुंबातील सुमितच्या जन्मानंतर आनंदाचे वातावरण होते. मात्र, वय वाढत असताना त्याच्या डोळ्यांमध्ये तिरळेपणा असल्याचे स्पष्ट होऊ लागले. त्यामुळे दैनंदिन कामे, अभ्यास तसेच वाहन चालविण्याचा परवाना मिळवताना त्याला अडचणींचा सामना करावा लागत होता. तिरळेपणावर शस्त्रक्रियेद्वारे उपचार शक्य असल्याची आणि ही सुविधा वालावलकर रुग्णालयात उपलब्ध असल्याची माहिती मिळाल्यानंतर सुमितने नेत्ररोग विभागात तपासणी करून घेतली.
या शस्त्रक्रियेत डोळ्यांच्या स्नायूंना स्थानिक भूल देण्यात आली. सैल झालेले स्नायू घट्ट करणे आणि घट्ट झालेले स्नायू सैल करणे, अशा पद्धतीने शस्त्रक्रिया करून डोळ्यांना योग्य दिशा देण्यात आली. वालावलकर रुग्णालयातील या यशस्वी शस्त्रक्रियेमुळे तिरळेपणाच्या समस्येने त्रस्त असलेल्या रुग्णांसाठी आशेचा किरण निर्माण झाला आहे.
Subscribe to my channel
