तुमचे दुकान उचला आणि गावच्या वेशीबाहेर निघा : जनआक्रोश सभेत ग्रामस्थांचा सज्जड इशारा
‘त्या’ शेड मध्ये अघोरी प्रकार सुरु असल्याचा गंभीर आरोप; सनदशीर मार्गाने तीव्र विरोधाचा एकमुखी निर्धार
मालवण | कुणाल मांजरेकर
मालवण तालुक्यातील वराड गावच्या हद्दीत सावरवाड येथे रुद्रनाथ फाउंडेशन यांनी स्थापन केलेल्या कथित स्फटिक शिवलिंगा विरोधात वराड ग्रामस्थांचा विरोध अधिक तीव्र झाला आहे. रविवारी सायंकाळी वराड गावचे ग्रामदैवत श्री देव वेताळ मंदिराच्या प्रांगणात बेकायदेशीर स्फटिक संदर्भात जन आक्रोश सभा घेण्यात आली. या सभेला ४०० हून अधिक ग्रामस्थ उपस्थित होते. स्फटिक शिवलिंग परिसरात अघोरी प्रकार होत असून हे प्रकार कोकणातील गावऱ्हाटीला मान्य होणारे नाहीत. तसेच याठिकाणी कोणत्याही प्रकारची परवानगी घेण्यात आलेली नसून हे तुमचे हे दुकान लवकरात लवकर येथून हलवून आमच्या गावच्या वेशी बाहेर न्या, प्रशासनाने ग्रामस्थांच्या तीव्र भावना लक्षात घेऊन येथील अघोरी प्रकार थांबवावेत अन्यथा सनदशीर मार्गाने आंदोलन छेडण्याचा इशारा या गाव बैठकीतून देण्यात आला आहे.
या जनआक्रोश सभेला सर्वपक्षीय स्थानिक पदाधिकारी, गावचे सर्व मानकरी व ग्रामस्थ उपस्थित होते. यात प्रामुख्याने शिवसेनेचे कुडाळ मालवण निरीक्षक बाळा चिंदरकर, राष्ट्रवादी काँग्रेस शरद पवार पक्षाचे नेते, जिल्हा बँक संचालक व्हिक्टर डॉन्ट्स, ऍड. रुपेश परुळेकर, देवस्थान ट्रस्टचे अध्यक्ष अनिल परब, सचिन परब, राजन माणगावकर, श्री. आळवे, तुकाराम परब, गुरुनाथ सामंत, अमित फाटक, देवेन भोगटे, बबन पांचाळ, श्यामसुंदर वराडकर, सुरेश चव्हाण, दिनकर पांचाळ, सोनल माळी, मीनल माळी, शिवानी आळवे, शिवराम वराडकर, रवींद्र परब, सुभाष सारंग, परशुराम घाडी, अशोक परब, सुशील आचरेकर, सतीश बिडये, श्यामसुंदर परब, किशोर गोसावी, अशोक मिठबावकर, गुरुनाथ घोग बळे, मैथिली पेडणेकर, सुनीता सावंत, अशोक पाटकर, काशीराम मिठबावकर, अभय तेंडुलकर यांच्यासह मोठया संख्येने ग्रामस्थ उपस्थित होते.या सभेत कोणत्याही परिस्थितीत वराड गावच्या हद्दीतून हे स्फटिक शिवलिंग हटवण्यासाठी वेळप्रसंगी सनदशीर मार्गाने लढा उभारण्याचा एकमुखी निर्णय घेण्यात आला.
यावेळी ऍड, रुपेश परुळेकर म्हणाले, सावरवाड गावात सात ते आठ व्यक्तीनी येऊन चुकीच्या काही गोष्टी सुरु केल्या. त्यावेळी रुद्रनाथ फाउंडेशन हे नाव पुढे आणलं. त्यांनी कालच्या महाशिवरात्रीला आशिया खंडातलं वायव्यमुखी शिवलिंग आम्ही येथे आणलं अशा प्रकारची जाहिरात त्यांनी सुरू केली. आमच्या गावाचा शिवलिंग बसवण्याला विरोध नाही, त्या ठिकाणी सुरू असणाऱ्या अनधिकृत आणि अघोरी कृत्यांना आमचा विरोध आहे. आम्ही रुद्रनाथ फाउंडेशन चा अभ्यास सुरू केला, त्यावेळी असं समोर आलं की हे रुद्रनाथ फाउंडेशन रजिस्टर ट्रस्ट आहे. त्यांचं ऑफिस सायन वेस्ट अंधेरीला आहे. या ट्रस्ट मध्ये वराड गावातील एकही व्यक्ती नाही. या ट्रस्ट कडे अशा प्रकारचं मंदिर अथवा मूर्ती स्थापन करण्याची परवानगी नाही. हा ट्रस्टमध्ये योगसाधना शिकवणे, शैक्षणिक आणि वैद्यकीय सुविधा देणे हाच उद्देश आहे. असं असताना त्यांनी खोटं बोलून ही प्रतिकृती बसवली आहे. त्यांना माझ्या गावात असं काही बसवण्याचा अधिकार नाही. आम्हाला स्वयंभू महादेवा पेक्षा मोठा कोणीच नाही. माझ्या गावात जर स्वयंभू महादेव बसला आहे, तर आम्हाला दुसऱ्या कोणत्या स्फटिकाची गरज नाही, असे ते म्हणाले.
शिवसेनेचे निरीक्षक बाळा चिंदरकर म्हणाले, माझ्या गावात मला माझ्या महादेवा पेक्षा कोणीच मोठा नाही. माझ्या देवावर माझी अतूट श्रद्धा असून याच देवामुळे महाराष्ट्रात आम्ही नेतृत्व करतो. माझ्या जन्म गावात चुकीचे प्रकार घडत असतील आणि ग्रामस्थांना आक्रोश सभा घ्यावी लागत असेल तर असले प्रकार आम्ही सहन करणार नाही. स्फटिक शिवलिंग बसवण्याचे प्रकार थोतांड आहेत. हा केवळ बिझनेस आहे. ही सगळी मंडळी ठग आहेत, फसवी आहेत. कोकणात असले प्रकार आम्हाला नको असे सांगून शिवसेनेच्या वरिष्ठ नेतृत्वाला सोबत घेऊन या विरोधात लढा देणार असल्याचे ते म्हणाले.
व्हिक्टर डॉन्ट्स म्हणाले, आमच्या गावाबद्दल आम्हाला अभिमान आहे. यापूर्वी आम्ही एकत्र होतो, पण गावात फुट पाडण्याचे प्रयत्न केले जात असून वेताळावर माझी श्रद्धा असून हा विषय नक्कीच मिटेल. आज गाव एकत्र आला आहे. त्यामुळे कायदा, कानून, न्याय, व्यवस्था सगळी फिकी आहे. ही नऊ माणसे येऊन वराड गावावर राज्य करणार आहेत का ? असा सवाल करून यांच्या पैशाच्या नादाला लागून गावात फुट पडू देऊ नका, असे आवाहन त्यांनी केले.
Subscribe to my channel
