‘आजचे श्रमदान, उद्याच्या पाण्याची शाश्वती’चा निर्धार; ग्रामस्थ, शेतकरी, महिला व तरुणांचा उत्स्फूर्त सहभाग
मालवण : अपुऱ्या पावसामुळे आगामी काळात निर्माण होणारी पाणीटंचाई आणि दुष्काळाची संभाव्य परिस्थिती लक्षात घेऊन पेंडूर ग्रामस्थांनी जलसंधारणासाठी पुढाकार घेतला आहे. ‘पाण्यासाठी सरकारकडे पाहत बसण्यापेक्षा लोकसहभागातून जलस्रोत बळकट करूया’ या भावनेतून शुक्रवार, दि. २ ऑक्टोबर २०२६ रोजी पेंडूर तलाव परिसरात बंधारा बांधण्यासाठी उत्स्फूर्त श्रमदान करण्यात आले.
ग्रामपंचायत खरारे-पेंडूर यांच्या पुढाकारातून आयोजित करण्यात आलेल्या या उपक्रमाला सकाळी ८.३० वाजता सुरुवात झाली. पेंडूरसह परिसरातील ग्रामस्थ, शेतकरी, तरुण, महिला आणि निसर्गप्रेमी नागरिक मोठ्या संख्येने सहभागी झाले. प्रत्येकाने आपल्या परीने श्रमदान करत जलसंधारणाच्या कामाला हातभार लावला.
पेंडूर तलाव हा परिसरातील महत्त्वाचा जलस्रोत असून, तलावातील पाण्याचा थेट परिणाम परिसरातील विहिरींच्या पाणीपातळीवर तसेच शेतीच्या पाण्याच्या उपलब्धतेवर होतो. त्यामुळे तलावातील पाणीसाठा टिकविणे आणि भूजल पातळी वाढविण्यासाठी बंधारा बांधण्याचा निर्णय ग्रामस्थांनी घेतला. श्रमदानादरम्यान ग्रामस्थांनी ‘आजचे श्रमदान म्हणजे उद्याच्या पाण्याची शाश्वती’ असा संदेश देत जलसंधारणाचे महत्त्व अधोरेखित केले. केवळ शासकीय यंत्रणांवर अवलंबून न राहता गावकऱ्यांनी एकत्र येऊन उचललेले हे पाऊल ग्रामीण भागातील लोकसहभागातून जलव्यवस्थापनाचे प्रभावी उदाहरण ठरत आहे.
या उपक्रमामुळे पावसाचे पाणी अडवून ते अधिक काळ परिसरात टिकवून ठेवण्यास मदत होणार असून, त्यातून भूजल पुनर्भरणाला चालना मिळण्याची आणि आगामी उन्हाळ्यात पाण्याची उपलब्धता वाढण्याची अपेक्षा ग्रामस्थांनी व्यक्त केली. पेंडूरमध्ये झालेल्या या श्रमदानातून ‘गाव एकत्र आले तर पाण्याचा प्रश्नही गावच सोडवू शकते’ हा संदेश देत जलसंधारणासाठी सामूहिक प्रयत्नांची गरज अधोरेखित झाली आहे.
Subscribe to my channel
