पर्यटन व्यावसायिक महासंघ अध्यक्ष विष्णू मोंडकर यांची प्रतिक्रिया
मालवण : सिंधुदुर्ग जिल्हा पर्यटन जिल्हा म्हणून केंद्र व राज्य सरकारने मान्यता दिली आहे. शासनाच्या वतीने विविध योजनांच्या माध्यमातून पर्यटन वाढीसाठी कार्य चालू आहे. परंतु आंतराष्ट्रीय स्तरावर पर्यटन वाढीसाठी जिल्ह्यात पर्यटन पूरक बहुउद्देशीय प्रकल्पाची गरज होती. आयएनएस गुलदार च्या माध्यमातून येथे आंतराष्ट्रीय पर्यटन वाढीसाठी सुरवात झाली आहे, अशी प्रतिक्रिया पर्यटन व्यावसायिक महासंघाचे अध्यक्ष विष्णू उर्फ बाबा मोंडकर यांनी दिली आहे.
सिंधुदुर्ग जिल्ह्यातील निवती समुद्रात भारतीय नौदलाची सेवामुक्त झालेली ‘आयएनएस गुलदार ही युद्धनौका समुद्रात विसर्जित करून देशातील पहिले ‘अंडरवॉटर म्युझियम’ व कृत्रिम प्रवाळ प्रकल्प उभारण्याचे काम सुरू झाले असून आंतरराष्ट्रीय जागतिक स्तरावर सेशेल्स, ,अमेरिका, आणि ऑस्ट्रेलिया यांसारख्या अनेक देशांनी आपल्या निवृत्त युद्धनौका बुडवून त्यांना जागतिक दर्जाच्या डायव्हिंग केंद्रात बदल केला आहे. भारतीय नौदलातील सेवामुक्त युद्धनौका देशसेवेत कार्यरत होती. सैनिक, उपकरणे आणि आवश्यक साहित्य वाहून नेण्यापासून ते विविध समुद्री आणि किनारपट्टी संरक्षण मोहिमांपर्यंत या जहाजाने मोलाची कामगिरी बजावली. देशसेवेच्या गौरवशाली सेवेनंतर आता या जहाजाचे रूपांतर समुद्राखालील पर्यटन आणि समुद्री जीवसंवर्धनाच्या केंद्रात करण्यात येत आहे.
महाराष्ट्र पर्यटन विकास महामंडळाच्या माध्यमातून सिंधुदुर्ग किनारपट्टीजवळील निवती रॉक्स परिसरात हा आंतराष्ट्रीय महत्व प्राप्त होणारा बहुउद्देशीय पर्यटन प्रकल्प साकारला जात आहे. समुद्रतळापासून सुमारे २२ मीटर खोलीवर हे जहाज सुरक्षितपणे स्थापित केले जाणार आहे. ही जागा अन्य जगात झालेल्या प्रकल्पपेक्षा सरल असून समुद्र जैव विविधतेने उपयुक्त आहे, वैज्ञानिक अभ्यासानंतर निवडण्यात आलेले हे ठिकाण समुद्री पर्यटन आणि जैवविविधतेसाठी अत्यंत उपयुक्त आहे हा प्रकल्प पर्यटन, संवर्धन आणि सैनिकी इतिहासाचा संगम असून हा केवळ पर्यटनापुरता मर्यादित नसून समुद्री पर्यावरण संवर्धन, ऐतिहासिक वारशाचा पुनर्वापर आणि साहसी पर्यटन यांचा संगम ठरणार आहे.
या युद्धनोकेचे रूपांतर अंडरवॉटर म्युझियम मध्ये होणार असून स्कुबा डायव्हर्स आणि पर्यटकांसाठी खुली असणार आहे. यामुळे समुद्री शैवाल, मासे समुद्र जीवसंवर्धन, साहसी पर्यटन, संशोधन यांचा समावेश होऊन भारताचे नवे आंतराष्ट्रीय डायव्हिंग डेस्टिनेशन होणारे आहे. या प्रकल्पामुळे पर्यटकांना स्कुबा डायव्हिंग, पाणबुडी पर्यटन, समुद्राखालील फोटोग्राफी, मार्गदर्शकांसह डायव्हिंग टूर तसेच समुद्र शिक्षण आणि संशोधनाचा अनोखा अनुभव घेता येणार आहे.या प्रकल्पामुळे स्थानिक युवकांसाठी रोजगाराच्या मोठ्या संधी उपलब्ध होणार आहेत. स्कुबा डायव्हिंग प्रशिक्षण, पर्यटन मार्गदर्शक, बोट सेवा, फोटोग्राफी, हॉटेल व्यवसाय आणि इतर पर्यटनपूरक उद्योगांना चालना मिळणार आहे. सिंधुदुर्ग जिल्हा जागतिक पर्यटन नकाशावर आंतराष्ट्रीय पर्यटन स्थळ म्हणून नावारूपास येणार आहे.
सदर प्रकल्प समुद्री संवर्धन, साहसी पर्यटन आणि स्थानिक रोजगारनिर्मिती यांचा अनोखा मेळ साधणारा हा प्रकल्प सिंधुदुर्गच्या पर्यटन इतिहासातील नवा मैलाचा दगड ठरणार आहे.तसेच हा प्रकल्प निवती येथे उभा होण्यासाठी जिह्यातील पर्यटन आंतराष्ट्रीय स्तरावर पोचण्यासाठी पर्यटन विकास मंडळ अधिकारी, शिवसेना आमदार दीपक केसरकर, तत्कालीन पालकमंत्री, भाजपा महाराष्ट्र प्रदेश अध्यक्ष रवींद्र चव्हाण तसेच सदर प्रकल्प नियोजित समुद्री जागेत पूर्णत्वास नेण्यासाठी आवश्यक परवान्या सुविधा निर्माण करून देणारे मत्स्य विकास, बंदरे विकास मंत्री, सिंधुदुर्ग पालकमंत्री नितेश राणे यांचे आभार पर्यटन व्यावसायिक महासंघ मानत आहे असे विष्णू मोंडकर यांनी म्हटले आहे.
Subscribe to my channel
