तुळस येथे ‘प्रदेशाध्यक्ष चषक २०२६’ राज्यस्तरीय संगीत भजन स्पर्धेचे दिमाखदार उद्घाटन; पाच जिल्ह्यांतील भजनी मंडळांचा सहभाग
वेंगुर्ला : भक्तिरसाची ओंजळ, परंपरेचा सुगंध आणि कोकणच्या मातीशी घट्ट नाळ जोडलेली भजनकला ही कोकणच्या सांस्कृतिक वैभवाची ओळख आहे. या समृद्ध परंपरेचे जतन करण्याबरोबरच नव्या पिढीनेही भजनकलेचा हा वारसा अभिमानाने पुढे न्यावा, असे आवाहन भाजपा युवा नेते विशाल परब यांनी केले.
भारतीय जनता पार्टी तुळस आणि आरसी ग्रुप, तुळस यांच्या संयुक्त विद्यमाने आयोजित ‘प्रदेशाध्यक्ष चषक २०२६’ या राज्यस्तरीय भव्य निमंत्रित संगीत भजन स्पर्धेचे दिमाखदार उद्घाटन झाले. भाजपा प्रदेशाध्यक्ष रवींद्र चव्हाण यांच्या वाढदिवसानिमित्त सलग दुसऱ्या वर्षी या स्पर्धेचे आयोजन करण्यात आले आहे. उद्घाटनप्रसंगी प्रमुख पाहुणे म्हणून उपस्थित राहून विशाल परब यांनी भजनी कलाकारांना मार्गदर्शन केले.
“भजन ही केवळ करमणुकीची कला नाही; ती आपल्या संस्कृतीची, श्रद्धेची आणि सामाजिक एकात्मतेची वाहक आहे. पारंपरिक भजनी मंडळी आपल्या कलेच्या माध्यमातून हा सांस्कृतिक वारसा आजही जिवंत ठेवत आहेत. हा वारसा पुढील पिढीपर्यंत पोहोचविण्याची जबाबदारी आपल्या सर्वांची आहे,” असे विशाल परब यांनी यावेळी सांगितले.
विशाल परब यांच्या हस्ते आणि मान्यवरांच्या उपस्थितीत स्पर्धेचा शुभारंभ करण्यात आला. यावेळी भाजपा जिल्हाध्यक्ष प्रभाकर सावंत, महिला जिल्हाध्यक्षा श्वेता ताई कोरगावकर, मंडल अध्यक्ष पप्पू परब, पंचायत समिती सदस्य नितीन मांजरेकर, सावंतवाडी उपनगराध्यक्ष ॲड. अनिल निरवडेकर, संस्था अध्यक्ष विष्णू परब, मोहन मिस्त्री, दीपेश मिस्त्री, सागर सावंत, पोलीस पाटील अनिल परब यांच्यासह सर्व देवस्थान मानकरी उपस्थित होते. भाजपा पदाधिकारी, कार्यकर्ते आणि भजनी कलाकारांच्या मोठ्या उपस्थितीने उद्घाटन सोहळ्याला उत्साहाचे स्वरूप प्राप्त झाले.
पाच जिल्ह्यांतील भजनी मंडळांचा सुरेल संगम
२ व ३ ऑक्टोबर २०२६ रोजी तुळस येथील कर्मयोगी कै. रामचंद्र य. तुळसकर सभागृह, श्री शिवाजी हायस्कूल येथे ही राज्यस्तरीय स्पर्धा रंगत आहे. या स्पर्धेत मुंबई, ठाणे, रायगड, रत्नागिरी आणि सिंधुदुर्ग या पाच जिल्ह्यांतील निमंत्रित भजन मंडळे सहभागी झाली आहेत. त्यामुळे विविध भागांतील भजनशैली, गायनपरंपरा आणि संगीत साधनेचा सुरेल मिलाफ तुळसच्या भूमीत अनुभवायला मिळत आहे. नामांकित कलाकारांची जुगलबंदी, पारंपरिक भजनांचे सादरीकरण आणि स्पर्धक मंडळांच्या रंगतदार मैफलीमुळे परिसर भक्तिरसात न्हाऊन निघाला आहे.
परंपरेच्या सुरांना नव्या पिढीच्या कर्तृत्वाची साथ!‘
प्रदेशाध्यक्ष चषक २०२६’च्या माध्यमातून भजनकलेला व्यासपीठ, कलाकारांना प्रोत्साहन आणि कोकणच्या सांस्कृतिक वारशाला नवी ऊर्जा देण्याचा प्रयत्न केला जात आहे. त्यामुळे ही स्पर्धा केवळ विजेतेपदासाठीची चुरस न राहता कोकणच्या सांस्कृतिक अस्मितेचा उत्सव ठरत आहे. या उपक्रमाच्या यशस्वी आयोजनासाठी भाजपा पदाधिकारी व कार्यकर्त्यांनी विशेष योगदान दिले. यावेळी वैभव होडावडेकर, सुधीर झांट्ये, प्रमोद गोळम, पिंट्या राऊळ, विजय रेडकर, तेजस कुंभार, किशोर सावंत, सुभाष सावंत, राजेश भणगे, रत्नाकर शिरोडकर, बंड्या होडावडेकर, उमेश कुंभार, संतोष सावंत, नंदू बेहेरे, शुभम शेटकर, सिद्धेश शेटकर, नितीन कोचरेकर, पप्पू सावंत, रोहन सावंत, पुरुषोत्तम परब, नाथा परब, भैय्या घोगळे, आनंद माळकर, दत्ताराम माळकर, राजेश तुळसकर, हनू गावडे, घनश्याम गावडे, समीर तांबोसकर आणि दाजी चुडजी यांच्यासह भाजपा कार्यकर्ते व पदाधिकारी उपस्थित होते.
भक्ती, संगीत आणि संस्कृतीचा हा सुरेल त्रिवेणी संगम अनुभवण्यासाठी रसिकांनी मोठ्या संख्येने उपस्थित राहावे, असे आवाहन भाजपा तुळस आणि आरसी ग्रुप, तुळस यांच्या वतीने करण्यात आले आहे. कोकणच्या मातीत रुजलेली भजनाची परंपरा अशीच फुलत राहो आणि तिचे सूर पुढील पिढ्यांच्या कानावरही घुमत राहोत, या भावनेने तुळस येथे ‘प्रदेशाध्यक्ष चषक २०२६’चा भक्तिमय निनाद घुमत आहे.
Subscribe to my channel
