वागदे अपघातातील गंभीर जखमी प्राची मसुरकर यांची मृत्यूशी झुंज अपयशी - कोकण मिरर

गोव्यातील बांबुळी रुग्णालयात उपचारादरम्यान अखेरचा श्वास; दुचाकीचालकाविरोधात गुन्हा दाखल

कणकवली : मुंबई-गोवा महामार्गावरील वागदे येथे झालेल्या दुचाकी अपघातात गंभीर जखमी झालेल्या प्राची प्रदीप मसुरकर (वय ३२, रा. हिर्लोक, ता. कुडाळ) यांचा उपचारादरम्यान मृत्यू झाला. गोव्यातील बांबुळी रुग्णालयात २७ ऑक्टोबर रोजी त्यांची प्राणज्योत मालवली. या घटनेमुळे हिर्लोक परिसरात हळहळ व्यक्त होत आहे.

प्राची मसुरकर या कणकवलीतील एका खासगी रुग्णालयात कार्यरत होत्या. २६ ऑक्टोबर रोजी पहाटे सुमारे ५.४० वाजता त्या उमेश प्रदीप कदम (वय ३४, रा. आंब्रड) यांच्यासोबत दुचाकीने कुडाळच्या दिशेने जात होत्या. वागदे येथील विश्रांती हॉटेलसमोर दुचाकीचालकाचे वाहनावरील नियंत्रण सुटल्याने दुचाकी रस्त्याच्या दुभाजकावर आदळली.

या भीषण धडकेत प्राची मसुरकर आणि दुचाकीचालक उमेश कदम हे दोघेही गंभीर जखमी झाले. अपघातानंतर दोघांनाही उपचारासाठी ओरोस येथे दाखल करण्यात आले. मात्र, प्राची यांची प्रकृती चिंताजनक असल्याने त्यांना पुढील उपचारांसाठी गोव्यातील बांबुळी रुग्णालयात हलविण्यात आले. तेथे उपचार सुरू असतानाच त्यांची मृत्यूशी सुरू असलेली झुंज अखेर अपयशी ठरली.

या प्रकरणी प्राची यांचे वडील सुनील शिवराम चव्हाण यांनी दिलेल्या फिर्यादीवरून दुचाकीचालक उमेश कदम याच्याविरोधात पोलिसांत गुन्हा दाखल करण्यात आला आहे. या अपघाताचा पुढील तपास पोलीस करत आहेत.