आमदार वैभव नाईकांकडून शहरवासीयांची फसवणूक ; ४२० चा गुन्हा दाखल करा
भाजपचे प्रदेश सचिव, माजी खा. निलेश राणेंचे मालवण पोलीस ठाण्यात निवेदन
भाजपच्या स्थानिक पदाधिकाऱ्यांकडून पोलीस निरीक्षकांना निवेदन सादर
मालवण | कुणाल मांजरेकर
मालवण नगरपरिषदेच्या पिंपळपार येथील व्यायामशाळेत शासन निधीतून २५ लाख रुपये किमतीचे व्यायाम साहित्य आमदार वैभव नाईक यांनी दिल्याची बातमी काही दिवसांपूर्वी प्रसिद्ध झाली होती. प्रत्यक्षात मात्र हे साहित्य अतिशय निकृष्ट आणि कमी दर्जाचे असल्याची तक्रार व्यायामपटू तसेच स्थानिक युवकांनी केली होती. त्यानुसार आपण पाहणीसाठी याठिकाणी गेलो असता व्यायामशाळेतील साहित्यच गायब असल्याचे निदर्शनास आले आहे. त्यामुळे वैभव नाईक यांनी खोट्या बातम्या प्रसिद्ध करून शहरवासीयांची फसवणूक केली असून शासन निधीतही भ्रष्टाचार केला आहे. त्यामुळे वैभव नाईक यांच्यावर ४२० चा गुन्हा दाखल करावा, अशी मागणी भाजपचे प्रदेश सचिव, माजी खासदार निलेश राणे यांनी केली आहे. याबाबतचे श्री. राणे यांचे लेखी निवेदन भाजपच्या स्थानिक पदाधिकाऱ्यांनी गुरुवारी मालवण पोलीस ठाण्यात दिले.
मालवण शहरातील नगरपालिकेच्या व्यायामशाळेत आ. वैभव नाईक यांनी शासन निधीतून २५ लाख रुपये खर्चून गाजावाजा करीत नव्याने आणलेले साहित्य महिनाभरात गायब झाले आहे. भाजप प्रदेश सचिव, माजी खासदार निलेश राणे यांनी दोन दिवसांपूर्वी याठिकाणी भेट दिली असता हा प्रकार निदर्शनास आला होता. याबाबत निलेश राणे यांनी पोलीस ठाण्यात लेखी निवेदन सादर करून वैभव नाईक यांच्यावर ४२० चा गुन्हा दाखल करण्याची मागणी केली आहे. सदरील बाब अत्यंत धक्कादायक आहे. स्थानिक आमदार वैभव नाईक यांनी खोट्या बातम्या प्रसारित करत जनतेची फसवणूक करत असून तसेच व्यायाम साहित्यात भ्रष्टाचार केला ही गोष्ट उघड आहे. त्यामुळे या घटनेचा आपण गांभीर्यपूर्वक विचार करत आमदार वैभव नाईक यांच्यावर मालवण शहरवासीयांच्या फसवणुकीबाबत कलम ४२० नुसार गुन्हा दाखल करावा अशी मागणी निलेश राणेंनी या पत्राद्वारे केली आहे.
हे पत्र भाजपच्या पदाधिकाऱ्यांनी पोलीस निरीक्षक विजय यादव यांच्याकडे हे निवेदन सादर केले. यावेळी भाजपचे तालुकाध्यक्ष धोंडी चिंदरकर, माजी नगराध्यक्ष सुदेश आचरेकर, जिल्हा बँकेचे संचालक बाबा परब, शहर मंडलचे प्रभारी अध्यक्ष विजय केनवडेकर, माजी नगरसेवक दीपक पाटकर, महेश सारंग, राजू परुळेकर, ललित चव्हाण, चारुशीला आचरेकर, महेश मांजरेकर, विजय निकम, जॉमी ब्रिटो, निनाद बादेकर, नंदू आंगणे, संतोष इब्रामपुरकर, प्रमोद करलकर, अक्षय कदम यांच्यासह भाजपचे अन्य पदाधिकारी आणि कार्यकर्ते उपस्थित होते.
