‘लोकतंत्र बचाओ, अराजकता हटाओ’ अभियानांतर्गत नागपूरमध्ये युवा शक्तीचे जोरदार प्रदर्शन
नागपूर : भारतीय जनता युवा मोर्चा, नागपूर महानगरच्या वतीने ‘लोकतंत्र बचाओ, अराजकता हटाओ’ अभियानांतर्गत आयोजित करण्यात आलेल्या ‘युवा शंखनाद’ कार्यक्रमात मत्स्यव्यवसाय व बंदरे विकास मंत्री नितेश राणे यांनी तरुणांशी संवाद साधत राष्ट्रहित, धर्मरक्षण आणि संविधानिक मूल्यांच्या जपणुकीसाठी संघटित होण्याचे आवाहन केले.
यावेळी बोलताना नितेश राणे यांनी देशाची एकता आणि अखंडता टिकविण्याची मोठी जबाबदारी तरुणांच्या खांद्यावर असल्याचे सांगितले. भारताकडे वाकड्या नजरेने पाहण्याचे धाडस कोणालाही होता कामा नये, यासाठी युवकांनी राष्ट्राच्या संरक्षणासाठी सदैव सज्ज राहिले पाहिजे, असे ते म्हणाले.
देशात काही समाजकंटकांकडून अराजकता निर्माण करण्याचे प्रयत्न होत असून, भारतीय संविधानाने दिलेल्या मूल्यांना बाधा पोहोचविण्याचे प्रयत्नही होत असल्याचा आरोप त्यांनी केला. ही लढाई केवळ वैचारिक नसून देशाची एकता, संविधानिक मूल्ये आणि सांस्कृतिक अस्मिता जपण्याची आहे, असे त्यांनी स्पष्ट केले.
‘जय श्रीराम’ म्हणण्यापासून रोखण्याचे प्रयत्न होत असतील, तर अशा प्रवृत्तींना वेळीच विरोध केला पाहिजे. धार्मिक स्वातंत्र्य, संस्कृती आणि परंपरांचे रक्षण करण्यासाठी तरुणांनी जागरूक, संघटित आणि सक्षम राहावे. राष्ट्रहिताला सर्वोच्च प्राधान्य देत समाजात एकजुटीचा संदेश पोहोचवावा, असे आवाहनही राणे यांनी केले.
या कार्यक्रमाला आमदार परिणय फुके, भाजप नागपूर शहराध्यक्ष दयाशंकर तिवारी, भाजयुमो महाराष्ट्र प्रदेशाध्यक्ष कृष्णराज महाडिक, नागपूरच्या महापौर सौ. ठाकरे, आमदार खोपडे, विदर्भ संघटन प्रमुख कोठेकर, माजी आमदार अनिल सोले, गिरीश व्यास, आमदार पोतदार, स्थायी समिती अध्यक्ष सौ. शिवानी दाणी, भाजयुमो नागपूर महानगर अध्यक्ष सचिन करारे, महामंत्री रितेश पांडे, अथर्व त्रिवेदी, रिषभ अरखेल, कुलदीप माटे, संपर्क महामंत्री नागेश साठवणे यांच्यासह मोठ्या संख्येने युवा कार्यकर्ते उपस्थित होते.
Subscribe to my channel
