महेश जावकर यांनी शहरातील पर्यटन विकासाकडे पर्यटनमंत्र्यांचे वेधले लक्ष
पर्यटनमंत्री आदित्य ठाकरे यांच्याकडून सकारात्मक प्रतिसाद
कुणाल मांजरेकर
मालवण : मालवण शहरातील महत्वाचे पर्यटन प्रकल्प मार्गी लावण्यात लावून येथील पर्यटन विकासाला चालना द्यावी, अशी मागणी माजी उपनगराध्यक्ष महेश जावकर यांनी राज्याचे पर्यटनमंत्री आदित्य ठाकरे यांच्याकडे निवेदनाद्वारे केली आहे. या मागण्यांना पर्यटन मंत्र्यांनीही सकारात्मक प्रतिसाद दिला आहे.
मालवण भेटीवर आलेल्या पर्यटन मंत्री आदित्य ठाकरे यांची महेश जावकर यांनी भेट घेतली. यावेळी विविध मागण्यांचे निवेदन त्यांनी सादर केले. मालवण शहरातील प्रलंबित मेढा राजकोट येथील मच्छीमार जेटी विकसित करण्यात यावी. मालवण बंदी जेटी ते राजकोट बंधारा कम रस्ता तयार करणे, राजकोट ते निशाण काठी पर्यंत बंधारा कम रस्ता तयार करणे, राजकोट येथील निशाण काठी हा परिसर पर्यटनातून विकसित करणे आदी विविध मागण्या महेश जावकर यांनी या निवेदनातून केल्या आहेत.
पर्यटन मंत्री पदाचा कार्यभार हाती घेतल्यानंतर पर्यटनाचा विकास करण्याचा ध्यास ना. ठाकरे यांनी घेतलेला आहे. तसेच प्रलंबित पर्यटन प्रकल्प मार्गी लागण्यासाठी आम. वैभव नाईक हे देखील पाठपुरावा करत आहेत. सदर पर्यटन प्रकल्प मालवणच्या दृष्टीने महत्वाचे आहेत. त्यामुळे याबाबत जातीनीशी लक्ष घालून मालवण शहरातील पर्यटन विकासाला चालना द्यावी अशी मागणी महेश जावकर यांनी ना. ठाकरे यांच्याकडे निवेदनाद्वारे केली आहे.
