आपत्कालीन निधीतून मालवण तालुक्यात दिलेल्या होड्यांना भाजपाचा आक्षेप
पर्यटकांची वर्दळ असलेल्या मालवणसाठी फक्त ४ ते ५ आसनी क्षमतेचीच होडी का ?
होडी जनतेसाठी आहे की वैयक्तिक फायद्यासाठी ? पर्यटकांच्या सुरक्षिततेसाठी मोठी बोट आवश्यक
कुणाल मांजरेकर
मालवण : जिल्हा आपत्कालीन निधीतून मालवण तालुक्यात दोन बोटी जिल्हा प्रशासनाने उपलब्ध करून दिल्या आहेत. यातील १५ सीटरची बोट खोत जुवा बेटावरील जनतेसाठी मसुरे मर्ढे ग्रामपंचायतीला तर ४ ते ५ सीटरची बोट सिंधुदुर्ग किल्ल्यासाठी वायरी ग्रामपंचायतीला आमदार वैभव नाईक यांच्या हस्ते सुपूर्द करण्यात आली आहे. मात्र या बोटींना भाजपने आक्षेप घेतला आहे. एकीकडे मसुरे साठी १५ सीटर क्षमतेची बोट उपलब्ध करून दिली जात असताना मोठ्या प्रमाणात जलपर्यटन चालणाऱ्या मालवण बंदरात केवळ ४ ते ५ आसन क्षमतेची मर्यादित बोट का ? असा सवाल भाजपचे प्रभारी शहर मंडल अध्यक्ष विजय केनवडेकर यांनी केला आहे. सिंधुदुर्ग किल्यावर एका होडीतून किमान २० पर्यटकांची ने आण केली जाते. त्यामुळे सिंधुदुर्ग किल्ल्यासाठी देण्यात आलेली बोट वैयक्तिक फायद्यासाठी आहे का ? असा सवाल करून येथील स्थानिक रहिवाशी आणि पर्यटकांच्या सुरक्षिततेसाठी मोठी आणि अत्याधुनिक बोट देण्यात यावी, अशी मागणी जिल्हाधिकाऱ्यांकडे करणार असल्याचे श्री. केनवडेकर यांनी म्हटले आहे.
या संदर्भात प्रसिध्दीस दिलेल्या पत्रकात त्यांनी म्हटले आहे की, आपत्कालीन विभाग सिंधुदुर्ग मार्फत मालवण तालुक्यात दोन आपत्कालीन होड्या देण्यात आल्या आहेत. मर्डे मसुरे ग्रामपंचायत व वायरी ग्रामपंचायत यांना या होड्या सुपूर्द करण्यात आल्या आहेत. या होड्या देताना कोणताही विचार न करता देण्यात आल्या आहेत, असे निदर्शनात येते. वायरी ग्रामपंचायतीला दिलेली होडी ही लहान असून चार ते पाच सीटर होडी आहे व चार हॉर्स पॉवरचे या होडीला इंजिन आहे. मर्डे ग्रामपंचायतीला दिलेली होडी पंधरा ते सोळा सीटर असून १५ हॉर्स पॉवरचे मशीन या होडीला आहे. वायरी ग्रामपंचायतीला दिलेली होडी पर्यटनदृष्ट्या आवश्यक आहे व पर्यटकांच्या सुरक्षतेसाठी पण आवश्यक आहे. कारण सिंधुदुर्ग किल्ल्यावर जाण्यासाठी दर वर्षी तीन ते चार लाख पर्यटक होडीने प्रवास करत असतात. स्थानिक प्रवासी होड्यांना वीस प्रवाशांची वाहतूक करण्याचा परवाना आहे. मालवण बंदर जेटी ते सिंधुदुर्ग किल्ला असा प्रवास होत असतो. त्यामुळे येथे आपत्कालीन बोट असणे आवश्यकच आहे. त्याचबरोबर छोट्या होड्यांमधून होणारी मच्छीमारी, वेगवेगळे वॉटर स्पोर्ट्स याच भागात होत असल्याने आपत्कालीन विभागाने उपलब्ध केलेली बोट ही उपयोगाची असून ही उपलब्ध केल्याबद्दल अभिनंदनच! पण एका वेळी २० प्रवासी प्रवास करत असताना आपत्कालीन विभागाची बोट मोठी व मोठ्या क्षमतेचे इंजिन असणारी आवश्यक होती. प्रशासनाने कोणताही विचार न करता आणलेली ही आपत्कालीन बोट वैयक्तिक फायद्यासाठी आहे ? की सार्वजनिक उपयोगासाठी आहे ? असा प्रश्न पडतो. ज्या ठिकाणी मर्डे -मसुरे ग्रामपंचायतीला मोठी बोट उपलब्ध होते. तर मालवणला सर्वात जास्त पर्यटक ठिकाणी येतात, अशा शहराला, ग्रामपंचायतीला मोठी बोट का उपलब्ध होत नाही ? असा प्रश्न पडतो. याच बोटीचा लोकार्पण सोहळा आमदार वैभव नाईक करतात, हा दुजाभाव लोकप्रतिनिधी म्हणून आमदारांच्या निदर्शनात येत नाही का ? मोठी बोट उपलब्ध करून देण्यासाठी व पर्यटनाच्या दृष्टीने, पर्यटनाच्या सुरक्षिततेच्या दृष्टीने आपत्कालीन बोट मोठी व अत्याधुनिक असण्याची आवश्यकता आहे. अशी बोट उपलब्ध करून देण्यासाठी सिंधुदुर्ग- जिल्हाधिकारी यांच्याकडे भारतीय जनता पार्टी मागणी करणार आहे, असे विजय केनवडेकर यांनी म्हटले आहे.
