“क्वांटीटी नको, क्वालिटी जपा”; सर्वाना न्याय देऊन क्लब वाढवा !
लायन्स क्लब ऑफ मालवणच्या पदग्रहण सोहळ्यात विरेंद्र चिखले यांचे प्रतिपादन
मालवण | कुणाल मांजरेकर
लायन्स क्लब ऑफ मालवणला ४३ वर्षांची परंपरा आहे. ही परंपरा जपत नवनियुक्त लायन्स पदाधिकाऱ्यांनी क्वांटीटी पेक्षा क्वालिटी जपत आगामी काळात वाटचाल करावी. दुर्योधनाकडे सैन्य भरपूर होते. पण अर्जुनाने श्रीकृष्णाला बरोबर घेतले, म्हणून महाभारतात पांडव जिंकले. हे लक्षात ठेवून काम करा. सर्वाना न्याय द्या आणि तुमच्या कार्यकाळाची आठवण समाजाने काढली पाहिजे, असे काम करा, अशा शब्दांत लायन्स क्लबचे डिस्ट्रिक्ट जीएसटी कॉर्डिनेटर एमजेएफ ला. विरेंद्र चिखले यांनी मालवण क्लबच्या पदग्रहण सोहळ्यात नवनियुक्त पदाधिकाऱ्यांना शुभेच्छा दिल्या.
लायन्स क्लब ऑफ मालवणच्या नूतन अध्यक्ष सौ. वैशाली शंकरदास, सचिव सौ. अनुष्का चव्हाण, खजिनदार सौ. अंजली आचरेकर यांच्यासह संचालक मंडळाचा शपथविधी आणि पदग्रहण सोहळा रविवारी दैवज्ञ भवनच्या सभागृहात संपन्न झाला. यावेळी MJF ला. विरेंद्र चिखले यांनी नूतन पदाधिकाऱ्यांना शपथ दिली. यावेळी व्यासपीठावर झोन चेअरमन सागर तेली, मावळते अध्यक्ष विश्वास गावकर, सचिव सौ. जयश्री हडकर, नूतन अध्यक्षा सौ. वैशाली शंकरदास, नूतन सचिव सौ. अनुष्का चव्हाण, खजिनदार सौ. अंजली आचरेकर आदी मान्यवर उपस्थित होते. यावेळी लायन्स सदस्यांच्या गुणवंत मुलांचा उपस्थित मान्यवरांच्या हस्ते सत्कार करण्यात आला. तसेच प्रतिकूल परिस्थितीत दहावीत 93.20 % गुण मिळवणाऱ्या कांदळगावच्या कु. भूमी आचरेकर हिचा लायन्स क्लब आणि उमेश नेरुरकर यांच्यावतीने रोख रक्कम देऊन विशेष सन्मान करण्यात आला. झोन चेअरमन सागर तेली यांनी मालवण क्लबला आज दुर्गाशक्ती लाभल्याचे सांगून मालवण क्लबने आजपर्यंत नेहमीच झोन मध्ये उल्लेखनीय काम केल्याचे सांगितले. कार्यक्रमाचे सूत्रसंचालन उदय घाटवळ आणि सौ. स्नेहा जामसंडेकर यांनी केले. तर सौ. अनुष्का चव्हाण यांनी आभार मानले.
समाजाच्या गरजेनुसार सेवाकार्य राबवणार : वैशाली शंकरदास
यावेळी बोलताना नूतन अध्यक्षा सौ. वैशाली शंकरदास यांनी मागील १० वर्षे लायनेस क्लबमध्ये काम करताना प्रत्येक पदाला न्याय देण्याचा आपण प्रयत्न केला, असे सांगून लायन्स अध्यक्ष म्हणून काम करताना समाजाच्या गरजेनुसार सेवा कार्याचे आयोजन करणार असून वेगवेगळे कार्यक्रम राबविणार असल्याचे सांगितले. तर नूतन सचिव अनुष्का चव्हाण यांनी आपण सर्वजण एकजुटीने काम करूया, असे सांगून या वर्षभरात मालवण क्लबचे नाव टॉप १० मध्ये नेण्यासाठी प्रयत्न करणार असल्याचे सांगितले. सर्व सहकाऱ्यांनी तन मन धन अर्पून लायन्सच्या सेवकार्यात सहभाग नोंदवावा, असे आवाहन त्यांनी केले. तर खजिनदार सौ. अंजली आचरेकर यांनी लायन्स क्लब हा सामाजिक भावनेची जाणीव करून देणारा क्लब असल्याचे सांगून माझ्यावर दिलेली जबाबदारी पूर्ण करण्याचा मी प्रयत्न करेन, अशी ग्वाही दिली.
या कार्यक्रमात लायन्स क्लब ऑफ मालवणच्या २०२२-२३ साठीच्या नूतन संचालक मंडळाला शपथ देण्यात आली. यामध्ये माजी अध्यक्ष- विश्वास गावकर, प्रथम उपाध्यक्ष- सहदेव बापर्डेकर, द्वितीय उपाध्यक्ष- श्याम नार्वेकर, तृतीय उपाध्यक्ष- सचिन शारबिद्रे, सहसचिव- सौ. स्नेहा जामसंडेकर, सहखजिनदार – सौ. मीना घुर्ये, टेल ट्विस्टर – सौ. राधिका मोंडकर, टेमर – सौ. सोनाली पाटकर, स्वच्छ भारत – सौ. रुपा कांदळगावकर, लायन्स क्वेस्ट – सौ. दीक्षा गावकर, मेंबरशीप चेअरमन – सौ. जयश्री हडकर, पीआरओ -राजा शंकरदास, जीएसटी चेअरमन – डॉ. अमोल झाटये, जीएलटी चेअरमन – दत्ताराम रेवणकर, जीएमटी चेअरमन – विराज आचरेकर,
संचालक – डॉ. शशिकांत झाटये, नाना साईल, महेश अंधारी, रुजारिओ पिंटो, लक्ष्मीकांत खोबरेकर, मुकेश बावकर, उमेश नेरूरकर, अरविंद सराफ, उमेश शिरोडकर, मोहन पटेल, गणेश प्रभुलीकर, अवधूत चव्हाण, उदय घाटवळ, महेश कारेकर, शांती पटेल यांचा समावेश आहे.
