कुडाळच्या स्टेट बँकेत चाकूचा धाक दाखवून दरोड्याचा प्रयत्न!

महिला कर्मचाऱ्याच्या गळ्याला लावला चाकू; लाखोंची रोकड लुटण्याचा डावनागरिकांच्या सतर्कतेमुळे संशयिताला पकडून पोलिसांच्या स्वाधीन

कुडाळ (प्रतिनिधी) : कुडाळ शहरातील पानबाजार येथील स्टेट बँक ऑफ इंडिया (एसबीआय) शाखेत मंगळवारी दुपारी भरवस्तीत दरोड्याचा प्रयत्न झाल्याने शहरात खळबळ उडाली. एका संशयित तरुणाने बँकेतील महिला कर्मचाऱ्याच्या गळ्याला चाकू लावून तिला धमकावत लाखो रुपयांची रोकड लुटण्याचा प्रयत्न केला. मात्र, बँक कर्मचाऱ्यांची सतर्कता आणि स्थानिक नागरिकांच्या प्रसंगावधानामुळे दरोड्याचा डाव उधळला. रोकड घेऊन पळून जाण्याच्या प्रयत्नात असलेल्या संशयिताला नागरिकांनी पकडून पोलिसांच्या ताब्यात दिले.

मिळालेल्या माहितीनुसार, मंगळवारी दुपारी सुमारे पावणेतीनच्या सुमारास एक संशयित तरुण पानबाजार येथील एसबीआय शाखेत शिरला. त्याने अचानक एका महिला कर्मचाऱ्याच्या गळ्याला चाकू लावून तिला धमकावले. त्यानंतर तिला जबरदस्तीने कॅश स्टॉक असलेल्या ठिकाणी नेले आणि तेथील लाखो रुपयांची रोकड पिशवीत भरण्यास सुरुवात केली. या प्रकारामुळे बँकेत एकच गोंधळ उडाला.

बँकेतील आरडाओरड ऐकून परिसरातील नागरिकांनी तातडीने धाव घेतली. संशयित तरुण रोकड घेऊन बाहेर पडून पळून जाण्याच्या प्रयत्नात असताना नागरिकांनी त्याचा पाठलाग करून त्याला पकडले. यावेळी संतप्त नागरिकांनी त्याला चोप दिल्यानंतर पोलिसांच्या स्वाधीन केले. दरम्यान, नागरिकांच्या सतर्कतेमुळे मोठी लूट टळल्याची प्राथमिक माहिती आहे. बँकेतील रोकड सुरक्षित असल्याचेही समजते. मात्र, महिला कर्मचाऱ्याच्या गळ्याला चाकू लावून दरोड्याचा प्रयत्न झाल्याने बँकेतील कर्मचारी आणि परिसरातील नागरिकांमध्ये भीतीचे वातावरण निर्माण झाले.

घटनेची माहिती मिळताच पोलीस निरीक्षक विकास बडवे, उपनिरीक्षक गुरु पाडावे आणि प्रमोद काळसेकर यांच्यासह पोलीस पथकाने घटनास्थळी धाव घेतली. पोलिसांनी संशयिताला ताब्यात घेऊन पुढील तपास सुरू केला आहे.या घटनेत संशयितासोबत आणखी कोणी सहभागी होते का, त्याने दरोड्याचा पूर्वनियोजित कट रचला होता का, याचा पोलीस तपास करीत आहेत. बँकेतील सीसीटीव्ही चित्रण आणि अन्य पुराव्यांच्या आधारे घटनेचा सविस्तर तपास सुरू आहे.भरदिवसा बँकेत चाकूचा धाक दाखवून लुटीचा प्रयत्न झाल्याने कुडाळ शहरातील बँकांच्या सुरक्षेचा प्रश्न पुन्हा ऐरणीवर आला आहे.

error: Content is protected !!