किराणा व्यावसायिकाचा गळफास घेतलेल्या स्थितीत मृतदेह
समीर मुंज यांच्या आकस्मिक निधनाने कोळंब परिसरात हळहळ
मालवण : तोंडवळी येथील मुळ रहिवासी असलेले समीर भगवान मुंज (वय-३७) यांचा मृतदेह गळफास लावलेल्या स्थितीत आज सायंकाळी ओझर येथील त्याच्या बंगल्यातील खोलीत सापडला. घरात कोणीही नसल्याने घराच्या परिसरात राहणाऱ्या व्यक्तींनी खिडकीतून खोलीत प्रवेश करत समीर याचा मृतदेह खाली उतरविला. समीर याच्या मृत्यूचे नेमके कारण स्पष्ट झाले नाही. समीर याने गळफास घेवून आत्महत्या केल्याची शक्यता वर्तविण्यात येत आहे. पोलीस घटनास्थळी दाखल झाले होते.
समीर मुंज याने कोळंब येथे किराणा मालाचे दुकाने घातले होते. सर्जेकोट, कोळंब, रेवंडी, कांदळगाव, ओझर या परिसरातील ग्रामस्थ याठिकाणी खरेदीसाठी येत असत. मुंज याने अल्पावधीतच आपल्या व्यवसायात जम बसविला होता. मुंज यांचे तोंडवळी येथेही रास्तधान्य दुकान आणि किराणा मालाचे दुकान होते. यामुळे कुटुंबाचा व्यवसाय त्यांनी कोळंब येथे सुरू केला होता. तो मनमिळावू व हसतमुख स्वभावाचा असल्याने अनेकांना परोपकारी वृत्तीने सहकार्य करत असे.
समीर हा ओझर येथे घेतलेल्या बंगल्यात पत्नी, मुलीसोबत राहत होता. बाळंतपणासाठी समीर याची पत्नी माहेरी कुडाळ याठिकाणी गेली होती. यामुळे समीर घरात एकटाच राहत होता. तो जेवणासाठी आणि चहासाठी घरच्या परिसरातील एका कुटुंबियांकडे नेहमी जात असे. आज दुपारी तो जेवणासाठी घरी आला नाही तसेच चहा पिण्यासाठीही तो न आल्याने त्याची चौकशी करण्यासाठी गेले असता घर आतून बंद असल्याचे दिसून आले. यामुळे परिसरातील नागरिकांनी त्याच्या खोलीत खिडकीतून आत प्रवेश केला असता तो गळफास घेतलेल्या स्थितीत दिसून आला. त्यानंतर सुरीच्या सहाय्याने गळफास घेतलेली ओढणी कापून त्याला खाली उतरविण्यात आले. त्यानंतर त्याची बहिणीला या घटनेची माहिती देण्यात आली. तसेच पत्नीलाही ग्रामस्थांनी माहिती दिली. काही वेळानंतर समीर याची आई आणि भाऊ बंगल्याच्या ठिकाणी आल्यानंतर त्याच्या आईने टाहो फोडला. यावेळी उपस्थितांचेही डोळे पाणावले होते.
पोलीस निरीक्षक विजय यादव यांच्या मार्गदर्शनाखाली पोलीसांचे एक पथक तातडीने घटनास्थळी दाखल झाले. यावेळी सहाय्यक पोलीस निरीक्षक सचिन चव्हाण, हेमंत पेडणेकर, प्रतीक जाधव, कैलास ढोले तसेच इतर पोलीस कर्मचारी उपस्थित होते. समीर याने आत्महत्या केल्याची बातमी सर्वत्र पसरताच त्याच्या बंगल्याच्या परिसरात त्याच्या मित्रपरीवाराने गर्दी केली होती.
