झाडी कटिंगपासून निर्जंतुकीकरण, विसर्जनस्थळांच्या स्वच्छतेपर्यंत विशेष मोहीम; निर्माल्य संकलनाचीही व्यवस्था
मालवण : गणेश चतुर्थी उत्सवाच्या पार्श्वभूमीवर शहरातील स्वच्छता आणि सार्वजनिक आरोग्य व्यवस्था अधिक सक्षम करण्यासाठी मालवण नगरपरिषद ॲक्शन मोडमध्ये आली आहे. नगराध्यक्षा सौ. ममता वराडकर आणि मुख्याधिकारी प्रतीक थोरात यांच्या मार्गदर्शनाखाली नगरपरिषदेच्या माध्यमातून शहरात विशेष स्वच्छता मोहीम युद्धपातळीवर राबविण्यात येत आहे.
गणेशोत्सव काळात नागरिक आणि भाविकांना स्वच्छ, सुरक्षित व आरोग्यदायी वातावरण मिळावे, यासाठी शहरातील विविध भागांमध्ये वाढलेली झाडी व गवत काढणे, ग्रास कटिंग, सार्वजनिक ठिकाणांची साफसफाई, निर्जंतुकीकरण तसेच जंतुनाशक फवारणीची कामे सुरू आहेत.
विशेषतः गणेश विसर्जन स्थळांच्या स्वच्छतेवर नगरपरिषदेने लक्ष केंद्रित केले असून, विसर्जनाच्या अनुषंगाने आवश्यक त्या ठिकाणी निर्माल्य संकलनाची व्यवस्था करण्यात आली आहे. उत्सव काळात स्वच्छता व्यवस्था सुरळीत राहावी यासाठी नगरपरिषदेच्या स्वच्छता विभागामार्फत आवश्यक ती कार्यवाही केली जात आहे.
‘स्वच्छतेची जबाबदारी नगरपरिषदेचीच नाही; नागरिकांचीही!’
गणेशोत्सव काळात शहराची स्वच्छता आणि सार्वजनिक आरोग्य व्यवस्था अबाधित ठेवण्यासाठी नागरिकांनी घरातील कचरा रस्त्यावर, नाल्यात किंवा सार्वजनिक ठिकाणी टाकू नये. कचरा नगरपरिषदेच्या नियमित कचरा संकलन व्यवस्थेकडेच सुपूर्द करावा. तसेच गणेश विसर्जनानंतरचे निर्माल्य आणि पूजासाहित्य सार्वजनिक ठिकाणी अथवा जलस्रोतांमध्ये न टाकता नगरपरिषदेने उपलब्ध करून दिलेल्या निर्माल्य संकलन व्यवस्थेचा वापर करावा, असे आवाहन करण्यात आले आहे.
गणेशोत्सव हा श्रद्धेचा आणि आनंदाचा उत्सव आहे. त्यामुळे उत्सवाची पावित्र्य राखतानाच मालवण शहर स्वच्छ, सुंदर आणि पर्यावरणपूरक ठेवण्यासाठी नागरिकांनी नगरपरिषदेला सहकार्य करावे, असे आवाहन नगराध्यक्षा सौ. ममता वराडकर आणि मुख्याधिकारी प्रतीक थोरात यांनी केले आहे.
Subscribe to my channel
