जागा मालकाकडून नगरपालिकेच्या मागच्या वर्षीच्या नोटीसीला “केराची टोपली”
उद्या दुर्घटना घडून जीवित अथवा वित्तहानी झाल्यास जबाबदार कोण? मनसेच्या गॅरी अन्ननसिएशन यांचा सवाल
मालवण | कुणाल मांजरेकर
मालवण बाजारपेठेत मध्यवर्ती ठिकाणी असलेल्या सदानंद कमलाकर मयेकर यांच्या मालकीची घर नं. १८९९ ही इमारत धोकादायक बनली असून या इमारतीचा स्लॅब कोसळल्याची दुर्घटना शनिवारी रात्री ९ वाजण्याच्या सुमारास घडली. यामुळे स्थानिकांमध्ये घबराट पसरली आहे. या इमारतीला वर्षभरापूर्वी नगरपालिकेने नोटीस बजावून इमारतीचा वापर थांबवण्याच्या सूचना दिल्या असताना देखील याचा वापर सुरु असून पालिकेचे येथे दुर्लक्ष होत आहे. आता येथील स्लॅब कोसळू लागल्याने उद्या येथे जीवित अथवा वित्तहानी झाल्यास जबाबदार कोण? असा सवाल मनसे तालुकाध्यक्ष गॅरी अन्ननसिएशन यांनी केला आहे.
बाजारपेठेतील सदानंद मयेकर यांच्या मालकीच्या या इमारतीत पालव टेलर्स हे दुकान आणि वरच्या मजल्यावर दोन भाडेकरू आहेत. हे भाडेकरू येथे राहत नाहीत. हीइमारत धोकादायक असल्याने स्थानिक नागरिकांच्या जीवितास धोका निर्माण झाला आहे. मागील वर्षी मालवण नगरपालिकेने सदानंद मयेकर यांना १५ मे २०२५ ला नोटीस पाठवून या इमारतीचा वापर थांबवण्याच्या सूचना केल्या होत्या. मात्र या नोटीसीला केराची टोपली दाखवण्यात आली असून इमारतीचा वापर बिनदिक्कतपणे सुरु आहे.
नेमकं काय म्हटलं आहे, नगरपालिकेच्या नोटिशीत?
मालवण येथील म्युनिसिपल घर नं. १८९९ हि इमारत जुनी झाली असल्याने व मोडकळीस आली असल्यामुळे धोकादायक झालेली असल्याचे निदर्शनास आलेले आहे. सदर इमारत कधीही कोसळण्याची शक्यता असून त्यामुळे जीवित व वित्त हानी होण्याची शक्यता आहे. सबब, संभाव्य हानी टाळण्यासाठी इमारतीचा वापर चालू असल्यास तो त्वरित थांबवून सदर इमारतीचा धोकादायक भाग / संपूर्ण इमारत त्वरित काढून घ्यावा. इमारतीचा पुनश्चः वापर सुरु करण्यापूर्वी, सदर इमारतीची तपासणी नोंदणीकृत स्ट्रक्चरल इंजीनिअर (Structural Engineer) मार्फत करून घेऊन नोंदणीकृत स्ट्रक्चरल इंजीनिअर यांनी तपासणी प्रमाणपत्र व अहवाल दिल्यानंतर त्यामध्ये इमारतीच्या दुरुस्ती अथवा पुनर्बाधणी संबंधित कोणत्याही सूचना दिल्या असल्यास दुरुस्ती अथवा पुनर्बाधणी संबंधित बदल करण्याचीं कार्यवाही, महाराष्ट्र प्रादेशिक व नगररचना अधिनियम, १९६६ चे कलम ४४ अन्वये या कार्यालयाची रितसर परवानगी घेऊन पूर्ण करणे आवश्यक आहे. वरील प्रमाणे इमारतीचा धोकादायक भाग काढून घेण्याची तसेच योग्य ती पूर्व परवानगी घेऊन इमारत दुरुस्तीबाबत आपल्याकडून कोणतीही कार्यवाही न झाल्यास व इमारतीच्या कोणत्याही भागाचे नुकसान/पडझड होऊन जीवित व वित्त हानी झाल्यास त्यास सर्वस्वी आपण जबाबदार राहाल याची नोंद घावी.
नगरपालिकेच्या नोटीसी नंतर देखील या इमारतीचा वापर सुरूच असून नगरपालिकेचे याठिकाणी दुर्लक्ष झाले आहे. त्यामुळे आता या इमारतीचा स्लॅब कोसळण्यास सुरुवात झाली आहे. काल रात्री ९, वाजता याठिकाणचा स्लॅब कोसळल्याने स्थानिकांमध्ये घब राट निर्माण झाली आहे. मनसे तालुकाध्यक्ष गॅरी अन्ननसिएशन यांनी याठिकाणची पाहणी करुन ही धोकादायक इमारत तात्काळ बंद करुन याची दुरुस्ती किंवा पुनर्बांधणी किंवा दुरुस्ती करुन घेण्याची मागणी केली आहे.
Subscribe to my channel
