२४ ते ३० ऑक्टोबरदरम्यान विविध धार्मिक, सांस्कृतिक कार्यक्रमांचे आयोजन; ३० ऑक्टोबरला ढोल-ताशांच्या गजरात श्रींची भव्य विसर्जन मिरवणूक
मालवण | कुणाल मांजरेकर
मालवण सोमवार पेठमधील श्री हनुमान मंदिर सार्वजनिक गणेशोत्सव मंडळाच्या वतीने गणेशोत्सव २०२६ निमित्त २४ ते ३० ऑक्टोबर या कालावधीत विविध धार्मिक, सांस्कृतिक आणि मनोरंजनात्मक कार्यक्रमांचे आयोजन करण्यात आले आहे. श्री सत्यनारायण महापूजा, सुश्राव्य भजन, जंगी डबलबारी सामना, पारंपरिक दशावतारी नाट्यप्रयोग, वारकरी भजन, चित्रपट प्रदर्शन, अथर्वशीर्ष पठण आणि महाप्रसाद अशा भरगच्च कार्यक्रमांची मेजवानी भाविकांना अनुभवता येणार आहे.
शनिवार, २४ ऑक्टोबर रोजी दुपारी १२ वाजल्यापासून श्री सत्यनारायण महापूजा आणि तीर्थप्रसादाचा कार्यक्रम होणार आहे. सायंकाळी ७ वाजता सुश्राव्य भजन, तर रात्री १० वाजता आमने-सामने २०×२० डबलबारीचा जंगी सामना रंगणार आहे. या सामन्यात श्री लिंगेश्वर प्रासादिक भजन मंडळ, कुडाळ-भरणीचे बुवा विनोद चव्हाण आणि महाडेश्वर प्रासादिक भजन मंडळ, नाडण (ता. देवगड) यांचे बुवा संदीप पुजारे यांच्यात मुकाबला होणार आहे. या कार्यक्रमात ‘गणपती आणि यमधर्म युद्ध’ हे भारुड विशेष आकर्षण ठरणार आहे.
दशावतार नाट्यप्रयोगाची रसिकांना मेजवानी
सोमवार, २६ ऑक्टोबर रोजी सायंकाळी ६.३० वाजता सुश्राव्य भजन होईल. रात्री १० वाजता श्री दत्त माऊली संयुक्त दशावतार नाट्य मंडळ, सिंधुदुर्ग यांचा पारंपरिक दशावतारी नाट्यप्रयोग सादर होणार असून, ‘वाक्रकली अम्मन’ अर्थात ‘चतुरंग’ हे नाटक रसिकांना पाहायला मिळणार आहे.
मंगळवार, २७ ऑक्टोबर रोजी सकाळी ९ वाजता लघुरुद्र, तर रात्री १० वाजता ‘हनुमान अंश’ हा हिंदी चित्रपट दाखविण्यात येणार आहे. बुधवारी, २८ ऑक्टोबर रोजी सायंकाळी ७ वाजता वारकरी भजन आणि रात्री १० वाजता ‘दृश्यम ३’ या हिंदी चित्रपटाचे प्रदर्शन आयोजित करण्यात आले आहे.
संकष्टी चतुर्थीनिमित्त अथर्वशीर्ष पठण आणि महाआरती
गुरुवार, २९ ऑक्टोबर रोजी संकष्टी चतुर्थीनिमित्त अथर्वशीर्ष पठण आणि सहस्र दुर्वा अर्पण करण्यात येणार आहे. रात्री ७.३० वाजता श्री महालक्ष्मी बाळ गोपाळ मंडळ, रेवतळे यांच्या सौजन्याने महाआरती होणार आहे.
शुक्रवारी महाप्रसाद; ढोल-ताशांच्या गजरात विसर्जन मिरवणूक
शुक्रवार, ३० ऑक्टोबर रोजी दुपारी १२ वाजल्यापासून महाप्रसादाचे आयोजन करण्यात आले आहे. सायंकाळी ६.३० वाजता सिंधुगर्जना ढोल-ताशा पथक, कणकवली यांच्या ढोल-ताशांच्या गजरात आणि पारंपरिक चलचित्र देखाव्यांसह श्रींची भव्य विसर्जन मिरवणूक काढण्यात येणार आहे. धार्मिक श्रद्धा, पारंपरिक भजन संस्कृती, दशावतार आणि मनोरंजन यांचा सुरेख संगम असलेल्या या गणेशोत्सवात भाविकांनी आणि गणेशभक्तांनी मोठ्या संख्येने सहभागी होऊन सर्व कार्यक्रमांचा लाभ घ्यावा, असे आवाहन श्री हनुमान मंदिर सार्वजनिक गणेशोत्सव मंडळ, मालवण यांच्या वतीने करण्यात आले आहे.
Subscribe to my channel
