कुडाळमध्ये ९८ किलो मावा, तर कणकवलीत खवा आणि फराळाचा साठा जप्त; पाच दिवसांत १३ तपासण्या, १७ नमुने संकलित
सिंधुदुर्ग : दिवाळी सणाच्या पार्श्वभूमीवर मिठाई आणि फराळाच्या पदार्थांमध्ये भेसळ होण्याची शक्यता लक्षात घेऊन अन्न व औषध प्रशासनाने सिंधुदुर्ग जिल्ह्यात विशेष तपासणी मोहीम राबवली. या मोहिमेत तब्बल ४३ हजार ५८५ रुपयांचा संशयास्पद अन्नसाठा जप्त करण्यात आला आहे. पाच दिवस चाललेल्या या मोहिमेत जिल्ह्यात १३ ठिकाणी तपासणी करण्यात आली असून, विविध अन्नपदार्थांचे १७ नमुने प्रयोगशाळेतील तपासणीसाठी संकलित करण्यात आले आहेत.
या कारवाईत कुडाळ येथे तब्बल ९८ किलो मावा जप्त करण्यात आला. त्याची किंमत ३९ हजार २०० रुपये आहे. तर कणकवली येथे ६ किलो खवा, किंमत २ हजार १४५ रुपये, जप्त करण्यात आला. याशिवाय कणकवलीतून ३ किलो पोहा चिवडा आणि ५ किलो शेव चिवडा असा एकूण ८ किलो फराळाचा साठा जप्त करण्यात आला. या फराळाची किंमत २ हजार २४० रुपये आहे.
या विशेष मोहिमेदरम्यान मोतीचूर लाडू, बुंदी लाडू, खवा-मावा, विविध प्रकारच्या मिठाई तसेच फरसाण यांचे नमुने घेण्यात आले आहेत. जप्त करण्यात आलेल्या अन्नपदार्थांचे नमुने प्रयोगशाळेत तपासणीसाठी पाठविण्यात आले आहेत. या तपासणीचा अहवाल प्राप्त झाल्यानंतर संबंधित विक्रेते आणि उत्पादकांविरुद्ध अन्न सुरक्षा व मानके कायदा, २००६ अंतर्गत नियमानुसार कायदेशीर कारवाई करण्यात येणार असल्याची माहिती अन्न व औषध प्रशासनाच्या सहायक आयुक्तांनी दिली.
नागरिकांनी मिठाई-फराळ खरेदी करताना सावध राहावे
दिवाळीच्या सणात नागरिकांनी मिठाई आणि फराळाचे पदार्थ परवानाधारक विक्रेत्यांकडूनच खरेदी करावेत. खरेदी करताना पक्के बिल घ्यावे, पदार्थांची मुदत तपासावी आणि अनैसर्गिक गडद रंग असलेले अन्नपदार्थ खरेदी करणे टाळावे. अन्नपदार्थांमध्ये भेसळ असल्याचा संशय आल्यास तातडीने अन्न व औषध प्रशासनाकडे तक्रार करावी, असे आवाहन प्रशासनाने केले आहे.
Subscribe to my channel
