ज्येष्ठ नागरिकांसाठी लिफ्ट सुविधेचेही भूमिपूजन; रेल्वे प्रवाशांच्या अनेक वर्षांच्या मागणीला अखेर यश
कणकवली: कणकवली रेल्वे स्थानकावरील प्रवाशांची अनेक वर्षांपासूनची प्रतीक्षा अखेर संपली आहे. प्लॅटफॉर्म क्रमांक २ वर प्रवाशांच्या सोयीसाठी उभारण्यात आलेल्या निवारा शेडचे उद्घाटन पालकमंत्री नितेश राणे यांच्या हस्ते करण्यात आले. यासोबतच ज्येष्ठ नागरिक आणि प्रवाशांच्या सुविधेसाठी प्रस्तावित लिफ्टच्या कामाचे भूमिपूजनही करण्यात आले. या दोन्ही सुविधांमुळे रेल्वे प्रवाशांना मोठा दिलासा मिळणार आहे.
कणकवली रेल्वे स्थानकावर प्लॅटफॉर्म क्रमांक २ वर निवारा शेड नसल्याने पाऊस आणि कडक उन्हात रेल्वेची प्रतीक्षा करताना प्रवाशांना मोठ्या गैरसोयीचा सामना करावा लागत होता. प्रवासी संघटना आणि स्थानिक नागरिकांकडून अनेक वर्षांपासून शेड उभारण्याची मागणी केली जात होती. या मागणीसाठी रेल्वे प्रशासनाकडे सातत्याने पाठपुरावा करण्यात आला. अखेर या प्रयत्नांना यश आले असून प्रवाशांसाठी ही महत्त्वाची सुविधा उपलब्ध झाली आहे.
कोकण रेल्वे ही कोकणातील नागरिकांसाठी मुंबईसह राज्याच्या आणि देशाच्या विविध भागांशी जोडणारी जीवनवाहिनी आहे. दररोज हजारो प्रवासी या रेल्वेने प्रवास करतात. त्यामुळे स्थानकांवर मूलभूत सुविधा उपलब्ध करून देण्याची आवश्यकता लक्षात घेऊन खासदार नारायण राणे यांच्या माध्यमातून रेल्वे प्रशासनाकडे सातत्याने पाठपुरावा सुरू आहे.
यावेळी बोलताना पालकमंत्री नितेश राणे म्हणाले की, कणकवली रेल्वे स्थानकावर प्लॅटफॉर्म क्रमांक २ वर शेड उभारण्याची मागणी अत्यंत जुनी होती. प्रवासी संघटनेनेही यासाठी सातत्याने पाठपुरावा केला होता. रेल्वे खात्याशी समन्वय साधून ही मागणी मार्गी लावण्यात आली असून आज या सुविधेचे उद्घाटन करताना आनंद होत आहे. कोकण रेल्वे ही आपल्या भागातील नागरिकांसाठी अत्यंत महत्त्वाची सेवा आहे. रेल्वेची वाट पाहताना प्रवाशांना उन्हापावसाचा त्रास होऊ नये, त्यांची गैरसोय कमी व्हावी, यासाठी आवश्यक सुविधा उपलब्ध करून देण्याचा आमचा प्रयत्न आहे.
ते पुढे म्हणाले की, ज्येष्ठ नागरिकांसाठी लिफ्टची मागणीही करण्यात आली होती. त्यानुसार लिफ्ट सुविधेच्या कामाचे भूमिपूजन करण्यात आले असून लवकरात लवकर ही सुविधाही प्रवाशांच्या सेवेत दाखल होईल. खासदार नारायण राणे यांच्या माध्यमातून प्रवाशांच्या मागण्या टप्प्याटप्प्याने पूर्ण करण्याचे काम सुरू आहे. आगामी काळात कणकवलीसह सिंधुदुर्ग आणि संपूर्ण कोकणातील रेल्वे स्थानकांवर प्रवाशांना आवश्यक सुविधा मिळाव्यात, यासाठी केंद्र सरकार आणि रेल्वे प्रशासनाच्या माध्यमातून प्रयत्न सुरू राहतील, असा विश्वास त्यांनी व्यक्त केला.
यावेळी मंडल रेल्वे व्यवस्थापक (रत्नागिरी) शैलेश बापट, उपमुख्य कार्यकारी अभियंता संजय किल्लेदार, गोकुळ सोनवणे (ए.एस.सी., रत्नागिरी), राजेश सुरवाडे (पीआय, आरपीएफ कणकवली), सभापती हर्षदा वाळके, उपसभापती राजेश सावंत, पंचायत समिती सदस्य प्रदीप गावडे, माजी उपनगराध्यक्ष बंडू हर्णे, नगरसेवक राकेश राणे, दादू राणे, मेघा गांगण, पप्पू पुजारे, अमोल रासम, सागर राणे आदी उपस्थित होते.





Subscribe to my channel




