सहदेव बापर्डेकर- अश्विनी कांदळकरांनी वेधले वीज अधिकाऱ्यांचे लक्ष
मालवण : शहरातील वीजपुरवठा आणि स्ट्रीट लाईटच्या समस्यांमुळे नागरिकांची होणारी गैरसोय तातडीने दूर करा, अशी मागणी मालवण नगरपरिषदेचे बांधकाम सभापती सहदेव बापर्डेकर आणि महिला बालकल्याण उपसभापती अश्विनी कांदळकर यांनी वीज वितरण विभागाकडे केली आहे.
मालवण वीज वितरण कार्यालयात वीज अधिकाऱ्यांची भेट घेत शहरातील प्रलंबित वीज व स्ट्रीट लाईटच्या प्रश्नांचा थेट जाब यावेळी विचारण्यात आला. नागरिकांच्या तक्रारींकडे दुर्लक्ष न करता त्यावर तातडीने प्रत्यक्ष कार्यवाही करण्याची मागणी करण्यात आली. यावेळी अनिल कांदळकर उपस्थित होते.
मेढा-कुंभार गल्ली-कोतेवाड्यात अंधाराचा प्रश्न!
मेढा, कुंभार गल्ली आणि कोतेवाडा परिसरातील स्ट्रीट लाईटची समस्या अनेक दिवसांपासून नागरिकांसाठी त्रासदायक ठरत आहे. ही समस्या दूर करण्यासाठी आवश्यक फेज टाकण्याची मागणी नगरपरिषद स्तरावरून यापूर्वीच करण्यात आली आहे. मात्र, या कामाची कार्यवाही वेगाने पूर्ण करून नागरिकांची गैरसोय दूर करावी, अशी ठाम भूमिका यावेळी मांडण्यात आली.
वीज खांबांवरील झाडाझुडपांकडेही लक्ष द्या!
शहरातील अनेक भागांत वीज खांब आणि वीजवाहिन्यांवर मोठ्या प्रमाणात झाडांच्या वेली वाढल्या आहेत. त्यामुळे वीजपुरवठ्यात अडथळे निर्माण होण्यासोबतच संभाव्य धोका निर्माण होऊ शकतो. अशा ठिकाणी तातडीने पाहणी करून झाडाझुडपे आणि वेली हटवाव्यात, अशी मागणीही करण्यात आली.
“नागरिकांना तत्पर सेवा मिळाली पाहिजे. वीज आणि स्ट्रीट लाईटच्या समस्यांमुळे नागरिकांना त्रास होणार नाही, यासाठी संबंधित विभागाने तातडीने कार्यवाही करावी. आवश्यक ते सर्व सहकार्य नगरपरिषद स्तरावरून केले जाईल,” असे सहदेव बापर्डेकर यांनी स्पष्ट केले.
रात्रीचा अंधार म्हणजे सुरक्षेचा प्रश्न!
स्ट्रीट लाईट केवळ प्रकाशाची व्यवस्था नसून नागरिकांच्या सुरक्षिततेशी थेट संबंधित बाब आहे. विशेषतः रात्रीच्या वेळी शहरातील रस्ते आणि परिसर प्रकाशमान राहणे आवश्यक आहे. त्यामुळे बंद असलेल्या स्ट्रीट लाईटची दुरुस्ती, प्रलंबित तक्रारींचे निराकरण आणि धोकादायक वीजवाहिन्यांची पाहणी याबाबत तातडीने कार्यवाही करण्याची मागणी करण्यात आली.वीज वितरण विभागाच्या अधिकाऱ्यांनी संबंधित समस्यांवर तातडीने आवश्यक कार्यवाही करण्याचे आश्वासन दिले.
Subscribe to my channel
