आमदार प्रमोद जठार, संतोष साखरे यांनी नागरिकांशी साधला संवाद; विविध मागण्यांची निवेदने स्वीकारली
दापोली | प्रतिनिधी : दापोली तालुक्यातील नागरिकांच्या प्रलंबित प्रश्नांना वाचा फोडत त्यांच्या समस्या थेट जाणून घेण्यासाठी भारतीय जनता पक्षाच्या वतीने आयोजित करण्यात आलेले ‘सेवा अभियान’ उत्स्फूर्त प्रतिसादात संपन्न झाले. भाजपा महाराष्ट्र प्रदेशाध्यक्ष तथा आमदार रविंद्र चव्हाण यांच्या मार्गदर्शनाखाली झालेल्या या अभियानात आमदार प्रमोद जठार आणि संतोष साखरे यांनी नागरिकांशी थेट संवाद साधत त्यांच्या अडचणी जाणून घेतल्या.
दापोली येथील भाजपा कार्यालयात आयोजित या अभियानात तालुक्याच्या विविध भागांतून नागरिक मोठ्या संख्येने सहभागी झाले. यावेळी नागरिकांनी रस्ते, पाणीपुरवठा, वीज, शिक्षण, आरोग्य, शासकीय योजना, मूलभूत सुविधा तसेच स्थानिक विकासकामांशी संबंधित विविध प्रश्न मांडले. अनेक नागरिकांनी आपल्या मागण्यांची निवेदने सादर केली.
नागरिकांनी मांडलेल्या प्रत्येक प्रश्नाची आमदार प्रमोद जठार यांनी गांभीर्याने दखल घेतली. संबंधित विभागांशी समन्वय साधून प्रश्नांच्या सोडवणुकीसाठी आवश्यक तो पाठपुरावा करण्यात येईल, अशी ग्वाही त्यांनी दिली. केवळ समस्या ऐकून न घेता त्या प्रशासनाच्या माध्यमातून मार्गी लावण्यासाठी प्रयत्न करण्याचा निर्धार यावेळी व्यक्त करण्यात आला.
‘सेवा अभियान’च्या माध्यमातून जनतेशी थेट नाळ
भाजपच्या ‘सेवा अभियाना’चा उद्देश सर्वसामान्य नागरिकांच्या समस्या त्यांच्या दारापर्यंत जाऊन जाणून घेणे, त्या प्रशासनापर्यंत पोहोचविणे आणि त्यांच्या निराकरणासाठी सातत्याने पाठपुरावा करणे हा आहे. त्याच भूमिकेतून दापोलीतील नागरिकांशी थेट संवाद साधण्यात आला.
“जनतेचे प्रश्न हेच आमचे प्राधान्य असून, नागरिकांनी मांडलेल्या प्रत्येक प्रश्नाचा पाठपुरावा करून तो मार्गी लावण्यासाठी प्रयत्न केले जातील,” असा विश्वास यावेळी व्यक्त करण्यात आला. शासनाच्या विविध कल्याणकारी योजना आणि विकासकामांचा लाभ पात्र नागरिकांपर्यंत पोहोचविण्यासाठी भाजपा कार्यकर्त्यांनी अधिक सक्रियपणे काम करावे, असेही आवाहन करण्यात आले.
या अभियानामुळे नागरिकांना आपल्या समस्या थेट लोकप्रतिनिधी आणि पक्षाच्या पदाधिकाऱ्यांसमोर मांडण्याची संधी मिळाली. त्यामुळे दापोलीतील नागरिकांकडून या उपक्रमाला सकारात्मक प्रतिसाद मिळाला.
यावेळी रत्नागिरी जिल्हाध्यक्ष सतीश मोरे, भाजपा नेते वैभव खेडेकर, जिल्हा सरचिटणीस स्वानंद रानडे, अक्षय फाटक, दापोली तालुका अध्यक्ष जया साळवी, जिल्हा नियोजन समिती सदस्य केदार साठे, पंचायत समिती सदस्य भाऊ इदाते, तालुका अध्यक्ष सचिन होडबे, तालुका सरचिटणीस संदीप केळकर यांच्यासह भाजपा पदाधिकारी, कार्यकर्ते आणि नागरिक मोठ्या संख्येने उपस्थित होते.
Subscribe to my channel
