शिवसेनेच्या कुडाळ, मालवण तालुका प्रभारीपदी नियुक्ती
मालवण : शिवसेनेच्या आक्रमक महिला नगरसेविका तथा पालिकेच्या स्वच्छता व आरोग्य सभापती सौ. पूनम नागेश चव्हाण यांच्यावर जिल्ह्यात पक्षसंघटन अधिक बळकट करण्यासाठी आणखी एक महत्वाची जबाबदारी देण्यात आली आहे. शिवसेना महिला आघाडीच्या कुडाळ, मालवण तालुका प्रभारीपदी त्यांची नियुक्ती करण्यात आली असून शिवसेना महिला सेना जिल्हाप्रमुख दिपलक्ष्मी पडते यांनी त्यांना नियुक्ती पत्र देऊन पुढील वाटचालीस शुभेच्छा दिल्या.
वंदनीय हिंदुहृदयसम्राट शिवसेनाप्रमुख बाळासाहेब ठाकरे यांच्या आशीर्वादाने आणि शिवसेनेचे मुख्य नेते, महाराष्ट्राचे उपमुख्यमंत्री एकनाथ शिंदे यांच्या आदेशानुसार ही नियुक्ती करण्यात आली आहे. तसेच, स्थानिक पातळीवर आमदार निलेश राणे यांच्या विशेष मार्गदर्शनाखाली पुनम चव्हाण या कुडाळ आणि मालवण तालुक्यात महिला सेनेचे कार्य विस्तारणार आहेत. नियुक्ती पत्रात नमूद केल्याप्रमाणे, वंदनीय बाळासाहेब ठाकरे यांचा हिंदुत्वाचा विचार आणि धर्मवीर आनंद दिघे यांची शिकवण आत्मसात करून, सौ. चव्हाण या आगामी काळात दोन्ही तालुक्यांतील महिलांचे संघटन मजबूत करतील. सर्व महिला भगिनींना व सहकाऱ्यांना सोबत घेऊन पक्ष वाढीसाठी त्या जोमाने कार्य करतील, असा विश्वास शिवसेना महिला जिल्हाप्रमुख दिपलक्ष्मी पडते यांनी व्यक्त केला आहे.
Subscribe to my channel
