मनसे नेते बाळा नांदगावकर यांच्या नेतृत्वाखाली शिष्टमंडळाची जिल्हाधिकाऱ्यांशी भेट; ग्रामस्थांच्या मागण्या तात्काळ मान्य करण्याची मागणी
सिंधुदुर्ग :पिंगुळी येथील ऐतिहासिक पाझर तलाव वाचविण्यासाठी ग्रामस्थांनी सुरू केलेल्या उपोषणाला चार दिवस उलटूनही जिल्हाधिकारी उपोषणस्थळी भेट देण्यासाठी न आल्याने शिष्टमंडळाने नाराजी व्यक्त केली. मनसे नेते बाळा नांदगावकर यांच्या नेतृत्वाखालील शिष्टमंडळाने सिंधुदुर्गच्या जिल्हाधिकारी तृप्ती धोडमिसे यांची भेट घेऊन या प्रश्नावर सविस्तर चर्चा केली.
पिंगुळी येथील पाझर तलाव परिसरातील बांधकामाच्या प्रश्नावर ग्रामस्थांनी गेल्या चार दिवसांपासून कुडाळ प्रांताधिकारी कार्यालयासमोर बेमुदत उपोषण सुरू केले आहे. तलावाचे अस्तित्व आणि परिसराचे संरक्षण व्हावे, यासाठी ग्रामस्थ आंदोलन करत आहेत. मात्र, चार दिवस उलटूनही जिल्हाधिकाऱ्यांनी उपोषणस्थळी भेट देऊन ग्रामस्थांच्या मागण्या जाणून न घेतल्याबद्दल शिष्टमंडळाने थेट विचारणा करत आपली नाराजी व्यक्त केली.
यावेळी कुडाळ-मालवणचे माजी आमदार वैभव नाईक, माजी आमदार परशुराम उपरकर, मनसे नेते शिरीष सावंत, काँग्रेस तालुकाध्यक्ष अभय शिरसाट, मनसे जिल्हाप्रमुख धिरज परब तसेच श्री. दळवी यांचा शिष्टमंडळात समावेश होता.
उपोषण सोडविण्यासाठी तातडीने निर्णय घ्या!
पिंगुळी ग्रामस्थांच्या मागण्या तातडीने मान्य करून त्यांना न्याय द्यावा. प्रशासनाने ठोस निर्णय घेतल्यास उपोषण मागे घेण्याचा मार्ग मोकळा होऊ शकतो, अशी भूमिका शिष्टमंडळाने जिल्हाधिकाऱ्यांसमोर मांडली.दरम्यान, गृहनिर्माण प्रकल्पाच्या रेखांकनाबाबत तसेच संबंधित विकासकाच्या बांधकामाला स्थगिती देण्याचे पत्र देण्याबाबत जिल्हाधिकारी तृप्ती धोडमिसे यांनी सकारात्मक प्रतिसाद दिला. त्यामुळे पिंगुळी पाझर तलावाच्या प्रश्नावर प्रशासनाकडून पुढील कार्यवाहीकडे ग्रामस्थांचे लक्ष लागले आहे.
पाझर तलावाच्या संरक्षणासाठी सुरू असलेल्या या आंदोलनावर आता प्रशासन कोणता ठोस निर्णय घेणार, याकडे संपूर्ण परिसराचे लक्ष लागले आहे.
Subscribe to my channel
