गणेश चतुर्थीनंतर मुंबईत वरिष्ठ बंदर अधिकाऱ्यांच्या उपस्थितीत बैठक; पर्यटन व्यवसायिकांच्या प्रश्नांवर कायमस्वरूपी तोडग्यासाठी पाठपुरावा
मालवण : सिंधुदुर्ग जिल्ह्यातील लाईटहाऊस जलसफर व्यवसायिकांच्या विविध प्रश्नांवर तोडगा काढण्यासाठी सिंधुदुर्ग जिल्हा लाईटहाऊस जलसफर संघर्ष समितीचे पदाधिकारी तसेच शेकडो जलसफर व्यवसायिकांनी शुक्रवारी आमदार निलेश राणे यांची मालवण येथील नीलरत्न निवासस्थानी भेट घेतली. यावेळी जलसफर व्यवसायासंदर्भातील विविध अडचणी, नियम, परवानगी प्रक्रिया आणि पर्यटकांच्या सुरक्षेबाबत सविस्तर चर्चा झाली. चर्चेनंतर काही महत्त्वाचे प्रश्न तात्काळ सोडविण्यात आल्याने जलसफर व्यावसायिकांना दिलासा मिळाला.
जलसफर व्यवसाय हा सिंधुदुर्गच्या किनारपट्टीवरील स्थानिक पर्यटन आणि रोजगाराचा महत्त्वाचा भाग आहे. या व्यवसायासाठी मोठ्या प्रमाणावर गुंतवणूक करण्यात आली असून अनेक कुटुंबांची उपजीविका त्यावर अवलंबून आहे. त्यामुळे प्रशासनाच्या नियमांचे पालन करताना व्यवसाय सातत्याने सुरू राहावा, अशी भूमिका व्यावसायिकांनी यावेळी मांडली.
जलसुरक्षा आणि नियमांचे पालन केंद्रस्थानी
पर्यटकांची सुरक्षितता ही सर्वाधिक महत्त्वाची असून, जलसफर व्यवसायिकांकडून आवश्यक सुरक्षा साधने, लाईफ जॅकेट आणि संबंधित नियमांचे पालन यापुढेही केले जाईल, अशी ग्वाही व्यावसायिकांनी आमदार निलेश राणे यांच्यासमोर दिली.
निवती लाईटहाऊस तसेच म्हातारीची चुळ परिसरातील जलसफरीसंदर्भात निर्माण झालेल्या नियमांच्या प्रश्नामुळे व्यवसायावर परिणाम होत असल्याचे संघर्ष समितीने निवेदनाद्वारे निदर्शनास आणून दिले. संबंधित बोटी ‘इनलँड व्हेसल्स (IV) ॲक्ट’ अंतर्गत नोंदणीकृत असल्याने पाच नॉटिकल मैलांच्या मर्यादेबाबत प्रशासनाकडून आक्षेप घेतला जात असल्याचे समितीने सांगितले. मात्र, निवती लाईटहाऊस जलसफर ही खोल समुद्रातील मासेमारीसाठीची वाहतूक नसून साधारण ४५ ते ६० मिनिटांचा पर्यटन फेरा असल्याचे व्यावसायिकांनी स्पष्ट केले.
विशेष पर्यटन क्षेत्र घोषित करण्याची मागणी
या पार्श्वभूमीवर निवती लाईटहाऊस परिसराला विशेष पर्यटन क्षेत्र म्हणून अधिसूचित करून पाच नॉटिकल मैलांच्या मर्यादेबाबत योग्य ती शिथिलता देण्यात यावी, अशी मागणी संघर्ष समितीने केली आहे. कायमस्वरूपी तोडगा निघेपर्यंत जलसफारी पूर्ववत सुरू करण्यास परवानगी मिळावी, तसेच महाराष्ट्र मेरिटाईम बोर्ड आणि पर्यटन विभागाची नोंदणी व परवानगी प्रक्रिया सुलभ करण्यात यावी, अशी मागणीही करण्यात आली.
याबाबत आमदार निलेश राणे यांनी स्थानिक बंदर अधिकाऱ्यांशी चर्चा केली. व्यावसायिकांच्या समस्या, नियमांचे पालन आणि पर्यटकांची सुरक्षा या सर्व बाबींचा समन्वय साधून पुढील कार्यवाही करण्याबाबत सकारात्मक चर्चा झाली.
गणेश चतुर्थीनंतर मुंबईत निर्णायक बैठक
गणेश चतुर्थी उत्सवानंतर मुंबई येथे वरिष्ठ बंदर अधिकाऱ्यांच्या उपस्थितीत बैठक आयोजित करण्यात येणार असल्याची माहिती आमदार निलेश राणे यांनी दिली. या बैठकीस सिंधुदुर्ग जिल्हा लाईटहाऊस जलसफर संघर्ष समितीच्या प्रतिनिधींनाही निमंत्रित करण्यात येणार आहे. या बैठकीत जलसफर व्यवसायाशी संबंधित विविध महत्त्वाच्या प्रश्नांवर सविस्तर चर्चा करून व्यावसायिकांना दिलासा देण्यासाठी प्रयत्न केले जातील, असे आमदार निलेश राणे यांनी सांगितले.
यावेळी शिवसेना जिल्हाप्रमुख दत्ता सामंत, नगराध्यक्षा ममता वराडकर यांच्यासह विविध लोकप्रतिनिधींचे सहकार्य लाभल्याचे जलसफर व्यवसायिकांनी सांगितले.
व्यावसायिकांकडून आभार
चर्चेदरम्यान काही प्रश्न तात्काळ मार्गी लागल्याने जलसफर व्यावसायिकांनी आमदार निलेश राणे यांचे आभार मानले. पर्यटन व्यवसाय टिकविण्यासोबतच पर्यटकांची सुरक्षितता आणि शासनाच्या नियमांचे पालन यालाही प्राधान्य देत पुढील काळात काम करण्याची भूमिका व्यावसायिकांनी व्यक्त केली.
यावेळी सिंधुदुर्ग जिल्हा लाईटहाऊस जलसफर संघर्ष समितीचे अध्यक्ष मनोज खोबरेकर, उपाध्यक्ष प्रतीक कुबल, सचिव नागेश सारंग, खजिनदार सतीश टिकम यांच्यासह बाबली चोपडेकर, बाबा मोंडकर, बाबा परब, बबन शिंदे, विश्वास गावकर तसेच देवबाग, तारकर्ली, भोगवे, किल्ले निवती, श्रीरामवाडी-कोचरा, निवती, वेंगुर्ला आदी भागांतील समिती पदाधिकारी व शेकडो जलसफर व्यवसायिक उपस्थित होते.
Subscribe to my channel
