मालवण : सिंधुदुर्ग जिल्ह्याच्या सागरी जलधी क्षेत्रात विनापरवाना घुसखोरी करत मासेमारी करणाऱ्या गोव्यातील एलईडी पर्ससीन नौकेवर मत्स्यव्यवसाय विभागाच्या गस्ती पथकाने कारवाई करत ही नौका ताब्यात घेतली आहे. या नौकेवर नौका तांडेलसह इतर २० खलाशी असून नौका जप्त करून सर्जेकोट बंदरात ठेवण्यात आली आहे.
याबाबत मत्स्यव्यवसाय विभागाने दिलेल्या माहितीनुसार, शनिवारी ४ एप्रिल रोजी पहाटे ३.४५ वा. च्या सुमारास निवती समोरील समुद्रात मत्स्यव्यवसाय विभागाचे अंमलबजावणी अधिकारी गणेश टेमकर, सहाय्यक मत्स्यव्यवसाय विकास अधिकारी (परवाना अधिकारी, वेंगुर्ला) व सहाय्यक मत्स्य. विकास अधिकारी श्रीम. तेजस्विता करंगुटकर हे नियमित गस्त घालत होते. यावेळी गोवा राज्यातील श्रीमती पल्लवी साईहर्षद धोंड, रा. पणजी गोवा यांची नौका जय IV बॉस , नों.क्र.IND-GA-२-MM-3588 ही नौका महाराष्ट्र राज्याच्या जलधीक्षेत्रातून आवागमन करताना निदर्शनास आली. त्यावेळी नौकेच्या कागदपत्राची तपासणी करिता नौका पाठलाग करून थांबविली असता नौकेवर विधीग्राह्य कागदपत्रे आढळली नाहीत. त्यामुळे सदर नौकेची तपासणी केली असता नौकेवर अवैध/अनधिकृतरित्या LED मासेमारीचे साहित्य आढळले.
अंमलबजावणी अधिकारी श्री.गणेश टेमकर, सहाय्यक मत्स्यव्यवसाय विकास अधिकारी (परवाना अधिकारी, वेंगुर्ला) व सहाय्यक मत्स्य. विकास अधिकारी श्रीम. तेजस्विता करंगुटकर यांनी सागरी सुरक्षा पर्यवेक्षक व सागरी सुरक्षा रक्षक यांचे सहकार्याने सहायक आयुक्त मत्स्यव्यवसाय, सिंधुदुर्ग-मालवण यांच्या मार्गदर्शनाखाली सदर कारवाई केली आहे. अंमलबजावणी अधिकारी यांनी प्रतिवेदन दाखल केल्यानंतर सदर नौकेबाबत सुनावणी सहायक आयुक्त मत्स्यव्यवसाय, सिंधुदुर्ग-मालवण यांचे न्यायालयात ठेवण्यात येणार आहे.
Subscribe to my channel
