मालवणात एसटी बस आणि डंपर यांच्यात धडक : प्रकरण परस्पर मिटवल्याने मनसे आक्रमक
बड्या राजकीय नेत्याच्या फोनाफोनी नंतर प्रकरण दडपले ? मनसेचा गंभीर आरोप
मालवण | कुणाल मांजरेकर
मालवण आनंदव्हाळ मार्गावर शनिवारी सायंकाळी उशिरा एसटी बस व डंपर यांच्यात अपघात झाला. मात्र या अपघाता बाबत पोलीस ठाण्यात कोणतीही तक्रार दाखल न केल्याने मनसेने आक्रमक पवित्रा घेतला आहे. वाळू व्यवसायिकांच्या दबावामुळे हा अपघात मिटवण्यात आला असून एसटीने तक्रार दाखल न केल्यास एसटीच्या एमडी कडे मनसे तक्रार दाखल करणार असल्याची माहिती मनसेच्या अमित इब्रामपूरकर यांनी दिली आहे.
मालवणकडे येणाऱ्या एसटी बसला शनिवारी सायंकाळी चौकेच्या दिशेने जाणाऱ्या डंपरने धडक दिली. या अपघातात कोणालाही दुखापत झाली नसली तरी बसचे नुकसान झाले आहे. या अपघाता बाबत सोशल मीडियावर जोरदार चर्चा सुरु असली तरी पोलीस ठाण्यात तक्रार दाखल करण्यात आलेली नाही. डंपर मालक यांच्या वतीने एसटी बसची नुकसान भरपाई देण्याचे मान्य करण्यात आले आहे, अशी माहिती मालवण आगार व्यवस्थापकांकडून देण्यात आली आहे.
गुन्हा दाखल न केल्यास मनसेच्यावतीने एसटीच्या एमडींकडे तक्रार करणार
एसटीच्या नियमावली मध्ये जर एसटी बसचे अपघातामुळे नुकसान झाले तर त्याची तक्रार पोलीस स्थानकाला देऊन पंचनामा करून संबंधितांवर गुन्हा दाखल करावा लागतो. परंतु मालवण आगार व्यवस्थापकांनी अशा प्रकारच्या हालचाली न करता वाळू व्यवसायिकांच्या दबावाखाली प्रकरण दडपले आहे. सत्तेत असलेल्या बड्या राजकीय नेत्याच्या फोनाफोनीमुळे प्रकरण दाबल्याची चर्चा आहे. हा फोनाफोनी करणारा बडा राजकीय नेता कोण ? एसटीचे झालेले नुकसान कोणी ठरवले ? आगारव्यवस्थापकांना स्वतः व्हॕल्युएशन करण्याचा अधिकार आहे का ? असा सवाल मनसेच्या अमित इब्रामपूरकर यांनी उपस्थित केला आहे. सदर अपघात झाल्यानंतर पोलिस अधिकारी आणि उपस्थित काही वाळु व्यावसायिकांचे प्रतिनिधी उपस्थित राहुन दुचाकींना रस्ता मोकळा करुन देत होते. या डंपरचे पासिंग परराज्यातील असूनही पोलिस यंत्रणा मुग गिळुन गप्प का ? सदर अपघातग्रस्त झालेली एसटी मालवण आगारात असून आज रात्रीच्या वेळी त्या एसटीची मालवण शहरात किंवा अन्य तालुक्यात नेऊन डागडूजी करण्याची शक्यता आहे. मनसेकडे अपघातग्रस्त एसटीचे फोटो असुन जर एसटी प्रशासनाने गुन्हा दाखल न केल्यास मनसेच्यावतीने एसटीच्या एमडींकडे तक्रार करणार असल्याचे अमित इब्रामपूरकर यांनी सांगितले.
