बँकेचे अध्यक्ष मनीष दळवी यांचे प्रतिपादन ; नारळ-सुपारी बागायत सक्षमीकरणासाठी कोलझर सोसायटीचा मेळावा संपन्न
दोडामार्ग: दोडामार्ग तालुक्यातील नारळ आणि सुपारी उत्पादक शेतकऱ्यांसाठी कोलझर विभाग विविध कार्यकारी सहकारी सेवा सोसायटी लिमिटेड, कोलझर यांच्या वतीने आयोजित करण्यात आलेला ‘शेतकरी बागायतदार मेळावा’ मोठ्या उत्साहात पार पडला. या मेळाव्यात शेतकऱ्यांना आधुनिक आणि शास्त्रोक्त मार्गदर्शन करण्यात आले.
सिंधुदुर्ग जिल्हा मध्यवर्ती बँक लिमिटेडचे अध्यक्ष मनीष दळवी यांनी या कार्यक्रमाचे अध्यक्षस्थान भूषवले. आपल्या अध्यक्षीय भाषणात त्यांनी ग्रामीण भागातील सहकारी संस्था सक्षम करण्याच्या जिल्हा बँकेच्या सातत्यपूर्ण प्रयत्नांवर भर दिला.जिल्हा बँक आपल्या नफ्यातून सहकारी संस्थांच्या सक्षमीकरणासाठी मदत करेल आणि या कार्यात बँक खंबीरपणे पाठीशी उभी राहील, असे त्यांनी सांगितले. विशेषतः कोलझर सोसायटीला कार्यालय आणि सुसज्ज इमारत उभारण्यासाठी जिल्हा बँक सहकार्य करेल, असे आश्वासन त्यांनी यावेळी दिले.
केंद्र आणि राज्य सरकारच्या अनुकूल धोरणांचा लाभ घेऊन सहकारी संस्थांनी शेतकरी सक्षमीकरणासाठी प्रयत्न करावेत, असे आवाहनही त्यांनी केले.बदलत्या वातावरणामुळे बागायतींसमोर उभ्या असलेल्या अडचणींवर मात करून आर्थिक उन्नती साधण्यासाठी बाळासाहेब सावंत कोकण कृषी विद्यापीठाचे (BSKKV) शास्त्रज्ञ उपस्थित होते.
जिल्हा फळ संशोधन केंद्र, मुळदे येथील शास्त्रज्ञांनी सुपारी आणि नारळ बागायतीची लागवड, उत्पादन वाढीचे तंत्र, खते, बी-बियाणे आणि वनस्पती विकृतीशास्त्र (Plant Pathology) या महत्त्वाच्या पैलूंवर शेतकरी-बागायतदारांना सखोल मार्गदर्शन केले. यावेळी डॉ. आर. आर. राठोड, डॉ. एम. एस. शेडगे (सहाय्यक प्राध्यापक, उद्यानविद्या), आणि डॉ. वाय. सी. मुठाळ (तांत्रिक अधिकारी) यांनी मार्गदर्शन केले.
या मेळाव्यात सहकार आणि कृषी क्षेत्रातील भरीव कामगिरीबद्दल दोन सिंधुदुर्ग सुपुत्रांचा विशेष सत्कार करण्यात आला. त्यात जिल्हा बँकेचे अध्यक्ष मनीष दळवी यांचा सहकार क्षेत्रात केलेल्या भरीव कामगिरीबद्दल सत्कार करण्यात आला. तर डॉ. विजय दळवी: (सहयोगी अधिष्ठाता, उद्यानविद्या महाविद्यालय, मुळदे) यांना ‘उत्कृष्ट शास्त्रज्ञ पुरस्कार’ मिळाल्याबद्दल त्यांचा सत्कार करण्यात आला. ते या कार्यक्रमाचे प्रमुख पाहुणे होते. यावेळी पत्रकार शिवप्रसाद देसाई यांच्यासह अन्य उपस्थित पत्रकारांचाही गौरव करण्यात आला. मेळाव्याला जिल्हा बँक संचालक श्री. गणपत देसाई, विकास अधिकारी श्री. संजय ठाकर, संस्थेचे संचालक आणि माजी अध्यक्ष तर पंचक्रोशीतील शेतकरी-बागायतदार मोठ्या संख्येने उपस्थित होते. हा कार्यक्रम कोलझर विभाग विकास सहकारी सेवा सोसायटी लि. कोलझरचे अध्यक्ष आणि संचालकांच्या नेतृत्वाखाली यशस्वीरित्या पार पडला.
Subscribe to my channel
