आमदार निलेश राणेंची पर्यटनमंत्री शंभूराज देसाईंसोबत महत्त्वपूर्ण चर्चा
मुंबई : कुडाळ-मालवणचे आमदार निलेश राणे यांनी आज मुंबई येथे महाराष्ट्राचे पर्यटन मंत्री शंभूराजे देसाई यांची मेघदूत निवासस्थानी भेट घेतली. या भेटीत सिंधुदुर्ग जिल्ह्यातील पर्यटन क्षेत्राच्या सर्वांगीण विकासाबाबत सविस्तर चर्चा करण्यात आली.
सिंधुदुर्ग जिल्ह्याला लाभलेले विस्तीर्ण समुद्रकिनारे, ऐतिहासिक किल्ले, धार्मिक स्थळे, निसर्गरम्य पर्यटनस्थळे, जलक्रीडा तसेच कोकणी संस्कृती आणि खाद्यपरंपरा यामुळे जिल्ह्याला पर्यटनाच्या दृष्टीने मोठी क्षमता आहे. या क्षमतेचा अधिक प्रभावीपणे वापर करून जिल्ह्यात पर्यटनाला चालना देण्यासाठी आवश्यक उपाययोजनांबाबत आमदार निलेश राणे यांनी पर्यटनमंत्री शंभूराज देसाई यांच्याशी चर्चा केली.
पर्यटकांची वाढती संख्या लक्षात घेता जिल्ह्यात आवश्यक त्या पायाभूत सुविधा निर्माण करणे, पर्यटनस्थळांचा विकास करणे, पर्यटकांसाठी मूलभूत सुविधा उपलब्ध करून देणे तसेच पर्यटनस्थळांपर्यंत पोहोचण्यासाठी आवश्यक सोयी-सुविधा अधिक सक्षम करण्याच्या विषयावरही चर्चा झाली.
विशेषतः सिंधुदुर्गातील पर्यटनस्थळांचा नियोजनबद्ध विकास झाल्यास स्थानिक नागरिकांना मोठ्या प्रमाणात रोजगार आणि व्यवसायाच्या संधी उपलब्ध होऊ शकतात. हॉटेल, होमस्टे, वाहतूक, स्थानिक खाद्यपदार्थ, हस्तकला, जलक्रीडा आणि इतर पूरक व्यवसायांना त्याचा थेट फायदा होऊ शकतो. त्यामुळे पर्यटन विकासाचा लाभ स्थानिक अर्थव्यवस्थेला मिळावा, यासाठी विविध स्तरांवर प्रयत्न करण्याची गरज यावेळी अधोरेखित करण्यात आली.
कुडाळ-मालवण विधानसभा मतदारसंघासह संपूर्ण सिंधुदुर्ग जिल्ह्यातील पर्यटनविषयक प्रलंबित प्रश्न, आवश्यक विकासकामे आणि भविष्यातील पर्यटन प्रकल्प याबाबतही आमदार निलेश राणे यांनी पर्यटनमंत्र्यांसमोर विविध मुद्दे मांडले. जिल्ह्याच्या पर्यटन क्षमतेला अनुरूप नवीन सुविधा आणि उपक्रम राबविण्यासाठी शासनाकडून आवश्यक सहकार्य मिळावे, अशी अपेक्षाही त्यांनी व्यक्त केली.
सिंधुदुर्गच्या पर्यटन विकासाला अधिक व्यापक स्वरूप देऊन देश-विदेशातील पर्यटकांना आकर्षित करण्यासाठी जिल्ह्यातील पर्यटनस्थळांचे प्रभावी ब्रँडिंग आणि प्रसिद्धी, आधुनिक सुविधा तसेच पर्यटकांसाठी सुरक्षित आणि दर्जेदार वातावरण निर्माण करण्याच्या दृष्टीनेही चर्चा झाल्याचे सांगण्यात आले.
या भेटीमुळे सिंधुदुर्गच्या पर्यटन विकासाच्या दृष्टीने आगामी काळात महत्त्वपूर्ण निर्णय आणि विकासकामांना गती मिळण्याची अपेक्षा व्यक्त होत आहे. पर्यटन क्षेत्राच्या माध्यमातून जिल्ह्यातील युवक, व्यावसायिक आणि स्थानिक उद्योजकांना नव्या संधी उपलब्ध करून देण्याच्या दृष्टीने ही भेट महत्त्वपूर्ण मानली जात आहे. यावेळी माजी मंत्री तथा आमदार दीपक केसरकर उपस्थित होते.
Subscribe to my channel
