विभागीय फेरीत उपविजेतेपद; विद्यापीठाच्या अंतिम फेरीत दिमाखदार प्रवेश
सर्जनशील सादरीकरण अन् दमदार सांघिक समन्वयाच्या जोरावर मिळवले यश
सावंतवाडी : नृत्यकलेला सर्जनशीलतेची जोड, भन्नाट संकल्पना आणि दमदार सांघिक सादरीकरणाची ताकद दाखवत सावंतवाडी येथील यशवंतराव भोसले इन्स्टिट्यूट ऑफ टेक्नॉलॉजीच्या (वायबीआयटी) विद्यार्थिनींनी मुंबई विद्यापीठाच्या युवा महोत्सवात दणदणीत कामगिरी केली आहे. ५९व्या आंतरमहाविद्यालयीन विभागीय युवा महोत्सवाच्या क्रिएटिव्ह डान्स प्रकारात वायबीआयटीच्या संघाने उपविजेतेपद पटकावत थेट विद्यापीठस्तरीय अंतिम फेरीत प्रवेश केला आहे.
मुंबई विद्यापीठाच्या विद्यार्थी विकास विभागातर्फे २१ ऑगस्ट रोजी कलिना मुंबई येथील कवी कुसुमाग्रज मराठी भाषा आणि साहित्य भवन येथे विभागीय फेरीचे आयोजन करण्यात आले होते. राज्यभरातील गुणवंत महाविद्यालयीन विद्यार्थ्यांच्या उपस्थितीत रंगलेल्या या स्पर्धेत वायबीआयटीच्या विद्यार्थिनींनी आपल्या सादरीकरणातून वेगळी छाप पाडली. सर्जनशील संकल्पना, नृत्यातील प्रभावी भावमुद्रा, उत्स्फूर्त सादरीकरण आणि अचूक सांघिक समन्वय यामुळे वायबीआयटीच्या संघाला द्वितीय क्रमांक मिळाला. या सादरीकरणासाठी निधी शिरोडकर हिने विशेष मेहनत घेत संघाच्या तयारीत महत्त्वाची भूमिका बजावली.
या यशस्वी संघात निधी शिरोडकर (तृतीय वर्ष, कॉम्प्युटर सायन्स अँड इंजिनिअरिंग), अनुष्का पंडित (द्वितीय वर्ष, मेकॅनिकल इंजिनिअरिंग), अदिती परब (द्वितीय वर्ष, इलेक्ट्रिकल इंजिनिअरिंग), तसेच वेदिका माडखोलकर, चिन्मयी गोवेकर, उज्वला रेडकर, धन्वी मांजरेकर, आर्या कदम, लावण्या पिंगुळकर आणि योजना पवार (सर्व द्वितीय वर्ष, कॉम्प्युटर इंजिनिअरिंग) यांचा समावेश आहे.
कॉम्प्युटर इंजिनिअरिंग विभागाच्या प्रा. अदिती शेंडेकर यांनी मुंबई येथे संघासोबत उपस्थित राहून विद्यार्थिनींना मार्गदर्शन आणि प्रोत्साहन दिले. त्यांच्या मार्गदर्शनामुळे संघाला स्पर्धेच्या तयारीत मोठी मदत झाली. विभागीय फेरीतील दमदार कामगिरीनंतर हा संघ मुंबई विद्यापीठाच्या अंतिम फेरीत सहभागी होणार असून ४ ऑक्टोबर रोजी अंतिम फेरी रंगणार आहे. त्यामुळे वायबीआयटीच्या संघाकडून अंतिम फेरीतही उल्लेखनीय कामगिरीची अपेक्षा व्यक्त होत आहे.या शानदार यशाबद्दल संस्थेचे कार्याध्यक्ष अच्युत सावंतभोसले, प्राचार्य डॉ. रमण बाणे, प्राध्यापकवर्ग आणि संस्थेतील सर्व घटकांनी संघाचे अभिनंदन केले असून अंतिम फेरीसाठी शुभेच्छा दिल्या आहेत.
Subscribe to my channel
