धामापूरात ट्रक आणि डंपरमध्ये भीषण अपघात ; ट्रक चालक जखमी
मालवण : चौके – कुडाळ मार्गावर धामापूर येथे कुडाळहुन चौकेच्या दिशेने जाणारा ट्रक KA- 23 B- 4988 आणि चौके येथून चिरे वाहतूक करणारा डंपर KA-19 D-5561 यांच्यात समोरासमोर धडक बसून भीषण अपघात झाला. हा अपघात सोमवारी २७ जून रोजी सायंकाळी ६ वाजता झाला. या अपघातामुळे संपूर्ण रस्ता बंद झाला असून या मार्गावरील वाहतूक पूर्णपणे ठप्प झाली आहे. ट्रकचालकाचा वाहनावरील ताबा सुटून हा अपघात झाल्याचे प्रत्यक्षदर्शींनी सांगितले. प्रसंगावधान राखून डंपर चालकाने बाजूला उडी मारल्याने त्याला दुखापत झाली नाही. यामध्ये दोन्ही वाहनांचे मोठे नुकसान झाले.
अपघातानंतर केबिन मध्ये अडकलेला ट्रकचा चालक जखमी झाला असून स्थानिक तरुणांनी त्याला बाहेर काढून रुग्णवाहिकेतुन उपचारासाठी कुडाळ येथे दाखल करण्यात आले आहे. मालवण पोलीस स्टेशनचे सहाय्यक पो. कॉ. सुनिल चव्हाण आणि सिद्धेश चिपकर यांनी घटनास्थळी उपस्थित राहून अपघाताचा पंचनामा केला आणि स्थानिकांच्या मदतीने वाहतूक सुरळीत करण्यासाठी परिश्रम घेतले.
