तळगाव सोसायटीवर भाजपचा झेंडा ; चेअरमन, व्हा. चेअरमन पदाच्या निवडणूकीत बाजी
भाजपच्या विजयानंतर निलेश राणेंनी खा. विनायक राऊतांना डिवचले
कोकणाला लागलेला हा कोरोना २०२४ ला कायमचा घालवणार ; निलेश राणेंचे ट्विट
कुणाल मांजरेकर
मालवण : मालवण तालुक्यातील तळगाव सोसायटीच्या चेअरमन, व्हाईस चेअरमन पदाच्या निवडणूकीत भाजपने विजय मिळवला आहे. या सोसायटीवर चेअरमन पदी प्रकाश पावसकर तर व्हाईस चेअरमन पदी राजेंद्र दळवी हे ७ विरुद्ध ६ मतांनी निवडून आले. दरम्यान, भाजपच्या विजयानंतर भाजपा प्रदेश सरचिटणीस निलेश राणे यांनी खासदार विनायक राऊत यांच्यावर टीका केली आहे. याबाबत ट्विट करताना २०२४ ला हा कोकणाला लागलेला कोरोना आम्ही कायमचा घालवणार, असं निलेश राणे यांनी म्हटलं आहे.
तळगाव सोसायटीची निवडणूक अलीकडेच झाली होती. गुरुवारी या सोसायटीच्या चेअरमन आणि व्हाईस चेअरमन पदाची निवडणूक घेण्यात आली. यावेळी चेअरमन पदी प्रकाश पावसकर तर व्हाईस चेअरमन पदी राजेंद्र दळवी हे ७ विरुद्ध ६ मतांनी निवडून आले. यावेळी संचालक चेतन मुसळे, प्रविण जावकर, महेश परब, समृद्धी कुशे, वर्षा वाळके यांच्यासह भाजपाचे जिल्हा सरचिटणीस अशोक सावंत, तालुकाध्यक्ष धोंडी चिंदरकर, माजी सभापती अजिंक्य पाताडे, जगदीश चव्हाण, प्रसाद मोरजकर, भाई राणे, चंद्रकात पेडणेकर, सागर कुशे, ऊमेश राणे, देऊ कदम, राजु दळवी, स्वप्निल गावडे, माधुरी बांदेकर आदी उपस्थित होते.
खा. विनायक राऊतांवर निलेश राणेंची टीका
भाजपच्या विजयानंतर निलेश राणे यांनी ट्विट करून खासदार विनायक राऊत यांच्यावर टीका केली आहे. मालवण तालुक्यातील शिवसेना खासदार विनायक राऊतच्या गावात अर्थात तळगाव सोसायटीवर भाजपचा झेंडा फडकला. मोदी लाटेत दोन वेळा निवडून आलेल्या राऊतची काय लायकी आहे, हे वारंवार समोर येतेच. पण त्याच्या वार्ता मोठ्या. २०२४ ला हा कोकणाला लागलेला कोरोना आम्ही कायमचा घालवणार, असं निलेश राणे यांनी म्हटलं आहे.
सुकळवाड हनुमान मंदिरात विजयी सदस्यांचा सत्कार
सायंकाळी मालवणच्या दौऱ्यावर आलेल्या माजी खासदार निलेश राणे यांनी सुकळवाड येथील मारुती मंदिरात तळगाव सोसायटीच्या विजयी उमेदवारांचा सत्कार केला. मालवण तालुक्यातील सुकळवाड हनुमान मंदिरात शिवसेना खासदार विनायक राऊतला ज्यांनी धूळ चारली त्या विजयी उमेदवारांची भेट घेतली. हनुमान चालीसाला विरोध करणाऱ्या शिवसेनेचे पानिपत करणाऱ्या हनुमानाचे मंदिरात जाऊन दर्शन घेतले, असं ट्विट निलेश राणेंनी केलं आहे.
